ستاتي ءىسىن رەتتەۋ ۇلتتىق قورعا قالاي اسەر ەتتى
استانا. KAZINFORM - ۇلتتىق بانك ستاتي ءىسىنىڭ تۇپكىلىكتى رەتتەلۋى ۇلتتىق قوردىڭ اكتيۆتەرىنە قالاي اسەر ەتكەنىن ءمالىم ەتتى.
- رەتتەۋ ناتيجەسىندە ۇلتتىق بانك ستاتي تاراپتارىنىڭ ق ر ۇلتتىق قورىنىڭ اكتيۆتەرىنە قويعان تالاپتارىنان باس تارتۋىنا جانە شۆەتسيادا قامتاماسىز ەتۋ شارالارىنىڭ ىقپالىندا بولعان ۇلتتىق قور اكتيۆتەرىن ءوز يەلىگىنە قايتارۋعا قول جەتكىزدى، - دەپ جازدى ۇلتتىق بانكتىڭ رەسمي سايتى.
ۇلتتىق بانك مالىمەتىندە بۇل جايتتار ۇلتتىق قور كىرىستىلىگىنە وڭ اسەر ەتەتىنى ايتىلعان.
- بۇل ق ر ۇلتتىق قورىنىڭ ۇزاق مەرزىمدى كىرىستىلىگىن جاقسارتۋ ءۇشىن جاعداي جاساۋعا ىقپال ەتەتىن وپەراتسيالىق يكەمدىلىكتى ارتتىرۋعا جانە الەۋەتتى ينۆەستيتسيالىق سەرىكتەستەردىڭ بارىنشا كەڭ اۋقىمىن تارتۋعا جاڭا مۇمكىندىكتەر اشادى، - دەلىنگەن رەسمي اقپاراتتا.
سونداي-اق اعايىندى ستاتيلەر مەن قازاقستان تاراپىنىڭ اراسىنداعى داۋدى تۇپكىلىكتى رەتتەۋ كەلىسىمىنىڭ ناقتى شارتتارى جاسىرىن ەكەنى ايتىلعان.
بۇعان دەيىن ادىلەت مينيسترلىگى ستاتي ءىسىنىڭ توڭىرەگىندەگى كوپجىلدىق داۋ قازاقستان تارابى ءۇشىن ءساتتى رەتتەلگەنىن حابارلاعان ەدى.
ەسكە سالساق، 2021-جىلدىڭ قاراشا ايىندا ۇلتتىق بانك ۇلتتىق قوردىڭ 536 ميلليون دوللارداي اكتيۆى قايتارىلعانىن حابارلاعان بولاتىن. الايدا ەكى تاراپ تۇپكىلىكتى ىمىراعا كەلگەنگە دەيىن ستاتي تارابى ءتۇرلى ينستانتسيالاردا اتالعان اكتيۆتى قايتا بۇعاتتاۋ تۋرالى تالاپتار قويىپ كەلگەن ەدى. Bank New York Mellon بانكىندە جاتقان بۇل اكتيۆ ستاتي تارابىنىڭ تالاپ-ارىزى بويىنشا 2018-جىلدىڭ مامىر ايىندا بۇعاتتالعان بولاتىن.
