سولتۇستىك كورەيا بيىل العاشقى زىمىرانىن ۇشىردى
استانا. KAZINFORM – ك ح د ر جاپون تەڭىزىنە قاراي (بولجام بويىنشا) بالليستيكالىق زىمىران ۇشىردى. بۇل تۋرالى جاپونيانىڭ جاعالاۋ كۇزەتى حابارلادى، دەپ جازدى تاسس اقپارات اگەنتتىگى.
جاپون قوعامدىق تەلەارناسىنىڭ حابارلاۋىنشا، زىمىران جاپونيانىڭ جاپون تەڭىزىندەگى ەرەكشە ەكونوميكالىق ايماعىنان تىس جەرگە قۇلاعان. قانداي دا ءبىر شىعىن تۋرالى اقپارات تۇسكەن جوق. جاپوندىق باقىلاۋشىلار ايماقتاعى كەمەلەردى زىمىران قالدىقتارىن بايقاسا، ولارعا جاقىنداماي، دەرەۋ بيلىككە حابارلاسۋعا شاقىردى.
جاپون پرەمەر-ءمينيسترى سيگەرۋ يسيبانىڭ كەڭسەسىندە پحەنياننىڭ زىمىران ۇشىرۋى تۋرالى اقپاراتتى جيناۋ جانە تالداۋ ءۇشىن داعدارىسقا قارسى شتاب جۇمىس ىستەي باستادى. يسيبا سونداي-اق ءتيىستى مينيسترلىكتەر مەن ۆەدومستۆولارعا جەرگىلىكتى حالىقتى جاعداي تۋرالى جەدەل اقپاراتپەن قامتاماسىز ەتىپ، ايماقتاعى كەمە قاتىناسى مەن ازاماتتىق اۆياتسيانىڭ قاۋىپسىزدىگىن قامتاماسىز ەتۋدى تاپسىردى.
بۇل سولتۇستىك كورەيانىڭ 2025-جىلى العاشقى زىمىران ۇشىرۋى بولدى. سوڭعى رەت پحەنيان زىمىراندى وتكەن جىلدىڭ 5-قاراشاسىندا ۇشىرعان.
وسىعان دەيىن سولتۇستىك كورەيانىڭ 31-قازان، بەيسەنبى كۇنى جاپون (شىعىس) تەڭىزىنە قاراي قۇرلىقارالىق بالليستيكالىق زىمىران ۇشىرعانىن راستاعانى تۋرالى جازدىق.
