سەناتورلار ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتەتىن زاڭدى قارايدى

استانا. KAZINFORM - سەنات سپيكەرى ماۋلەن اشىمبايەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار سالالىق كوميتەتتەردىڭ وسى اپتاداعى ءىس-شارالارىن جانە 11-ساۋىردە وتەتىن سەنات وتىرىسىنىڭ كۇن ءتارتىبىن بەكىتتى.

وتىرىستى اشقان ماۋلەن اشىمبايەۆ مەملەكەت باسشىسى سۋ تاسقىنى سالدارىنان قالىپتاسقان اۋىر جاعدايعا بايلانىستى ۇندەۋىندە بەلگىلەپ بەرگەن مىندەتتەرگە توقتالدى.

«ون وبلىستا توتەنشە جاعداي جاريالاندى. پرەزيدەنتىمىز سۋ تاسقىنى سالدارىمەن كۇرەسۋگە ناقتى تاپسىرمالار بەردى. سونداي-اق، زارداپ شەككەن ازاماتتاردىڭ شىعىندارى تولىق وتەلەتىنىن ايتتى. پالاتامىز دا، ءوز تاراپىنان تاسقىنمەن كۇرەسكە كومەك كورسەتۋدە. ءبىر توپ سەنات دەپۋتاتى زارداپ شەككەن وڭىرلەرگە بارىپ، جەرگىلىكتى بيلىككە جانە تۇرعىندارعا قولعابىس كورسەتۋدە. وسىنداي سىن-ساعاتتا بارشا قوعام بولىپ بىرلەسىپ، توتەنشە جاعدايدىڭ سالدارىمەن كۇرەسكە جۇمىلۋ اسا ماڭىزدى»، - دەدى سەنات ءتوراعاسى.

ءىس-شارا بارىسىندا سەناتورلار پالاتا وتىرىسىنىڭ كۇن ءتارتىبىن بەكىتتى. سوعان سايكەس الداعى بەيسەنبىدە دەپۋتاتتار «قر كەيبىر زاڭنامالىق اكتىلەرىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى جانە وعان ىلەسپە «ق ر اكىمشىلىك قۇقىق بۇزۋشىلىق تۋرالى كودەكسىنە ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ءبىرىنشى وقىلىمدا قارايدى. بۇل زاڭدار وتباسىلىق-تۇرمىستىق جانە قوعامدىق سالالاردى قوسا العاندا، زورلىق-زومبىلىقتىڭ كەز كەلگەن ءتۇرى ءۇشىن جازانى قاتاڭداتۋ بويىنشا مەملەكەت باسشىسىنىڭ تاپسىرماسىن ورىنداۋ ءۇشىن ازىرلەنگەن.

«پرەزيدەنتىمىز قاسىم-جومارت كەمەل ۇلى توقايەۆ ايەلدەردىڭ قۇقىقتارى مەن بالالاردىڭ قاۋىپسىزدىگىن قامتاماسىز ەتۋگە ۇنەمى باسا ءمان بەرىپ كەلەدى. مەملەكەت باسشىسىنىڭ تاپسىرمالارىن ورىنداۋ ءۇشىن ءتيىستى زاڭدار ازىرلەندى. سەناتورلار ايەلدەر مەن بالالاردىڭ قۇقىقتارىن قورعاۋ شارالارىن كۇشەيتۋدى قولدايدى. زاڭداردىڭ قوعامدىق ماڭىزدىلىعىن ەسكەرە وتىرىپ، ولاردى بەيسەنبىدەگى پالاتا وتىرىسىنا شىعارۋدى كوزدەپ وتىرمىز»، - دەدى ماۋلەن اشىمبايەۆ.

قۇجاتتاردا كورسەتىلگەن نورمالار بالالاردىڭ قاۋىپسىزدىگىن قامتاماسىز ەتۋ ماسەلەلەرى بويىنشا مەملەكەتتىك ساياساتتىڭ قۇقىقتىق، ەكونوميكالىق، الەۋمەتتىك جانە ۇيىمداستىرۋشىلىق نەگىزدەرىن جەتىلدىرۋگە، ايەلدەر مەن بالالارعا قاتىستى قىلمىستاردىڭ الدىن الۋعا جانە جولىن كەسۋگە باعىتتالعان.

سەنات ءتوراعاسى اتاپ وتكەندەي، بۇل زاڭدار قوعامدا ۇلكەن پىكىرتالاس تۋدىردى. وسىعان بايلانىستى سەناتورلار ازاماتتارمەن جەكە كەزدەسۋلەر وتكىزدى جانە قۇجاتتاردىڭ جەكەلەگەن نورمالارىنا قاتىستى جۇزدەگەن ءوتىنىشتى قارادى. سونداي-اق پالاتا سپيكەرى زاڭنىڭ نەگىزگى ەرەجەلەرىن ءتۇسىندىرۋ جۇمىستارىن وتىرىسقا دەيىن بەلسەندى جۇرگىزىپ، ودان كەيىن دە جوعارى دەڭگەيدە جالعاستىرۋ كەرەك ەكەنىن ايتتى.

سونىمەن قاتار بالالاردىڭ قاۋىپسىزدىگىن قامتاماسىز ەتۋ ءۇشىن بالالارعا ارنالعان ينتەرناتتىق ۇيىمداردى مەملەكەتتىك باقىلاۋدىڭ ەرەكشە تەتىكتەرى، بالالارعا ارناۋلى الەۋمەتتىك قىزمەتتەر جانە ءبىلىم بەرۋ-ساۋىقتىرۋ قىزمەتتەرىن كورسەتەتىن مەكەمەلەردى ليتسەنزيالاۋ مىندەتتىلىگى ەنگىزىلەدى.

سونداي-اق پالاتا وتىرىسىندا «ق ر كەيبىر زاڭنامالىق اكتىلەرىنە حالىقتىڭ كوشى-قونى جانە قىلمىستىق-اتقارۋ جۇيەسى سالالارىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قارالادى. بۇل قۇجات ءتيىستى سالالارداعى زاڭنامانى جەتىلدىرۋگە ارنالعان.