Spacex زىمىرانى ايعا سوعىلۋى مۇمكىن

پولشا بەلارۋسپەن شەكاراسىنا قابىرعا ورناتىپ جاتىر. ارمەنيا پرەزيدەنتى ارمەن ساركيسيان وتستاۆكاعا كەتتى.

ال پەرۋ تۇرعىندارى جاپپاي شاشتارىن الدىرتىپ جاتىر.

SpaceX زىمىرانى ايعا سوعىلۋى مۇمكىن. استرونومدار عارىشتا جەتى جىلعا جۋىق قالىقتاعان SpaceX زىمىرانى باقىلاۋدى جوعالتىپ، ايمەن سوقتىعىسۋ جولىندا ەكەنىن انىقتادى. ەستەرىڭىزدە بولسا، Falcon 9 زىمىران تاسىعىشى فلوريدادان 2015 -جىلدىڭ اقپان ايىندا ا ق ش- تىڭ ۇلتتىق مۇحيتتىق جانە اتموسفەرالىق باسقارماسىنا اۋا رايى سپۋتنيگىن جىبەرۋ ميسسياسى اياسىندا ۇشىرىلعان ەدى. الايدا ۇزاق ۋاقىت بويى جانعان قوزعالتقىشتاردىڭ ءبىرى ىستەن شىققانى انىقتالدى. دەسە دە، كەي ساراپشىلار سوقتىعىسۋ عىلىم ءۇشىن قۇندى مالىمەتتەر بەرە الادى دەپ سانايدى.

مەتەورولوگ ەريك بەرگەر بۇل وقيعا «زىمىراننىڭ سوققىسى ناتيجەسىندە لاقتىرىلعان جەر استى ماتەريالىن» بايقاۋعا مۇمكىندىك بەرەتىنىنە سەنىمدى.

پولشا مەن بەلارۋس شەكاراسىنا قابىرعا سالىنىپ جاتىر

پولشا، بەلارۋسپەن اراداعى شەكاراعا، تەمىر قورشاۋ ورناتىپ جاتىر. بۇعان 394 ميلليون دوللار بولگەن. ماقسات - سىرتتان كەلەتىن ميگرانتتارعا توسقاۋىل قويۋ. جوبا بويىنشا بەلارۋسپەن اراعا 180 شاقىرىمدىق، ال بيىكتىگى 5 جارىم مەتر بولاتىن قورعان تۇرعىزىلماق. ءبىراق تابيعات قورعاۋشىلار، بۇل ميگرانتتاردى توقتاتپايدى، تەك ورمانعا زيان كەلتىرەدى دەيدى. بىلتىر جاز ايىندا بەلارۋستان پولشا ارقىلى ەۋروپاعا مىڭداعان ميگرانت وتپەك بولىپ، دۇربەلەڭ تۋعىزدى. رەسمي بريۋسسەل بۇل جونىندە، مينسك بوسقىنداردى ەۋرووداق ەلدەرىندەگى جاعدايدى تۇراقسىزداندىرۋ ءۇشىن، ادەيى باعىتتاپ جاتىر دەپ ايىپتاعان ەدى.

ارمەنيا پرەزيدەنتى وتستاۆكاعا كەتتى

ارمەنيا پرەزيدەنتى ارمەن ساركيسيان وتستاۆكاعا كەتتى.

«مەن وتە ۇزاق ويلاندىم جانە ءتورت جىلعا جۋىق بەلسەندى جۇمىستان كەيىن ارمەنيا پرەزيدەنتى قىزمەتىنەن كەتۋ تۋرالى شەشىم قابىلدادىم. بۇل مۇلدەم ەموتسيونالدى شەشىم ەمەس جانە بەلگىلى ءبىر لوگيكادان تۋىندايدى»، - دەدى ساركيسيان ءوز مالىمدەمەسىندە.

ول «ەل مەن ۇلت ءۇشىن قازىرگى كۇردەلى كەزەڭدە ىشكى جانە سىرتقى ساياساتتىڭ ىرگەلى ۇدەرىستەرىنە اسەر ەتۋ ءۇشىن پرەزيدەنتتە قاجەتتى قۇرالدار جوق» دەپ اتاپ ءوتتى.

ساركيسيان ارمەنيا پارلامەنتىنىڭ پرەزيدەنتى بولىپ 2018 -جىلدىڭ ناۋرىز ايىنىڭ باسىندا سايلانعان بولاتىن. ساياسي مانسابىندا ول پرەمەر- مينيستر، ارمەنيانىڭ بەلگياداعى، ليۋكسەمبۋرگتەگى، ۆاتيكانداعى جانە ۇلىبريتانياداعى ەلشىسى قىزمەتتەرىن دە اتقاردى. بريۋسسەلدەگى تارتىپسىزدىكتەر

بريۋسسەلدە سانيتارلىق شەكتەۋلەرگە قارسى بەيبىت ميتينگ سوڭى پوليتسيامەن قاقتىعىسقا ۇلاستى. بىرنەشە عيمارات قيرادى. قۇقىق قورعاۋشىلار ەرەۋىلشىلەردى تاراتۋ ءۇشىن كوز جاساۋراتاتىن گاز بەن سۋ شاشاتىن قۇرىلعىلاردى پايدالاندى. سوعان قاراماستان، شەرۋگە قاتىسقاندار بەلگيا استاناسىنداعى ەۋروپالىق كۆارتالدا ورنالاسقان جەكەلەگەن اكىمشىلىك عيماراتتاردى، قوعامدىق تاماقتانۋ ورىندارى مەن مەترونىڭ كىرەبەرىسىن تالقانداپ ۇلگەرگەن. بۇدان بولەك، ەۋروپالىق سىرتقى ارەكەت قىزمەتىنىڭ كەڭسەسىنە شابۋىل جاساعان.

بريۋسسەل پوليتسياسى تارتىپسىزدىككە قاتىسقان 70 كە جۋىق ادامدى ۇستادى. وننان استام ازامات، سونىڭ ىشىندە ءۇش پوليتسەي اۋرۋحاناعا ءتۇستى.

پەرۋدە جۇرت جاپپاي شاش الدىرا باستادى

پەرۋ تۇرعىندارى ەكولوگيالىق اپات سالدارىن جويۋ ءۇشىن جاپپاي شاش الدىرىپ جاتىر. وسىلايشا جەرگىلىكتى حالىق مۇحيتتى تازالايتىن قۇرال جاساماق نيەتتە. بيلىك وكىلدەرىنىڭ ايتۋىنشا مۇنىڭ پايداسى شامالى. كەرىسىنشە، جينالعان شاش سۋدا قوقىستى كوبەيتىپ، قورشاعان ورتاعا زيانىن تيگىزۋى مۇمكىن.

15- قاڭتاردا پەرۋ استاناسى ليما ماڭىندا سۋعا 6 مىڭ باررەل مۇناي توگىلىپ، شيكىزات مۇحيتقا جايىلعان بولاتىن. ەلدە وسى وقيعاعا بايلانىستى 3 ايعا ەكولوگيالىق توتەنشە جاعداي جاريالاندى. قازىر اپات ايماقتارىندا مۇنايدى تازالاۋ بويىنشا اۋقىمدى وپەراتسيا جۇرگىزىلىپ جاتىر.

www.24.kz