ۇستىندە شاپان، قولىندا دومبىرا: وسكەمەندىك ۆولونتەر وزگە ۇلتتارعا قازاق ءتىلىن تەگىن ۇيرەتىپ ءجۇر

وسكەمەن. KAZINFORM - وسكەمەندىك اقىن ايان قالىمبەك وزگە ۇلت وكىلدەرىنە قازاق ءتىلى مەن دومبىرانى تەگىن ۇيرەتىپ ءجۇر. و. بوكەي اتىنداعى قالالىق كىتاپحانانىڭ «كەل سويلەسەيىك» كلۋبىنا كەلۋشىلەر ونىڭ ساباعىن اسىعا كۇتەدى. ۇنەمى ۇستىنەن ۇلتتىق كيىمدى، قولىنان ۇلتتىق اسپاپتى تاستامايتىن ايان بىزگە سۇحبات بەردى.

- وزگە ۇلت وكىلدەرىنە ۆولونتەر رەتىندە قازاق ءتىلىن ۇيرەتىپ جۇرگەنىڭىزگە قانشا ۋاقىت بولدى؟

- وتكەن جىلدىڭ جەلتوقسان ايىندا الەۋمەتتىك جەلىدەن قالاداعى ورالحان بوكەي اتىنداعى كىتاپحانانىڭ «كەل سويلەسەيىك» كلۋبىنا ەرىكتىلەر ىزدەپ جاتقانى جايلى وقىپ قالدىم. كىتاپحانانىڭ 14 فيليالىندا بولاتىن ساباقتارعا ۆولونتەرلەر قاجەت ەكەن. ويلانباستان جازىلدىم. «ءبىر- بىرىمىزبەن قازاقشا سويلەسەيىك، مەملەكەتتىك ءتىلدى ناسيحاتتايىق» دەپ قۇر سوزبەن ايتا بەرمەي ناقتى ىسپەن دالەلدەگىم كەلدى.

جۇمىستان بوس ۋاقىتتا سەنبى كۇنى اپتاسىنا ءبىر رەت باراتىن بولىپ كەلىستىم. تەك ءوزىم ەمەس، نيەتتەس، پىكىرلەس ادامدار جينالعان «Eastiler» ۇيىمىنىڭ مۇشەلەرى باردىق. سودان بەرى ءتىل ۇيرەتىپ كەلەمىز. ءوزىمنىڭ نەگىزگى ماماندىعىم - قازاق ءتىلى مەن ادەبيەتى ءپانىنىڭ مۇعالىمى. سوندىقتان ماعان قيىن بولعان جوق. ساباققا كوبىنەسە زەينەتكەرلەر كەلەدى ەكەن. ولاردىڭ ءبىراز جاسقا كەلگەنىنە قاراماستان قازاق ءتىلىن مەڭگەرۋگە دەگەن تالپىنىسى كوڭىل سۇيسىنتەدى. سوزدەردى جاتتاتقىزىپ، كۇندەلىكتى تۇرمىستىق ديالوگتارعا باۋليمىز. ەڭ اۋەلى «نان قانشا تەڭگە تۇرادى؟»، «ايالداما قاي جەردە؟» دەگەن سياقتى قاجەتتى سوزدەرگە ۇيرەتتىك. اتاۋ مەن ىلىك سەپتىكتى، جىكتىك، تاۋەلدىك جالعاۋدى تۇسىندىردىك. ۋاقىت وتكەن سايىن كەلۋشىلەردىڭ قىزىعۋشىلىعى ارتۋدا دەسەم ارتىق ايتقاندىق بولماس. قازىر ارالارىندا ءتىپتى قازاقشا ماقالداتاتىندار دا بار.

- وسى كلۋبتا دومبىرا دا ۇيرەتىپ ءجۇر ەكەنسىز.

- ءيا. ول بىلاي بولدى. بىردە دومبىرا شەرتەتىنىمدى بىلگەن كىتاپحانا قىزمەتكەرلەرى «ساباققا دومبىراڭدى الا كەلسەڭ» دەپ سۇرادى. سويتسەم، ءتىل ۇيرەنىپ جۇرگەن اپالاردىڭ مەكتەپكە باراتىن نەمەرەلەرى دومبىراعا قاتتى قىزىعادى ەكەن. ۇيرەنگىلەرى كەلەتىندىگىن ايتىپتى. قۋانا كەلىستىم. ساعات 11.00-دە باستالاتىن ساباققا ءبىر ساعات ەرتەرەك كەلىپ، وقۋشىلاردى ۇلتتىق اسپابىمىزعا باۋلي باستادىم. دومبىرا ساباعىنان سوڭ اپالارى مەن نەمەرەلەرىنە قازاق ءتىلىن ۇيرەتەمىز.

