ستۋدەنتتەر قانداي جەڭىلدىكتەردى پايدالانا الادى؟

الايدا ولاردىڭ بارلىعى بىردەي تەك «ستۋدەنت» مارتەبەسىنە بايلانىستى بەرىلمەيدى. كەيبىرى جاس مولشەرىنە قاراي قاراستىرىلسا، ەندى ءبىرى جەرگىلىكتى اكىمدىك نەمەسە ناقتى ۇيىمنىڭ تاريفتىك ساياساتىنا بايلانىستى. ستۋدەنتتەر قازىر قانداي مۇمكىندىكتەردى پايدالانا الادى؟

El.kz قولدانىستاعى جەڭىلدىكتەردى جيناقتاپ كوردى.

ستۋدەنتتەردىڭ شاكىرتاقىسى قانشا؟

ستۋدەنتتەرگە كورسەتىلەتىن نەگىزگى مەملەكەتتىك قولداۋدىڭ ءبىرى - مەملەكەتتىك شاكىرتاقى. قازىرگى مولشەر 2025-جىلعى 1-قىركۇيەكتەن باستاپ قولدانىلادى. باكالاۆرياتتا ءبىلىم الاتىن ستۋدەنتتەردىڭ مەملەكەتتىك شاكىرتاقىسى ايىنا 52372 تەڭگەنى قۇرايدى. پەداگوگيكالىق جانە مەديتسينالىق باعىتتاردا ءبىلىم الاتىن ستۋدەنتتەرگە 84000 تەڭگە تولەنەدى.

ماگيسترانتتاردىڭ شاكىرتاقىسى - 117098 تەڭگە، دوكتورانتتاردىكى - 262500 تەڭگە. ينتەرناتۋرادا ءبىلىم الۋشىلار ايىنا 94862 تەڭگە، ال رەزيدەنتۋرادا وقيتىندار 134664 تەڭگە الادى.

ەمتيحان سەسسياسىن تەك «وتە جاقسى» باعاعا تاپسىرعان ستۋدەنتتەردىڭ جوعارى مولشەردەگى شاكىرتاقى الۋ مۇمكىندىگى دە ساقتالعان. بۇدان بولەك، ستۋدەنتتەردىڭ جەكەلەگەن ساناتتارى ءۇشىن شاكىرتاقىعا ۇستەمەاقىلار قاراستىرىلعان. وسىلايشا، 2025-جىلعى 1-قىركۇيەكتەن باستاپ ستۋدەنتتەردىڭ شاكىرتاقى مولشەرى 2020-جىلمەن سالىستىرعاندا ەكى ەسە ءوستى.

پويىزبەن جۇرەتىن جاستارعا 33 پايىز جەڭىلدىك بار

باسقا قالادا وقيتىن ستۋدەنتتەر ءۇشىن ەڭ وزەكتى شىعىننىڭ ءبىرى - جول اقىسى. قازىرگى ۋاقىتتا تەمىرجولدا بارلىق ستۋدەنتكە اۆتوماتتى تۇردە بەرىلەتىن ءبىرىڭعاي تەگىن جول ءجۇرۋ مۇمكىندىگى جوق. الايدا جاستارعا ارنالعان ارنايى تاريفتەر بار. «جولاۋشىلار تاسىمالى» ا ق- نىڭ KETTIK33 ديسكونتتىق كارتاسى 15 پەن 25 جاس ارالىعىنداعى جولاۋشىلارعا ارنالعان. ياعني ونى پايدالانۋ ءۇشىن مىندەتتى تۇردە ستۋدەنت بولۋ شارت ەمەس.

كارتانىڭ قۇنى - 3000 تەڭگە، جارامدىلىق مەرزىمى - ءبىر جىل. ول تەمىرجول بيلەتىن 33 پايىز جەڭىلدىكپەن ساتىپ الۋعا مۇمكىندىك بەرەدى. ءبىراق جەڭىلدىك سەرۆيستىك قىزمەتتەر مەن كوميسسيالىق الىمدارعا قولدانىلمايدى. سونىمەن بىرگە KETTIK33 -جىل بويى ۇزدىكسىز جۇمىس ىستەمەيدى. جەڭىلدىك:

ماۋسىمنان تامىزعا دەيىن؛

20-29-ناۋرىز ارالىعىندا؛

25-30-جەلتوقسان ارالىعىندا قولدانىلمايدى.

