ەسترادا جۇلدىزىن جاڭاجىلدىق كەشكە شاقىرۋ قانشا تۇرادى
جاڭا جىلعا ساناۋلى كۇن قالدى. مەيرام الدىنداعى قاربالاس باستالىپ تا كەتكەن. ءبىرى تۋعان-تۋىسىنا سىيلىق ازىرلەسە، ەندى ءبىرى جاڭاجىلدىق كەشكە كيەتىن ءساندى كيىم ىزدەپ الەك. ال جاڭاجىلدىق كورپوراتيۆتەر قىزىقتى ءوتۋى ءۇشىن كەيبىر مەكەمە-ۇيىمدار ەسترادالىق جۇلدىزداردى شوۋ- باعدارلاماعا قاتىسۋعا الدىن الا شاقىرادى. بيىل ەسترادا جۇلدىزدارىنىڭ گونورارى قانشا؟ Kazinform ءتىلشىسى ەڭ قىمبات ءارتىس كىم ەكەنىن ءبىلدى.
ەسترادا جۇلدىزىن جاڭاجىلدىق كورپوراتيۆكە ەكىنىڭ ءبىرى شاقىرا بەرمەيدى، ويتكەنى قالتاسى كوتەرمەيدى. دەسەك تە، وسىنداي كەشتە تانىمال ءانشىنىڭ انىنە بيلەۋ ءۇشىن قانشا قاراجات كەرەكتىگى قىزىقتى.
توپتامامىزدى ەسترادانىڭ كوريفەيى روزا رىمبايەۆادان باستاساق. اندەرىمەن ەسىمى الەمگە تانىلعان روزا قۋانىش قىزى، سونداي-اق كينوعا دا ءتۇستى، ءىزباسارلار تاربيەلەپ جۇرگەن پەداگوگ، پروفەسسور جانە قازاقستاننىڭ التىن داۋىسى. روزا رىمبايەۆانىڭ ءبىر كەشتە ءان ايتقانى بۇگىندە 10 مىڭ ا ق ش دوللارى نەمەسە 4,6 ميلليون تەڭگە شاماسىندا تۇرادى. ال ەگەر باسقا قالاعا شاقىراتىن بولساڭىز، وندا ەكى ادامنىڭ جولىن، تاماعىن، قوناق ءۇيىن دە تولەۋگە تۋرا كەلەدى.
ميراس جۇگىنىسوۆ. دارىندى جاس ورىنداۋشىنىڭ اندەرى سوڭعى كەزدەرى ۇزدىكتەردىڭ قاتارىنان تۇسپەي كەلەدى. ماحاببات، سەزىم تۋرالى ليريكالىق تۋىندىلارى تىڭداۋشىلارىنىڭ جوعارى باعاسىن الدى، كەشتە ونىڭ «زىمىران»، «رومان»، «شىدا» جانە ت. ب. اندەرىن تىڭداۋ ءۇشىن 4,7 ميلليون تەڭگە تولەۋگە تۋرا كەلەدى.
قازاقستاندىقتاردىڭ سۇيىكتى ءانشىسى قايرات نۇرتاس «كەشىر مەنى»، «ەكەۋمىز»، «سەنى سۇيەم»، «انا»، «جانىم» جانە باسقا دا كوپتەگەن حيت-اندەردىڭ ورىنداۋشىسى. ول 10000 ا ق ش دوللارىنا نەمەسە 4,6 ميلليون تەڭگەگە ءان ايتۋعا دايىن. جۇلدىزدىڭ بارىپ-كەلۋ شىعىنىن دا شاقىرۋشى جاق كوتەرەدى.
قازاقستاندا تۋعان تانىمال رەپ ءارتىسى، بيتمەيكەر جانە پروديۋسەر Jah Khalib بۇگىندە شەتەلدە تانىمال جۇلدىز. «نا سۆوەي ۆولنە»، «ZNNKN» «Sunshine Lady»، «سوزۆەزديە انگەلا»، «مەلوديا»، «لەيلا»، «مەدينا»، «دجادۋا» ترەكتەرى جاستار اراسىندا حيت بولدى. سوندىقتان سايكەسىنشە جۇلدىزدى كەشكە شاقىرۋ ءۇشىن 60000 ا ق ش دوللارىن نەمەسە 27,4 ميلليون تەڭگە تولەۋ قاجەت.
ءانشى تورەعالي تورەالى جاڭا جىلدىق كورپوراتيۆتە 4,5 ميلليون تەڭگەگە ونەر كورسەتۋگە دايىن. ۇشاق بيلەتى، قوناق ۇيدە تۇرۋى مەن تاماقتانۋى بولەك تولەنۋى كەرەك. ول ساحناعا ەكى رەت شىعىپ، جالپى سەگىز ءان ورىنداماق.
ءانشى جانە اكتەر ايقىن تولەپبەرگەن ءىس-شارالاردا 2 ميلليون تەڭگەگە ءان ايتادى. سونداي-اق، رايدەرى بار جانە ەكى ادامنىڭ جول، قوناق ءۇي جانە باسقا شىعىنى دا شاقىرۋشى جاق ەسەبىنەن بولماق.
ءانشى، اكتريسا، كوپتەگەن تانىمال اندەردىڭ ورىنداۋشىسى ەركە ەسماحان جاقىندا عانا انا اتانعانىنا قاراماستان جاڭاجىلدىق كورپوراتيۆتە ءان ايتۋعا دايىن. جۇلدىزدى كەشكە شاقىرۋ قۇنى - 4 ميلليون تەڭگە.
«يرينا كايراتوۆنا» جاستار توبىن فەستيۆالدەر مەن اۋقىمدى ءىس-شارالاردان ءجيى كورۋگە بولادى. بۇل توپتىڭ اندەرى ەشكىمدى بەيجاي قالدىرمايدى. ال انشىلەردى كەشكە شاقىرۋ 50000 ا ق ش دوللارى نەمەسە 22,9 ميلليون تەڭگە شاماسىندا تۇرادى. بۇل مىندەتتى تۇرمىستىق جانە تەحنيكالىق رايدەردى ەسەپتەمەگەندە.
ءبىزدىڭ تىزىمدەگى تاعى ءبىر جاس ءانشى - Akha. ونىڭ «دۋرا»، «يانۆار»، «زاكرىۆايۋ گلازا»، «كاكايا تى كراسيۆايا» اندەرى بۇگىندە جاستار اراسىندا حيتكە اينالعان. Akha-نىڭ جەڭىل جانە جاعىمدى مۋزىكاسى اعا بۋىنعا دا ۇنايدى. ونىڭ كەشتە ءان ايتۋ قۇنى، رايدەردى ەسەپكە الماعاندا - 3 ميلليون تەڭگە.
جاس رەپەر Yenlik - جۇلدىزى ەندى جانعان جاس ارتىستەردىڭ ءبىرى. ول - ءوزىنىڭ «Dop»، «Shukir»، «ەsep» حيتتەرىنىڭ اۆتورى. رەپەر ءبىر كەشتە ءان ايتۋ ءۇشىن 3 ميلليون تەڭگە سۇرايدى، بۇدان باسقا رايدەرى بار.
اۆتور
اقەركە داۋرەنبەك قىزى
