SpaceX زىمىران ۇشىرۋ بويىنشا پەنتاگوننىڭ ەڭ ءىرى مەردىگەرىنە اينالدى
استانا. KAZINFORM - ا ق ش قورعانىس مينيسترلىگى 2030-جىلداردىڭ باسىنا دەيىن ۇلتتىق قاۋىپسىزدىك مۇددەسى ءۇشىن ۇشىرىلىمداردى جۇزەگە اسىرۋ ءۇشىن SpaceX،United Launch Alliance (ULA) جانە Blue Origin سياقتى ءۇش جەكە كومپانيامەن جالپى سوماسى 13,7 ميلليارد دوللار بولاتىن كەلىسىمشارتقا قول قويدى. بۇل تۋرالى ا ق ش عارىش كۇشتەرى حابارلادى.
كەلىسىمشارتتار قۇراما شتاتتاردىڭ عارىشقا كەپىلدىك بەرىلگەن قولجەتىمدىلىگىن قامتاماسىز ەتۋگە باعىتتالعان ۇلتتىق قاۋىپسىزدىك عارىشتىق ۇشىرۋ (NSSL Phase 3 Lane 2) باعدارلاماسى بويىنشا بەرىلەدى. پەنتاگوننىڭ ماڭىزدى اكتيۆتەرىن وربيتاعا جەتكىزۋگە باعىتتالعان كەلىسىمدەر شامامەن 54 ميسسيانى قامتيدى. ميسسيالار 2027 جانە 2032 -جىلدار ارالىعىندا ىسكە قوسىلادى دەپ جوسپارلانعان.
- سەنىمدى جانە تۇراقتى عارىشتىق ۇشىرۋ ارحيتەكتۋراسى ءبىزدىڭ ەكونوميكالىق وركەندەۋىمىزدىڭ دە، ۇلتتىق قاۋىپسىزدىگىمىزدىڭ دە نەگىزى. «ۇلتتىق قاۋىپسىزدىك عارىشتىق ۇشىرۋ - جاي عانا باعدارلاما ەمەس، بۇل ءبىزدىڭ جاۋىنگەرلەرىمىز سوعىسىپ، جەڭىسكە جەتۋ ءۇشىن قاجەت عارىش مۇمكىندىكتەرىن بەرەتىن ستراتەگيالىق مىندەت»، - دەدى ا ق ش عارىش كۇشتەرى عارىش وپەراتسيالارىنىڭ باستىعى گەنەرال چەنس زالتسمان.
SpaceX كەلىسىم-شارتتاردىڭ ەڭ ۇلكەن بولىگىن، قۇنى 5,9 ميلليارد دوللار بولاتىن 28 ميسسيانى جەڭىپ الدى، بۇل ا ق ش ارمياسىنىڭ سپۋتنيكتەردى ۇشىرۋ جانە باسقا دا ستراتەگيالىق ميسسيالار بويىنشا نەگىزگى مەردىگەرى رەتىندەگى پوزيتسياسىن ودان ءارى نىعايتتى.
Boeing جانە Lockheed Martin بىرلەسكەن كاسىپورنى سانالاتىن United Launch Alliance كومپانياسىنىڭ دا ايتارلىقتاي ۇلەسى بار، ونىڭ 19 ميسسياسى 5,3 ميلليارد دوللاردى قۇرايدى. كومپانيا ناۋرىز ايىندا سەرتيفيكاتتالعان جاڭا Vulcan زىمىرانىمەن جۇمىس ىستەيدى.
العاش رەت دجەفف بەزوستىڭ Blue Origin NSSL باعدارلاماسىنا قوسىلدى. بۇل كومپانيا ءۇشىن ماڭىزدى كەزەڭ: قاڭتار ايىندا ءبىر رەت ۇشىرىلعان جانە پايدالانۋ تاجىريبەسى از بولعان ونىڭ New Glenn زىمىرانىنا قۇنى 2,3 ميلليارد دوللار بولاتىن جەتى ميسسيالىق كەلىسىمشارت بەرىلدى.
جاڭا كەزەڭدە SpaceX،ULA جانە Blue Origin ستاندارتتى جانە كۇردەلى ميسسيالاردى ورىندايدى.
SpaceX عارىش كەمەسى العاش رەت جەردىڭ پوليارلىق ايماقتارىنىڭ ۇستىنەن ۇشاتىنى بۇعان دەيىن حابارلانعان بولاتىن.