كارتانى «جولاۋشىلار تاسىمالى» اق كاسسالارىنان ساتىپ الۋعا بولادى. بۇدان بولەك، تەمىرجولدا «جاستار» ەلەكتروندىق ديسكونتتىق كارتاسى دا بار. ول 16-25 جاس ارالىعىنداعى جولاۋشىلارعا بەلگىلى ءبىر كوممەرتسيالىق Talgo پويىزدارىندا «تۋريست» جانە «وتىراتىن» ۆاگوندارىنا بيلەتتى 25 پايىز جەڭىلدىكپەن ساتىپ الۋعا مۇمكىندىك بەرەدى. كارتانىڭ قۇنى - 3 مىڭ تەڭگە، جارامدىلىق مەرزىمى - ءبىر جىل. ياعني تەمىرجولداعى بۇل مۇمكىندىكتەر ستۋدەنتتىك جەڭىلدىك ەمەس، جاس مولشەرىنە بايلانىستى جاستارعا ارنالعان تاريفتەر ەكەنىن ەسكەرگەن ءجون.

ۇشاق بيلەتىن دە جاستار تاريفىمەن الۋعا بولادى

ۇشاقپەن ساپارلايتىن جاستار ءۇشىن دە ارنايى مۇمكىندىك قاراستىرىلعان. Air Astana اۋە كومپانياسىندا 12-25 جاس ارالىعىنداعى جولاۋشىلارعا جاستار ءتاريفى قولدانىلادى. كومپانيانىڭ رەسمي اقپاراتىندا بۇل مۇمكىندىك ستۋدەنتتەرگە ارنالعان جەڭىلدىك تۋرالى بولىمدە كورسەتىلگەن.

دەمەك، 25 جاسقا دەيىنگى ستۋدەنت بيلەت ىزدەگەن كەزدە ستاندارتتى تاريفتەن بولەك جاستار تاريفىنىڭ قولجەتىمدىلىگىن دە تەكسەرگەنى ءجون. بۇل جاعدايدا دا نەگىزگى تالاپ - ستۋدەنت مارتەبەسى ەمەس، جولاۋشىنىڭ جاسى.

قوعامدىق كولىكتەگى جەڭىلدىك ءار قالادا ءارتۇرلى

قوعامدىق كولىك ماسەلەسىندە قازاقستانداعى بارلىق ستۋدەنتكە ورتاق ءبىرىڭعاي تاريف جوق. «ءبىلىم تۋرالى» زاڭدا جەرگىلىكتى اتقارۋشى ورگانداردىڭ ءماسليحاتقا ءبىلىم الۋشىلاردىڭ قوعامدىق كولىكتە جەڭىلدىكپەن جۇرۋىنە قاتىستى ۇسىنىس ەنگىزۋ قۇزىرەتى قاراستىرىلعان. سوندىقتان ستۋدەنتكە بەرىلەتىن جەڭىلدىك قالاعا جانە جەرگىلىكتى ەرەجەلەرگە قاراي ەرەكشەلەنۋى مۇمكىن.

مىسالى، استانادا ءبىلىم بەرۋ ۇيىمدارىندا وقيتىن 18 جاسقا دەيىنگى بالالار قوعامدىق كولىكتە تەگىن جۇرەدى. ول ءۇشىن مەكتەپ كولىك كارتاسىن پايدالانۋ قاجەت. ال 18 جاستان اسقان ادامنىڭ ستۋدەنت بولۋىنىڭ ءوزى ەلورداداعى اۆتوبۋستا اۆتوماتتى تۇردە تەگىن جۇرۋگە قۇقىق بەرمەيدى. تەگىن جول جۇرۋگە قۇقىعى بار ەرەسەك ازاماتتاردىڭ جەكەلەگەن الەۋمەتتىك ساناتتارى بولەك بەلگىلەنگەن.

سوندىقتان باسقا قالادان وقۋعا كەلگەن ستۋدەنت ءوزىنىڭ قالاسىنداعى قوعامدىق كولىك وپەراتورى نەمەسە اكىمدىك بەلگىلەگەن تاريفتەردى جەكە تەكسەرگەنى دۇرىس.

