ستۋدەنتتەر ج ي-دى پايدالانۋدان ونى جاساۋعا كوشتى - مينيستر
استانا. KAZINFORM - قازاقستان ستۋدەنتتەرى ءتۇرلى سالاداعى مىندەتتەردى شەشۋگە ارنالعان وزدەرىنىڭ جاساندى ينتەللەكت اگەنتتەرىن ازىرلەپ جاتىر. بۇل تۋرالى عىلىم جانە جوعارى ءبىلىم ءمينيسترى ساياسات نۇربەك AI-Sana باعدارلاماسىن ىسكە اسىرۋعا ارنالعان ءىس-شارا بارىسىندا ايتتى.
ءمينيستردىڭ اتاپ وتۋىنشە، باعدارلامانىڭ ەكىنشى كەزەڭىندە ستۋدەنتتەر جاساندى ينتەللەكت نەگىزدەرىن مەڭگەرۋدەن ناقتى شەشىمدەر ازىرلەۋگە كوشتى.
- بيىل باعدارلامانىڭ ەكىنشى كەزەڭى باستالدى. ونىڭ اياسىندا ستۋدەنتتەرىمىز جاساندى ينتەللەكت اگەنتتەرى دەپ اتالاتىن جۇيەلەردى تەرەڭىرەك ازىرلەۋگە ۇيرەنىپ جاتىر. بۇگىن سول اگەنتتەردىڭ ءبىرقاتار ۇلگىسى تانىستىرىلدى. ولار اۋىل شارۋاشىلىعىنان باستاپ ءبىلىم بەرۋ، دەنساۋلىق ساقتاۋ جانە ونەركاسىپ سالالارىنا دەيىنگى كەڭ اۋقىمدى قامتيدى، - دەدى ساياسات نۇربەك.
ول باعدارلامانىڭ ماقساتى ادامداردى دايىن جاساندى ينتەللەكت سەرۆيستەرىن پايدالانۋعا عانا ۇيرەتۋ ەمەس ەكەنىن اتاپ ءوتتى.
- كوپشىلىك جاساندى ينتەللەكتىنى كادىمگى Google ىزدەۋ جۇيەسى سياقتى نەمەسە ءتۇرلى سۇرانىس جىبەرۋ ءۇشىن پايدالانادى. ال الگوريتمدەردىڭ قالاي جۇمىس ىستەيتىنىن تەرەڭ ءتۇسىنۋ، ەڭ باستىسى - ناقتى ءارى ارنايى مىندەتتەردى شەشۋگە ارنالعان ءوز الگوريتمدەرىڭدى ۇيرەتۋ - مىنە، ناعىز قوسىلعان قۇن وسى، - دەدى مينيستر.
بۇعان دەيىن پرەزيدەنت جاساندى ينتەللەكتىنى دامىتۋ جونىندەگى كەڭەستىڭ ءۇشىنشى وتىرىسى بارىسىندا ج ي تەحنولوگياسىن قاۋىپسىز ءارى جاۋاپكەرشىلىكپەن دامىتۋدى كوزدەيتىن «ۆاشينگتون مودەلىن» قۇپتايتىنىن ايتقان ەدى.
