ۇستالعان «سامۇرىق-قازىنا» باسشىسىنىڭ ءۇش جىلدىق كىرىسى بەلگىلى بولدى
استانا. قازاقپارات – سىبايلاس جەمقورلىققا قاتىستى كۇدىكپەن ۇستالعان «سامۇرىق-قازىنا» قورىنىڭ باسقارما ءتوراعاسى نۇرلان جاقىپوۆتىڭ كەيىنگى جىلدارداعى تابىسى بەلگىلى بولدى.
ونىڭ سالىق دەكلاراتسيالارىندا ءۇش جىل ىشىندە 800 ميلليون تەڭگەدەن استام كىرىس كورسەتىلگەن، دەپ حابارلايدى Tengrinews.kz سايتى.
ءۇش جىلدا قانشا تابىس تاپقان؟
نۇرلان جاقىپوۆتىڭ 2022-2024-جىلدارداعى سالىق دەكلاراتسيالارىندا جالپى سوماسى 806 ميلليون تەڭگەدەن استام كىرىس كورسەتىلگەن.
ەڭ جوعارى كورسەتكىش 2022-جىلى تىركەلگەن. سول جىلى ول 422 ميلليون 182 مىڭ تەڭگە تابىسىن دەكلاراتسيالاعان.
ال 2023-جىلى بۇل سوما ەكى ەسەدەن استام ازايىپ، 186 ميلليون 543 مىڭ 551 تەڭگەنى قۇراعان.
2024-جىلى دەكلاراتسيالانعان كىرىس 197 ميلليون 259 مىڭ 412 تەڭگەگە جەتكەن. بۇل الدىڭعى جىلمەن سالىستىرعاندا شامامەن 10,7 ميلليون تەڭگەگە كوپ بولعانىمەن، 2022-جىلعى كورسەتكىشتەن الدەقايدا تومەن.
ايتا كەتەيىك، دەكلاراتسيادا كورسەتىلگەن سومالارعا جاقىپوۆتىڭ جالاقىسى كىرمەيدى. سەبەبى جالاقىدان سالىقتى جۇمىس بەرۋشى ۇستاپ قالادى. ال دەكلاراتسيانىڭ بۇل بولىگىندە ازاماتتىڭ ءوزى سالىق تولەۋگە ءتيىس وزگە دە كىرىستەرى كورسەتىلەدى.
قاي جىلدارى قانداي قىزمەت اتقارعان؟
نۇرلان جاقىپوۆ 2022-جىلى Kazakhstan Investment Development Fund Management Company كومپانياسىنىڭ باسقارما ءتوراعاسى بولعان. ونىڭ دەكلاراتسياسىنداعى ەڭ جوعارى كىرىس تە وسى كەزەڭگە سايكەس كەلەدى.
2023-جىلدىڭ ساۋىرىندە ول «سامۇرىق-قازىنا» ۇلتتىق ءال-اۋقات قورىنىڭ باسقارما ءتوراعاسى بولىپ تاعايىندالدى. سول جىلى دەكلاراتسيالانعان تابىسى ايتارلىقتاي ازايعان.
ال 2025-جىلعا قاتىستى دەكلاراتسيا دەرەكتەرى ازىرگە جاريالانعان جوق.
نۇرلان جاقىپوۆ نە ءۇشىن ۇستالدى؟
بۇعان دەيىن استاناداعى Atlant تۇرعىن ءۇي كەشەنىنىڭ ماڭىندا دوللار كۋپيۋرالارى شاشىلىپ جاتقان ۆيدەو الەۋمەتتىك جەلىدە تاراعان ەدى. كادرلاردان جەردە جاتقان اقشا بۋمالارىن، چەموداندار مەن سومكەلەردى كورۋگە بولادى.
كەيىن ۇلتتىق قاۋىپسىزدىك كوميتەتى 11-قاراشادا سىبايلاس جەمقورلىققا قارسى ءىس-قيمىل قىزمەتى «سامۇرىق-قازىنا» قورىنىڭ باسقارما ءتوراعاسى نۇرلان جاقىپوۆتى، «قازاقستان تەمىر جولى» باسشىسى ەلجاس وتىنشيەۆتى جانە وزگە دە تۇلعالاردى ۇستاعانىن حابارلادى.
ولار سىبايلاس جەمقورلىققا قاتىستى قىلمىس جاسادى دەگەن كۇدىككە ىلىنگەن.
الايدا تۇرعىن ءۇي كەشەنى ماڭىنان تابىلعان اقشانىڭ اتالعان تۇلعالاردىڭ ۇستالۋىنا قاتىسى بار-جوعى ازىرگە ناقتىلانباعان.