مۋزەيلەردە ستۋدەنتتىك بيلەت اقشا ۇنەمدەۋگە كومەكتەسەدى

ستۋدەنتتىك بيلەتتىڭ پايداسى مادەني ورىندارعا بارعاندا دا بايقالادى. قازاقستانداعى ءبىرقاتار مەملەكەتتىك مۋزەي ستۋدەنتتەر ءۇشىن ارنايى تاريف بەلگىلەيدى. ماسەلەن، الماتىداعى قازاقستان رەسپۋبليكاسىنىڭ مەملەكەتتىك ورتالىق مۋزەيىندە ەرەسەكتەرگە نەگىزگى ەكسپوزيتسيانى تاماشالاۋ قۇنى 1500 تەڭگە بولسا، ستۋدەنتتەرگە بيلەت 700 تەڭگە تۇرادى. جەڭىلدىكتى پايدالانۋ ءۇشىن ستۋدەنت مارتەبەسىن راستايتىن قۇجات قاجەت.

تۇركىستانداعى قوجا احمەت ياساۋي كەسەنەسىنە كىرۋدە دە ستۋدەنتتەر ءۇشىن بولەك باعا بەلگىلەنگەن. 2026-جىلعى 10-ماۋسىمنان باستاپ قازاقستان ازاماتتارى ءۇشىن ەرەسەكتەر بيلەتى 1000 تەڭگە، ال ستۋدەنتتەر مەن زەينەتكەرلەر ءۇشىن 500 تەڭگە بولىپ بەلگىلەندى. مادەنيەت جانە اقپارات مينيسترلىگىنە قاراستى باسقا دا رەسپۋبليكالىق مەملەكەتتىك مەكەمەلەردىڭ تاريفتەرىندە ستۋدەنتتەر مەن زەينەتكەرلەرگە ەرەسەكتەرگە قاراعاندا تومەن باعا بەلگىلەنگەن جاعدايلار بار.

دەگەنمەن قازاقستانداعى بارلىق مۋزەي مەن تەاتردا بىردەي كولەمدەگى ستۋدەنتتىك جەڭىلدىك بار دەۋگە بولمايدى. بيلەت باعاسىن ءار مەكەمەنىڭ رەسمي رەسۋرسى ارقىلى ناقتىلاعان ءجون.

جاتاقحانا دا ستۋدەنتتەردى قولداۋدىڭ ءبىر باعىتى

جاتاقحانا ماسەلەسى تىكەلەي «جەڭىلدىك» سانالماعانىمەن، ستۋدەنتتەرگە كورسەتىلەتىن مەملەكەتتىك قولداۋدىڭ ماڭىزدى باعىتتارىنىڭ ءبىرى. قازاقستاندا جاڭا ستۋدەنتتىك جاتاقحانالار سالۋدى ىنتالاندىرۋ ءۇشىن مەملەكەتتىك تاپسىرىس تەتىگى قولدانىلادى. جەكە ينۆەستور جاتاقحانا سالىپ نەمەسە عيماراتتى قايتا جاڭارتىپ، ونى ستۋدەنتتەرگە ۇسىنعان جاعدايدا مەملەكەت بەلگىلى تالاپتارعا سايكەس شىعىننىڭ ءبىر بولىگىن وتەيدى.

بۇل مەحانيزمنىڭ ماقساتى – ج و و مەن كوللەدج ستۋدەنتتەرىنە ارنالعان ورىن سانىن كوبەيتۋ. الايدا مەملەكەتتىك تەتىكتىڭ بولۋى بارلىق ستۋدەنت جاتاقحانادا تەگىن تۇرادى دەگەندى بىلدىرمەيدى. جاتاقحاناعا ورنالاستىرۋ ءتارتىبى، اي سايىنعى تولەم جانە جەڭىلدىك ساناتتارى وقۋ ورنىنا قاراي ەرەكشەلەنۋى مۇمكىن. سوندىقتان ستۋدەنتتەر ۋنيۆەرسيتەتكە تۇسكەن كەزدە تەك جاتاقحانا بار-جوعىن ەمەس، الەۋمەتتىك ساناتتارعا ارنالعان جەڭىلدىكتەر قاراستىرىلعان- قاراستىرىلماعانىن دا ناقتىلاعانى دۇرىس.