سوڭعى ءۇش اپتادا 1 ميلليونعا جۋىق پالەستينالىق رافاحتان كەتتى - ب ۇ ۇ
استانا. KAZINFORM - سوڭعى ءۇش اپتادا گازا سەكتورىنىڭ وڭتۇستىگىندەگى رافاح قالاسىنان 1 ميلليونعا جۋىق پالەستينالىق قاشىپ كەتتى. بۇل تۋرالى بىرىككەن ۇلتتار ۇيىمىنىڭ پالەستينالىق بوسقىندارعا كومەك كورسەتۋ جانە جۇمىس جونىندەگى اگەنتتىگىنىڭ الەۋمەتتىك جەلىدە جاريالانعان حابارلاماسىندا ايتىلعان، دەپ جازادى انادولى.

حابارلاماعا سايكەس، سوڭعى ءۇش اپتادا كەم دەگەندە 1 ميلليون پالەستينالىق رافاحتى تاستاپ، گازا سەكتورىنىڭ ءارتۇرلى بولىكتەرىنە كوشۋگە ءماجبۇر بولدى.
- انكلاۆتا قاۋىپسىز كەڭىستىكتىڭ جوقتىعىنان بارار جەرى بولماعان پالەستينالىقتار يزرايلدىڭ ۇزدىكسىز شابۋىلدارىنان باسپانا ىزدەۋگە ءماجبۇر بولدى. سونىمەن قاتار، اگەنتتىك ازىق-تۇلىك پەن سۋ تاپشىلىعىنا نازار اۋداردى. گازا سەكتورىنداعى پالەستينالىقتارعا كۇن سايىن كومەك كورسەتۋ جانە ولاردى قورعاۋ قيىنداپ بارادى، - دەلىنگەن ۇيىم مالىمدەمەسىندە.
بۇعان دەيىن 7-مامىردا يزرايل ارمياسى انكلاۆتىڭ مىسىرمەن شەكاراسىنداعى رافاح باقىلاۋ-وتكىزۋ پۋنكتىنىڭ پالەستينالىق بولىگىنە باقىلاۋ ورناتىلعانىن حابارلاعان.
مامىردىڭ 26 سى كۇنى يزرايل حالىقارالىق قىلمىستىق سوتتىڭ شەشىمىنە قارسىلىق ءبىلدىرىپ، گازا سەكتورىنىڭ رافاح قالاسىنداعى پالەستينالىق بوسقىندار لاگەرىنە شابۋىل جاسادى. يزرايل شابۋىلىندا ايەلدەر، بالالار مەن قارتتاردى قوسقاندا كەمىندە 45 پالەستينالىق قازا تاپتى. سونىمەن قاتار، تاعى 249 پالەستينالىق جاراقات الدى.
اۆتور
جاراسقان نۇرىبايەۆ