سەناتورلار ادام ساۋداسى مەن تەرروريزمدى قارجىلاندىرۋعا قارسى زاڭداردى قارايدى

استانا. KAZINFORM - سەنات ءتوراعاسى ماۋلەن اشىمبايەۆ پالاتا بيۋروسىنىڭ وتىرىسىن وتكىزدى. وندا دەپۋتاتتار 27-ماۋسىم كۇنى وتەتىن سەنات وتىرىسىنىڭ كۇن ءتارتىبىن بەكىتتى.

سەناتورلار الداعى بەيسەنبىدە «ادام ساۋداسىنا قارسى ءىس-قيمىل تۋرالى» نەگىزگى زاڭدى، سونداي-اق، وعان ىلەسپە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ادام ساۋداسىنا، ۆانداليزم كورىنىسىنە جانە بوتەننىڭ مۇلكىن بۇلدىرۋگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە ادام ساۋداسىنا، ۆانداليزم كورىنىسىنە جانە بوتەننىڭ مۇلكىن بۇلدىرۋگە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭداردى قارايدى. اتالعان زاڭداردىڭ نورمالارى ادام ساۋداسىنا بايلانىستى قىلمىستاردىڭ جاڭا ساناتىن ەنگىزۋدى جانە ادامداردى جىنىستىق سيپاتتاعى قىزمەتتەر كورسەتۋگە، ونىڭ ىشىندە كامەلەتكە تولماعان ادامداردى تارتقانى، سونداي-اق، جەڭگەتايلىقپەن اينالىسقانى ءۇشىن جاۋاپكەرشىلىكتى ارتتىرۋدى كوزدەيدى.

سونىمەن قاتار مەديتسينالىق ۇيىمداردىڭ جانە بالا قۇقىقتارىن قورعاۋ جونىندەگى فۋنكسيالاردى جۇزەگە اسىراتىن ۇيىمداردىڭ لاۋازىمدى تۇلعالارى جاڭا تۋعان نارەستەنى تاستاپ كەتۋ، جەتىم بالالار مەن اتا-اناسىنىڭ قامقورلىعىنسىز قالعان بالالاردىڭ كەلىپ ءتۇسۋى مەن جەتكىزىلۋى تۋرالى دەرەكتەردى حابارلاماعانى ءۇشىن اكىمشىلىك جاۋاپتىلىق ەنگىزۋ قاراستىرىلىپ وتىر. ءۆانداليزمنىڭ ارەكەتىنە جانە بوتەننىڭ مۇلكىن بۇلدىرۋگە قارسى ءىس-قيمىل جونىندە دە تۇزەتۋلەر ەنگىزىلەدى.

ەلەكتروموبيلدەرگە قاتىستى ماسەلەلەرگە ارنالعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كولىك جانە ەلەكترموبيلدەرگە ارنالعان ينفراقۇرىلىمدى دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ دا پالاتانىڭ الداعى وتىرىسىندا قارالادى. ال، «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭدا ەلەكتروموبيلدەردى ۇيىمداستىرۋ جانە پايدالانۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىك شارالارى انىقتالادى. ونىڭ ىشىندە ەلەكتروقۋاتتاۋ ستانسالارىن پايدالانۋ ەرەجەلەرى دە بار.

«قازاقستان رەسپۋبليكاسىنىڭ كەيبىر زاڭنامالىق اكتىلەرىنە مەملەكەتتىك باقىلاۋ مەن ستاتيستيكا، حالىقتى قورعاۋ جۇيەسىن جەتىلدىرۋ، دەرەكتەردى باسقارۋ، زاڭدى تۇلعالاردى تىركەۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ دا سەنات وتىرىسىنىڭ كۇن تارتىبىنە شىعارىلدى. اتالعان زاڭ اياسىندا 5 كودەكسكە جانە 36 زاڭعا وزگەرىستەر مەن تولىقتىرۋلار ەنگىزۋ كوزدەلىپ وتىر. بۇل رەتتە الەۋمەتتىك كودەكسكە حالىقتىڭ الەۋمەتتىك وسال ساناتتارىنىڭ قۇقىقتارى جونىندەگى ۋاكىل مارتەبەسىن جانە ونىڭ قۇزىرەتتەرىن بەكىتۋ بولىگىندە تۇزەتۋلەر ەنگىزىلمەك.

دەپۋتاتتار باستاماشى بولعان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەكونوميكالىق قۇقىق بۇزۋشىلىقتار- دىڭ جەكەلەگەن تۇرلەرىن قىلمىستىق سيپاتتان ارىلتۋ جانە قر زاڭسىز جولمەن الىنعان كىرىستەردى زاڭداستىرۋعا (جىلىستاتۋعا) جانە تەرروريزمدى قارجىلاندىرۋعا قارسى ءىس-قيمىل تۋرالى زاڭناماسىن جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭداردىڭ ماڭىزدى مىندەتى شاعىن جانە ورتا بيزنەستى قولداۋ جانە كاسىپكەرلەردى قىلمىستىق قۋدالاۋعا نەگىزسىز تارتۋعا قارسى ارەكەت ەتۋ ەكەنىن اتاپ وتكەن ءجون. بۇل زاڭداردىڭ نورمالارىنا سايكەس سالىق قىلمىستارى سالاسىنداعى ىستەردى تىركەۋ ءۇشىن ءبىرقاتار ەرەكشەلىك قاراستىرىلعان.

