سوڭعى جىلدارى ءبىلىم سالاسىنا سالىنعان ينۆەستيتسيا 6 ەسە ءوستى
استانا. KAZINFORM - سوڭعى جىلدارى ءبىلىم سالاسىنا سالىنعان ينۆەستيتسيا 6 ەسە ءوستى. بۇل تۋرالى بۇگىن ۇكىمەت وتىرىسىندا «جايلى مەكتەپ» ۇلتتىق جوباسىنىڭ ىسكە اسىرىلۋ بارىسىن تالقىلاۋ كەزىندە پرەمەر-ءمينيستردىڭ ءبىرىنشى ورىنباسارى رومان سكليار ايتتى.
«وقۋ-اعارتۋ مينيسترلىگى ۇسىنىپ وتىرعان ءتاسىل نازار اۋدارۋعا تۇرارلىق دەۋگە بولادى. ءتاسىل كونكۋرستىق نەگىزدە مەملەكەتتىك-جەكەشەلىك ارىپتەستىك پرينتسيپتەرىنە نەگىزدەلگەن. بيزنەس قاۋىمداستىق تاراپىنان ۇلكەن قىزىعۋشىلىق بايقالادى. سوڭعى جىلدارى ءبىلىم سالاسىنا سالىنعان ينۆەستيتسيا 6 ەسە ءوستى. جالپى، وسى تەتىكتى جەكە ينۆەستيتسيالار ەسەبىنەن ىسكە اسىرۋ مەملەكەتتىك بيۋجەتكە تۇسەتىن جۇكتەمەنى ازايتۋعا مۇمكىندىك بەرەدى. ونىڭ ارقاسىندا باسقا جوبالارعا نازار اۋدارۋعا مۇمكىندىك تۋىندايدى»، - دەدى رومان سكليار.
پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى نۇرلان بايبازاروۆ تا وقۋ-اعارتۋ مينيسترلىگى ۇسىنىپ وتىرعان ءتاسىلدى قولدايتىندىعىن اتاپ ءوتتى.
«ويتكەنى، بۇل تەك قانا بيۋدجەتتىك جۇكتەمەنى تومەندەتۋ ەمەس، جالپى كاسىپكەرلىكتى دامىتۋعا، وتاندىق تاۋارلاردى ساتىپ الۋعا، ينۆەستيتسيالاردىڭ وسۋىنە ىنتالاندىرادى. جاڭا جۇمىس ورىندارىنىڭ اشىلۋىنا سەپتىگىن تيگىزەدى. سوندىقتان تولىعىمەن قولدايمىز»، - دەدى ول.
وسى ورايدا ۇكىمەت باسشىسى ولجاس بەكتەنوۆ ودان: «مەملەكەتكە ءتيىمدى بولا ما؟»، - دەپ سۇرادى.
«ءيا، ءبىزدىڭ ەسەبىمىز بويىنشا ەداۋىر ۇنەمدى بولادى. ءبىزدىڭ ناقتى ەسەبىمىز بار. وتە پايدالى بولادى دەپ ويلايمىز»، - دەدى ۇلتتىق ەكونوميكا ءمينيسترى.
