سەناتورلار پالاتا وتىرىسىنىڭ كۇن ءتارتىبىن بەكىتتى

Палата отырысы
Фото: Н.Байбулин

استانا. KAZINFORM - سەنات سپيكەرى ماۋلەن اشىمبايەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا 25- قاڭتاردا وتەتىن سەنات وتىرىسىنىڭ كۇن ءتارتىبى بەكىتىلدى.

سوعان سايكەس الداعى بەيسەنبىدە سەناتورلار «قازاقستان رەسپۋبليكاسىنىڭ ۇكىمەتى مەن قاتار مەملەكەتىنىڭ ۇكىمەتى اراسىنداعى ينۆەستيتسيالاردى ءوزارا كوتەرمەلەۋ جانە قورعاۋ تۋرالى كەلىسىمدى راتيفيكاتسيالاۋ تۋرالى» زاڭدى قارايدى. بۇل زاڭ ينۆەستيتسيالىق قىزمەتتى جۇزەگە اسىرۋعا قولايلى جاعداي قالىپتاستىرۋ ارقىلى تاراپتاردىڭ ەكونوميكالىق ىنتىماقتاستىعىن جانداندىرۋعا ارنالعان.

سونداي-اق قۇجات وتەماقى تولەۋدى، حالىقارالىق اربيتراجعا قول جەتكىزۋدى، ەلدەردىڭ شەتەلدىك ينۆەستيتسيالارعا ءادىل جانە تەڭ قاتىناسىن قامتاماسىز ەتۋ ارقىلى ماجبۇرلەپ يەلىكتەن شىعارۋدان قورعاۋدى قامتاماسىز ەتەدى.

سەنات وتىرىسىندا «قازاقستان رەسپۋبليكاسىنىڭ ۇكىمەتى مەن سينگاپۋر رەسپۋبليكاسىنىڭ ۇكىمەتى اراسىنداعى ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىمدى راتيفيكاتسيالاۋ تۋرالى» زاڭ دا قارالادى.

كەلىسىمنىڭ نەگىزگى مىندەتى - ينۆەستورلاردىڭ ينۆەستيتسيالىق قىزمەتتى ىسكە اسىرۋى كەزىندە ولاردىڭ قۇقىقتارىنىڭ كەپىلدىكتەرىن بەكىتۋ ارقىلى ىنتىماقتاستىقتىڭ قۇقىقتىق نەگىزىن قالىپتاستىرۋ.

سونىمەن قاتار بيۋرو وتىرىسىندا ماجىلىستەن كەلىپ تۇسكەن زاڭدار سەناتتىڭ تۇراقتى كوميتەتتەرىنە ءبولىنىپ بەرىلدى.

سوڭعى جاڭالىقتار