ستامبۋلدىڭ تاكسيم الاڭىنداعى شەرۋدە 200 دەن استام ادام ۇستالدى
استانا. KAZINFORM - تۇركيا پوليتسياسى ستامبۋلدا 1-مامىرداعى شەرۋدى تاراتتى. ول جەردەن 200 دەن استام ادام ۇستالدى. بۇل تۋرالى BBC جازدى.
«ستامبۋلدا ءبىزدىڭ ەسكەرتۋلەرىمىزگە قۇلاق اسپاي، تاكسيم الاڭىنا بارىپ، 1-مامىر ەڭبەك جانە ىنتىماق كۇنى پوليتسيا قىزمەتكەرلەرىنە شابۋىل جاساماق بولعان 210 ادام ۇستالدى»، - دەپ جازدى ىشكى ىستەر ءمينيسترى الي ەرليكايا X الەۋمەتتىك جەلىسىندە.
بۇعان دەيىن تۇرىك ارنايى جاساعى الاڭعا جاقىنداعان دەمونسترانتتاردى تاراتۋ ءۇشىن كوزدەن جاس اعىزاتىن گاز بەن رەزەڭكە وقتاردى قولدانعان. كەيبىر شەرۋشىلەر توسقاۋىلدى بۇزىپ وتپەك بولعان پوليتسيا قىزمەتكەرلەرىنە تاس لاقتىرعان.
ساياسي پارتيالاردىڭ وكىلدەرى مەن كاسىپوداق مۇشەلەرى سارسەنبى كۇنى تاڭەرتەڭ ساراچان اۋدانىندا جينالىپ، ينفلياتسيانىڭ وسۋىنە جانە ەكونوميكالىق قيىندىقتارعا نارازىلىق ءبىلدىرۋ ءۇشىن تاكسيم الاڭىنا شەرۋگە شىقتى.
ستامبۋل بيلىگى قاۋىپسىزدىك ماقساتىندا تاكسيم الاڭىندا شەرۋ وتكىزۋگە تىيىم سالدى.