- ءوزىڭىز قايدا جۇرسەڭىز دە ۇستىڭىزدەن ۇلتتىق كيىمدى تاستامايسىز. بۇنىڭ سەبەبى نەدە؟ وزگەلەرگە ۇلتتىق كيىمدى ناسيحاتتاۋ ما، الدە سىزگە ۇلتتىق كيىممەن جۇرگەن شابىت سىيلاي ما؟

- 2016 -جىلى اۋىلعا بارعانىمدا اپامنىڭ ساندىعىنان قۇدالىققا كيىلگەن سان ءتۇرلى ءتۇستى شاپانداردى بايقادىم. قىزىعىپ، كيىپ كورىپ ەدىم شەشكىم كەلمەي كەتتى. سوندا نەگە ۇنەمى كيىپ جۇرمەسكە دەگەن وي كەلدى. ول كەزدە قازىرگىدەي ۇلتتىق كيىم برەندتەرى شىقپاعان. كانيكۋل بىتكەن سوڭ كۇزدە قالاعا قايتقاندا شاپانداردى الا كەلدىم. جەڭى ۇزىن، ەسكى شاپاندى كيىپ كوشەدە الشاڭ باسىپ جۇرەمىن. ءبارى سۇقتانىپ قارايدى. ءبىرتۇرلى سەزىمدە بولدىم. ۇيالعاندايمىن، ءبىر جاعىنان نامىستانعاندايمىن. ءبىر ايدان سوڭ ەتىم ۇيرەنىپ كەتتى. جەل سوعىپ، شاپاننىڭ ەتەگى جەلبىرەگەن سايىن وزىمە كۇش، شابىت الاتىنداي سەزىنەتىنمىن.

سودان سوڭ جەتى كۇنگە 7 شاپان الىپ، ولاردى اتەلەگە اپارىپ جەڭى مەن ەتەگىن قىسقارتتىم. ستۋدەنت بولعان سوڭ ۇنەمى جاياۋ، اۆتوبۋسپەن جۇرەمىز عوي. كوشەدە ءبارى ماعان تاڭىرقاپ قاراپ جاتتى، ارالارىندا ۆيدەوعا ءتۇسىرىپ الەۋمەتتىك جەلىگە سالعاندار دا بولدى. وقۋدى اياقتاپ جۇمىس ىستەگەن سوڭ شاپاننىڭ ساپالىسىن الا باستادىم، ارنايىلاپ تا تىكتىردىم. ال قازىر ۇلتتىق كيىم ترەندكە اينالدى دەسەك تە بولادى. نەشە ءتۇرلىسى جارىققا شىعىپ، ونى كيەتىندەر كوبەيىپ كەلەدى. ءوزىمنىڭ سونى وبلىستا ءبىرىنشى بولىپ باستاعانىما قۋانامىن. 100 ادامنىڭ 10-ىنا بولسىن اسەر ەتسەم مەن ءۇشىن زور مارتەبە.

- قازاق تىلىندە وتەتىن «Etno quiz» ينتەللەكتۋالدىق سايىسىن ۇيىمداستىرىپ كەلەسىز. حالىقتىڭ قىزىعۋشىلىعى قانداي ؟

- وبلىس بويىنشا قازاقشا quiz وتكىزۋدى العاش 2020 -جىلى جۋرناليست دارىن نۇرساپار قولعا العان. سوعان ۇنەمى بارىپ، قاتىسىپ جۇرەتىنبىز. ونداعى سۇراقتاردا شەكتەۋ جوق. جاپونيانىڭ سامۋرايلارى، نەمىس حالقىنىڭ ءداستۇرى دەگەن سياقتى الەمنىڭ كەز كەلگەن بۇرىشىنان سۇراقتار قويىلا بەرەدى. ءسويتىپ جۇرگەندە نەگە تەك ءوز ۇلتىمىز تۋرالى سۇراقتار قويىلاتىن ەتنو quiz ۇيىمداستىرماسقا دەگەن وي ساپ ەتە قالدى. ءوزىمىز اشقان «Eastiler» ۇيىمىنداعى قىز-جىگىتتەرمەن اقىلداسىپ، سول ويدى ىسكە اسىردىق. بيىلعى قاڭتار ايىنان باستاپ وتكىزىپ كەلەمىز. ايىنا ءبىر رەت بولادى. سۇرانىس وتە جوعارى. تۇراقتى كوماندالارىمىز كوپ. بۇگىنگى جاستار توي- تومالاقتان گورى بىلىمگە بەت بۇرىپ كەلە جاتقان سەكىلدى. دارىن اعا بۇعان قۋانباسا رەنجىگەن جوق. سەبەبى وسىنداي سايىستاردىڭ كوبەيگەنى قازاقشا اۋديتوريانى ارتتىرىپ، ءتىلدىڭ ناسيحاتتالۋىنا ءسوزسىز اسەر ەتەدى.

- اڭگىمەڭىزگە كوپ راحمەت!

اۆتور

تالعاتجان مۇحامەتبەك ۇلى