سولتۇستىك كورەيا باسشىسى ا ق ش-پەن ديالوگ جۇرگىزۋ شارتىن قويدى
استانا. KAZINFORM - كيم چەن ىن ەگەر ۆاشينگتون يادرولىق قارۋسىزداندىرۋ تۋرالى تالاپتارىنان باس تارتسا، ا ق ش-پەن كەلىسسوز جۇرگىزۋگە دايىن، دەپ حابارلايدى BBC.
كورەيانىڭ ورتالىق تەلەگراف اگەنتتىگىنىڭ حابارلاۋىنشا، سولتۇستىك كورەيا باسشىسى بۇل تۋرالى وتكەن دەمالىس كۇندەرى پارلامەنت وتىرىسىندا سويلەگەن سوزىندە ايتتى.
- ەگەر ا ق ش يادرولىق قارۋسىزداندىرۋعا دەگەن بوس قۇمارلىعىنان باس تارتسا جانە شىندىقتى مويىنداي وتىرىپ، سولتۇستىك كورەيامەن بەيبىت قاتار ءومىر سۇرۋگە ۇمتىلۋعا دايىن بولسا، ا ق ش-پەن كەلىسسوز ۇستەلىنە وتىرماۋعا ەشقانداي سەبەپ بولمايدى، - دەپ كەلتىردى Yonhap اگەنتتىگى سولتۇستىك كورەيا كوشباسشىسىنىڭ ءسوزىن.
امەريكا باسشىسىمەن سوڭعى رەت 2019 -جىلى كەزدەسكەن كيم بىلاي دەپ قوستى:
- مەنىڭ پرەزيدەنت ترامپ تۋرالى جاقسى ەستەلىكتەرىم بار.
وڭتۇستىك كورەيامەن قارىم-قاتىناس تۋرالى ايتا كەلە، سولتۇستىك كورەيا باسشىسى سەۋلمەن كەلىسسوز ۇستەلىنە ەشقاشان وتىرمايتىنىن جانە پحەنيان وڭتۇستىكپەن بىرىگۋگە ۇمتىلمايتىنىن مالىمدەدى.
بۇعان دەيىن وڭتۇستىك كورەيا، ا ق ش جانە جاپونيا ءۇشجاقتى اسكەري جاتتىعۋدى باستاعانىن جازعان بولاتىنبىز.
بەس كۇندىك Freedom Edge جاتتىعۋلارى 15-19-قىركۇيەك ارالىعىندا وڭتۇستىك كورەيانىڭ چەدجۋ ارالىنىڭ شىعىسى مەن وڭتۇستىگىندەگى حالىقارالىق سۋ ايدىندارىندا وتەدى.
