سۋرەتتەرىم وسكەلەڭ ۇرپاققا رۋحاني تاربيە بەرسە دەيمىن-پالۋانداردى بەينەلەيتىن ەركىن قايشىبەك
قازاقتان شىققان الەمگە تانىمال پالۋانداردىڭ سۋرەتىن سالاتىن بىردەن-ءبىر سۋرەتشى-ەركىن قايشىبەك، دەپ حابارلايدى Kazinform.
ق ر سۋرەتشىلەر وداعىنىڭ مۇشەسى ەركىن قايشىبەك الىپ كۇش يەلەرى بولعان قاجىمۇقان مۇڭايتپاس ۇلى، ءيمانجۇسىپ قۇتپان ۇلى، بالۋان شولاقتان بولەك، وليمپيادا چەمپيوندارى جاقسىلىق ۇشكەمپىروۆ، ءشامىل سەرىكوۆ، ك س ر و، الەم، ەۋروپا چەمپيونى داۋلەت تۇرلىحانوۆ، ونى تاربيەلەپ وسىرگەن اكەسى بولات تۇرلىحانوۆتىڭ، باسقا دا كۇرەس شەبەرلەرىنىڭ بەينەلەرىن سومداپ، سۋرەتتەرىن سالعان. سۋرەتشىنىڭ تۋىندىلارى جوعارىدا اتالعان ەسىمدەردىڭ ونەگەلى ءومىرىن وسكەلەڭ ۇرپاققا ناسيحاتتاۋعا ارنالعان.
وقىرمانعا تۇسىنىكتى بولۋ ءۇشىن ەركىن قايشىبەكتىڭ كىم ەكەنىن ايتا كەتەيىك.
ەركىن بازارعالي ۇلى قايشىبەك- 196-جىلى 28-ساۋىردە الماتى وبلىسى رايىمبەك اۋدانىنىڭ قاينار اۋىلىندا ومىرگە كەلگەن. 1982-جىلى اباي اتىنداعى قازپي- ءدىڭ كوركەمسۋرەت-گرافيكا فاكۋلتەتىن بىتىرگەن. ۇزاق جىلدار اتالمىش ينستيتۋتتا اعا وقىتۋشى بولىپ ەڭبەك ەتتى. اباي اتىنداعى قازۇپۋ-دىڭ ونەر، مادەنيەت جانە سپورت ينستيتۋتى ديرەكتورىنىڭ تاربيە جۇمىسى جونىندەگى ورىنباسارى بولدى. بۇگىندە ۋنيۆەرسيتەت مۇراجايىنىڭ مەڭگەرۋشىسى بولىپ ەڭبەك ەتەدى. ق ر سۋرەتشىلەر وداعىنىڭ مۇشەسى.
جاقىندا سۋرەتشىنى اڭگىمەگە تارتقان ەدىك. كەيىپكەرىمىز كۇرەس جانە پالۋاندار تاقىرىبىندا سۋرەتتەردى سالا باستاعانىنا شامامەن ون جىل ۋاقىت بولعانىن ايتتى.
“بۇعان دەيىن باسقا دا ناتيۋرمورت، پەيزاج، پورترەتتەردى، اڭشىلىق تاقىرىبىندا سۋرەتتەردى سالعانمىن. مەنىڭ سۋرەتتەرىم كەنەپ بەتىندە مايلى بوياۋمەن سالىنعان. جەكە شەبەرحانام جوق، ءوزىم قىزمەت ەتىپ جۇرگەن ۋنيۆەرسيتەتتىڭ اۋديتورياسىن شەبەرحانا رەتىندە پايدالانامىن. مەن قانافيا تەلجانوۆ، ساليحاددين ايتپايەۆ، جاڭاتاي شاردەنوۆ سەكىلدى قازاق سۋرەتشىلەرىن الەمدەگى ەڭ مىقتى سۋرەتشىلەردىڭ قاتارىنا كىرەدى دەپ ايتا الامىن»، - دەيدى ەركىن قايشىبەك.
ونىڭ ايتۋىنشا، جاقسى سۋرەتشى بولۋ ءۇشىن الدىمەن سۋرەت سالۋدى جاقسى كورۋ كەرەك، ماڭايىڭداعى قورشاعان الەمگە عاشىق بولۋ كەرەك، ونى شىنايى تازا كوزقاراسپەن قابىلداعان دۇرىس.
«سۋرەت سالۋ بارىسىندا ەرەكشە ءبىر الەمگە كىرەسىڭ. نەشە ءتۇرلى الاساپىران كۇي كەشەسىڭ، كەيىن سالعان سۋرەتىڭ ءوز ويىڭنان شىقسا، ودان ەرەكشە ءلاززات الاسىڭ. ۇستاز سۋرەتشى رەتىندە مەنىڭ سالعان ءاربىر كارتينامنىڭ تاربيەلىك ءمانى بولۋى كەرەك دەپ سانايمىن. سول سەبەپتى سۋرەتتەگى كەيىپكەرلەرىم وسكەلەڭ ۇرپاققا ۇلگى بولىپ، باي رۋحاني تاربيەنى بەرۋىن قالايمىن. جالپى، سۋرەت سالۋ ادامعا ەستەتيكالىق، مادەني تاربيە بەرەدى جانە وبرازدىق، شىعارماشىلىق ويلاۋ قابىلەتىنىڭ دامۋىنا جاقسى اسەر ەتەدى”، - دەيدى سۋرەتشى.
ەركىن قايشىبەكتىڭ ءبىر ۇل، ءبىر قىزى جانە ەكى نەمەرەسى بار.
“وتباسىما كەلسەك ءبىر ۇل، ءبىر قىزىم، ەكى نەمەرەم بار. ولاردىڭ قايسىسى مەن سەكىلدى سۋرەتشى بولعىسى كەلەتىنىڭ بىلمەدىم. قازىر الماتىدا تۇرىپ جاتىرمىن. اباي اتىنداعى قازاق ۇلتتىق پەداگوگيكالىق ۋنيۆەرسيتەتىنىڭ مۇراجايىنىڭ مەڭگەرۋشىسى بولىپ ەڭبەك ەتىپ ءجۇرمىن. سۋرەت سالۋدان بولەك سپورتپەن شۇعىلدانامىن”،-دەدى كەيىپكەرىمىز.
ايتا كەتەيىك، ەركىن قايشىبەكتىڭ سالعان كۇش اتاسى قاجىمۇقاننىڭ پورترەتتەرى جانە پالۋاننىڭ ءومىر تاريحىنان سىر شەرتەتىن كارتينالارى تۇركىستان وبلىسىنىڭ قاجىمۇقان مۇڭايتپاسوۆ اتىنداعى سپورت مۇراجايىنا قويىلعان. سونىمەن قاتار، جاقىندا الماتىدا كۇرەس سپورتى شەبەرلەرىنىڭ بەينەلەرى سومدالعان كورمەسى وتكەن ەدى.
ق ر سۋرەتشىلەر وداعىنىڭ مۇشەسى ەركىن قايشىبەك ق ر ءبىلىم جانە عىلىم مينيسترلىگىنىڭ العىس حات، قۇرمەت گراموتالارى جانە مەدالدارىمەن ماراپاتتالعان.
اۆتور
دۋمان ارعىنگەلدى