مەملەكەت باسشىسىنىڭ حالىق اراسىندا ويىنعا تاۋەلدىلىكپەن كۇرەستى كۇشەيتۋ جونىندەگى تاپسىرماسىن ىسكە اسىرۋ ءۇشىن دەپۋتاتتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ويىن بيزنەسى، لوتەرەيا قىزمەتى، دەنساۋلىق ساقتاۋ، مەملەكەتتىك ەڭبەك ينسپەكتسياسى، مەملەكەتتىك باقىلاۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا باستاماشى بولدى. زاڭ نورمالارىنا سايكەس قۇمار ويىندارعا جانە ءباس تىگۋگە قاتىسۋعا شەكتەلگەن ادامداردىڭ ءتىزىمىن انىقتاۋ، ونداي ازاماتتاردى مەديتسينالىق وڭالتۋ ءتارتىبىن بەلگىلەۋ سياقتى ءبىرقاتار ناقتى شارا ۇسىنىلىپ وتىر. بۇعان ىلەسپە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭ ويىن بيزنەسى سالاسىن رەتتەۋدىڭ نورماتيۆتىك نەگىزىن جانداندىرۋعا جول اشادى.

سونداي-اق «جىلۋ ەنەرگەتيكاسى تۋرالى»، «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جىلۋ ەنەرگەتيكاسى، ەلەكتر ەنەرگەتيكاسى جانە رەتتەلىپ كورسەتىلەتىن قىزمەتتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنە وزگەرىستەر مەن تولىقتىرۋلار ەنگىزۋ تۋرالى» زاڭدار دا سەنات وتىرىسىنىڭ كۇن تارتىبىنە شىعارىلدى. جاڭا نورمالاردىڭ قاتارىندا جىلۋ ەنەرگەتيكاسى سالاسىنداعى زاڭنامانى بۇزعانى ءۇشىن جاۋاپكەرشىلىكتى كۇشەيتۋ، بۇكىل سالاعا مونيتورينگ جۇرگىزۋ، تاريف بەلگىلەۋ قاعيداتتارىن ايقىنداۋ جانە ەنەرگيا تيىمدىلىگىن ارتتىرۋ سياقتى باسىمدىقتار بار. ودان بولەك، ورتالىقتاندىرىلعان جىلۋمەن جابدىقتاۋ جۇيەسىنە ەكونوميكالىق جانە تەحنيكالىق ورىندىلىق جاعدايىندا جاڭارتىلاتىن ەنەرگيا كوزدەرىن ەنگىزۋدى دامىتۋعا ىنتالاندىرۋ سياقتى مىندەتتەر دە قاراستىرىلعان.

الداعى بەيسەنبىدە قارالاتىن كەلەسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءمىنىس جانە ءمىنىس- جەگىن جىلقىلاردىڭ وتاندىق تۇقىمدارىن ساقتاۋ جانە ءوسىمىن مولايتۋ ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى» زاڭنىڭ نورمالارى مەملەكەتتىك قولداۋ كورسەتۋ ارقىلى جىلقىلاردىڭ وتاندىق تۇقىمىن ساقتاۋعا جانە ولاردىڭ اسىل تۇقىمدىق قاسيەتتەرىن جاقسارتۋعا باعىتتالعان.

پالاتا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ەرەكشە قورعالاتىن تابيعي اۋماقتار جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «سالىق جانە بيۋدجەتكە تولەنەتىن باسقا دا مىندەتتى تولەمدەر تۋرالى» قازاقستان رەسپۋبليكاسىنىڭ كودەكسىنە (سالىق كودەكسى) وزگەرىستەر ەنگىزۋ تۋرالى» زاڭدار دا قارالادى. ولار سالانى جەتىلدىرۋ ماسەلەلەرىن قامتيدى.

سونىمەن بىرگە ءبىرقاتار حالىقارالىق كەلىسىمدى راتيفيكاتسيالاۋ تۋرالى ماسەلەلەر دە پالاتا وتىرىسىنىڭ كۇن تارتىبىنە شىعارىلدى. ولار - «قازاقستان رەسپۋبليكاسىنىڭ مەن سينگاپۋر رەسپۋبليكاسى اراسىنداعى كورسەتىلەتىن قىزمەتتەر ساۋداسى جانە ينۆەستيتسيالار تۋرالى كەلىسىمدى راتيفيكاتسيالاۋ تۋرالى» جانە «قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمىنىڭ اراسىنداعى سيفرلىق ينكليۋزيا جانە ترانسفورماتسيا جونىندەگى ازيا-تىنىق مۇحيتى مينيسترلىك كونفەرەنسيا - سىن ۇيىمداستىرۋ تۋرالى كەلىسىمدى راتيفيكاتسيالاۋ تۋرالى» زاڭدار.

سونداي-اق بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن تۇراقتى كوميتەتتەرگە ءبولىنىپ بەرىلدى.