سۆەتلانا جاقىپوۆا: جاستار شەتەلگە جالاقى از بولعاندىقتان كەتىپ جاتقان جوق
استانا. KAZINFORM - ەڭبەك جانە حالىقتى الەۋمەتتىك قورعاۋ ءمينيسترى سۆەتلانا جاقىپوۆا جوعارى ءبىلىمى بولسا دا شەتەلدە قارا جۇمىس ىستەپ جۇرگەن قازاقستاندىق جاستار تۋرالى پىكىر ءبىلدىردى.
«قازاقستان جىل سايىن شەتەلدىك جۇمىس كۇشىنە 20 مىڭنان استام كۆوتا ءبولىپ كەلەدى. سوعان قاراماستان ءوز ازاماتتارىمىز ۇلى بريتانياعا بارىپ قارعا ۇركىتىپ، وڭتۇستىك كورەياعا بارىپ قارا جۇمىس ىستەپ ءجۇر. مۇنى ەڭبەك مينيسترلىگى قالاي باعالايدى؟ قالىپتى جاعداي ما، الدە ەڭبەك قاتىناستارى رەتتەلمەگەنىنىڭ كورىنىسى مە؟» - دەپ سۇرادى جۋرناليست.
مينيستر مۇنى قالىپتى جاعداي دەپ قابىلدايتىنىن ايتتى.
«ءبىز مۇنى پروبلەما دەپ قابىلدامايمىز. نەگىزى ءار ازامات قاي جەردە جۇمىس ىستەسە دە قۇقىلى. شەكتەۋ جاسامايمىز. قازاقستان جاستارىنا شەكتەۋ قويمايمىز. ءبىزدىڭ باستى ماقساتىمىز - ەڭبەك نارىعىندا جاعداي جاساۋ. جاڭا جۇمىس ورىندارى ساپالى بولسا، سوندا قازاقستاندىق جاستار قازاقستاندا قالادى. جاستار شەتەلگە جالاقى از بولعاندىقتان كەتىپ وتىر دەپ ايتۋعا بولمايتىن شىعار. مەن سىزگە ءوز باسىمداعى جاعدايدى ايتايىن. مەنىڭ جاقىن تۋىسىمنىڭ بالاسى جوعارى وقۋ ورنىن بىتىرگەنىنە قاراماستان، ۇلى بريتانياعا ءسىز ايتىپ وتىرعانداي پلانتاتسيادا جۇمىس ىستەۋگە كەتتى. ءبارىمىز نارازى بولدىق. «اكە-شەشەڭدى تاستاپ قالاي ۇلى بريتانياعا كەتىپ باراسىڭ؟» - دەدىك. «جوق، مەن ەل كورەم» دەپ كەتتى. قازىر سول ەلدە جارتى جىلدىڭ ىشىندە وقۋعا ءتۇستى. سونى بىتىرگەن سوڭ ەلگە ورالماقشى. سوندىقتان ەكى كورىنىس. سول جاقتا ءبىلىم الىپ، ەلدىڭ وزگەرۋىنە ۇلەس قوسسا، تاماشا بولادى. ال ەگەر «قازاقستاننان مۇلدەم كەتەم، ۇنامايدى»، - دەگەن، ەندى وعان ءبىز نارازىمىز. مىسالى سىزدەرگە تانىستىرعان ەلەكتروندى ەڭبەك بيرجاسىنداعى ساپالى جۇمىستاردىڭ سانىن 2 ميلليوننان 3,8 ميلليونعا دەيىن جەتكىزەمىز. ول دەگەن ايلىعى مەديانالىق جالاقىدان، ياعني، 350 مىڭ تەڭگەدەن كەم ەمەس جۇمىس دەگەن ءسوز»، - دەدى سۆەتلانا جاقىپوۆا.
