سەناتورلار ايەلدەردى قولداۋعا ارنالعان «باقىتتى وتباسى» ورتالىعىنىڭ قىزمەتىمەن تانىستى

استانا. KAZINFORM - سەنات ءتوراعاسى ماۋلەن اشىمبايەۆ پالاتانىڭ ءبىر توپ دەپۋتاتىمەن بىرگە ايەلدەرگە ارنالعان «باقىتتى وتباسى» ءبىلىم جانە اقپاراتتىق-كونسۋلتاتسيالىق ورتالىعىنا باردى، دەپ حابارلايدى سەناتتىڭ باسپا ءسوز قىزمەتى.

ورتالىقتىڭ جەتەكشىسى ىرزا تۇرسىنزادا «باقىتتى وتباسى»، ءبىرىنشى كەزەكتە، كوپ بالالى، مۇمكىندىگى شەكتەۋلى بالا تاربيەلەپ وتىرعان، جۇمىسسىز، قيىن جاعدايعا تاپ بولعان جانە جالعىزباستى انالارعا جان-جاقتى قولداۋ كورسەتەتىن پلاتفورما ەكەنىن ايتتى. مەكەمەدە مامانداندىرىلعان كابينەتتەر جۇمىس ىستەيدى. سونداي-اق كونديتەرلىك ءىس، توقىما، اعىلشىن ءتىلى، جۇمساق ويىنشىقتار تىگۋ جانە تاعى باسقا كاسىپ تۇرلەرىن ۇيرەتەتىن تەگىن كۋرستار قاراستىرىلعان. مۇنىڭ ءبارى ايەلدەرگە ءوزىن ءوزى دامىتۋعا جانە جەكە كاسىبىن باستاۋعا جول اشاتىن قادامدار ەكەنى ءسوزسىز.

ماۋلەن اشىمبايەۆ ايەلدەر قۇقىعىن قورعاۋدا جانە ينكليۋزيۆتى قازاقستان قالىپتاستىرۋدا وسىنداي ورتالىقتاردىڭ ماڭىزى زور ەكەنىن اتاپ ءوتتى. سونداي- اق مۇگەدەكتىگى بار ادامداردى قولداۋعا جانە ولاردى وڭالتۋعا، اتالعان ساناتتاعى ازاماتتاردىڭ قوعام ومىرىنە بەلسەندى ارالاسىپ، جۇمىسپەن قامتىلۋىنا ارنالعان شارالاردىڭ بەرەرى مول ەكەنى ايتىلدى.

«پرەزيدەنتىمىز قاسىم-جومارت كەمەل ۇلى توقايەۆتىڭ تاپسىرماسى بويىنشا وتباسى ينستيتۋتىن نىعايتۋعا، ايەلدەر مەن بالالاردىڭ قۇقىقتارىن قورعاۋعا ارنالعان زاڭدار ازىرلەنىپ، قابىلداندى. وسى زاڭدار ارقىلى مەملەكەتتىك وتباسى ساياساتىن قالىپتاستىرۋعا جاۋاپتى ۋاكىلەتتى ورگاننىڭ مارتەبەسى ايقىندالدى. ومىردە قيىن جاعدايعا ۇشىراعان وتباسىلاردى قولداۋعا ارنالعان ەرەجەلەر دە قاراستىرىلدى. سونداي-اق ايەلدەر مەن بالالارعا قارسى قىلمىستىڭ جاۋاپكەرشىلىگى كۇشەيتىلدى. مەملەكەت باسشىسى بەلگىلەپ بەرگەن وسى باعىتتاعى مىندەتتەردى ىسكە اسىرۋدا «باقىتتى وتباسى» سياقتى ورتالىقتار ماڭىزدى ءرول اتقارادى. الداعى ۋاقىتتا ءبىزدىڭ بىرلەسكەن جۇمىسىمىز مۇمكىندىگى شەكتەۋلى ازاماتتارعا جايلى جاعداي جاساۋعا جانە وتباسى ينستيتۋتىن نىعايتۋعا تىڭ سەرپىن بەرەدى دەپ سەنەمىز»، - دەدى ماۋلەن اشىمبايەۆ.

ءىس-شارا سوڭىندا ورتالىق باسشىسى جاڭا باستامالارعا قولداۋ ءبىلدىرىپ، ىنتىماقتاستىق تانىتقانى ءۇشىن سەناتورلارعا العىس ايتتى. سونداي-اق ول الداعى جوسپارلارىنا توقتالىپ، الەۋمەتتىك كاسىپكەرلىكتى دامىتۋعا ارنالعان جاڭا ۇسىنىستارىن اتاپ ءوتتى.