سولتۇستىك جانە شىعىس وڭىرلەردى گازداندىرۋدىڭ ەكى جولىن قاراستىرىپ وتىرمىز - مينيستر
استانا. KAZINFORM - قازاقستاننىڭ سولتۇستىك جانە شىعىس وڭىرلەرىن گازداندىرۋ بويىنشا رەسەيمەن كەلىسسوز قاي دەڭگەيدە ءجۇرىپ جاتىر؟ بۇل ساۋالعا ەنەرگەتيكا ءمينيسترى الماسادام ساتقاليەۆ جاۋاپ بەردى.
- كەلىسسوزدەر بويىنشا وڭ ديناميكا بايقالادى. ەلىمىزدىڭ سولتۇستىك جانە شىعىس وڭىرلەرىن گازداندىرۋدىڭ ەكى ستسەنارييى قاراستىرىلىپ وتىر. ءبىرىنشى سەناري بويىنشا رەسەي-قىتاي ترانزيتتىك گاز قۇبىرى ارقىلى قازاقستان اۋماعىنان وتەتىن مارشرۋت. بۇل جاعدايدا ەلىمىزگە جىلىنا 10 ميلليارد تەكشە مەترگە دەيىن گاز الۋ مۇمكىندىگى تۋادى. ءبىراق، بۇل قۇبىر بويىنشا شەشىم رەسەي مەن قىتايعا تىكەلەي بايلانىستى. ەگەر وڭ شەشىم قابىلدانسا، قازاقستان بۇل جوبانى جۇزەگە اسىرۋعا مۇددەلى جانە كەلىسىلگەن شارتتار نەگىزىندە ءوز اۋماعىن ۇسىنۋعا دايىن، - دەدى الماسادام ساتقاليەۆ ۆەدومستۆونىڭ كەڭەيتىلگەن القا وتىرىسىنان كەيىن وتكەن باسپا ءسوز ءماسليحاتىندا.
ەنەرگەتيكا ءمينيسترى ۇسىنىپ وتىرعان ەكىنشى مۇمكىندىك «سارىارقا» گاز قۇبىرىن كەڭەيتۋ.
- بۇل باعىتتا دا جوعارى دايىندىق ءجۇرىپ جاتىر. «قازترانسگاز» كومپانياسى الدىن الا تەحنيكالىق-ەكونوميكالىق نەگىزدەمەنى (تەن) ازىرلەپ جاتىر. قازاقستان تاراپى ترانزيتتىك گاز قۇبىرى بويىنشا شەشىمنىڭ انىقتىعىنا بايلانىستى ءتيىستى شەشىمدەر قابىلدايتىن بولادى، - دەدى ول.
بۇعان دەيىن قازاقستانعا گاز جەتكىزەتىن قۇبىر رەسەي سحەماسىنا ەنگىزىلگەنى تۋرالى حابارلاعان ەدىك.
ر ف ۇكىمەتى رەسەي فەدەراتسياسىنىڭ فەدەرالدى كولىك سالاسىنداعى اۋماقتىق جوسپارلاۋ سحەماسىنا وزگەرىستەر ەنگىزدى (قۇبىر كولىگى بولىگىندە)، وعان سايكەس قازاقستاندى گازداندىرۋ ءۇشىن 10 ميلليارد تەكشە مەترگە ماگيسترالدى گاز قۇبىرىن سالۋ جوسپارلانعان.
