سەناتور قانداستارعا ارنالعان كۆوتا سانىن كوبەيتۋدى ۇسىندى

استانا. KAZINFORM - رەسەيدەگى «Crocus City Hall» عيماراتىندا بولعان قايعىلى جاعدايدان كەيىن ەلىمىزگە ەڭبەك ميگرانتتارىنىڭ اعىلاتىنى بولجانىپ وتىر. سەناتور دارحان قىدىرالى ءوزىنىڭ دەپۋتاتتىق ساۋالىندا ولاردىڭ ءبىزدىڭ ەلىمىزگە زاڭسىز كەلۋىنە بايلانىستى ۇلتتىق قاۋىپسىزدىككە اسەر ەتەتىن پروبلەمالاردى كوتەردى.

«ميگرانتتار تۋرالى جۇيەلى الەۋمەتتىك زەرتتەۋلەر جۇرگىزۋ قاجەت. ميگراتسيا - ادامداردىڭ بەي-بەرەكەت قوزعالىسىنىڭ مەحانيكالىق پروتسەسى عانا ەمەس. ول، ەڭ الدىمەن، بەيىمدەلۋ ءۇردىسى، الەۋمەتتىك جاعداي مەن ءومىر سالتىنىڭ وزگەرۋى. سوندىقتان ەڭبەك ميگرانتتارى مەن قونىس اۋدارۋشىلارعا اقپاراتتىق، زاڭنامالىق، تىلدىك، مادەني قىزمەت كورسەتەتىن ارنايى بەيىمدەۋ ورتالىقتارى بولۋى كەرەك»، - دەدى د. قىدىرالى ۇكىمەت باسشىسى ولجاس بەكتەنوۆتىڭ اتىنا.

سونىمەن قاتار سەناتور قانداستاردى كوشىرۋ جانە ولار ءۇشىن كۆوتالاردى ۇلعايتۋ ماسەلەسىن دە قوزعادى.

«ەڭبەك جانە الەۋمەتتىك قورعاۋ مينيسترلىگى ازىرلەگەن «اتا جولى» كارتاسىنىڭ مۇمكىندىكتەرى زاڭدى تۇردە بەكىتىلۋى ءتيىس. بۇل كارتا ەتنيكالىق قازاقتارعا بەرىلەتىن قانداس مارتەبەسىمەن تەڭەستىرىلۋى كەرەك. قانداستارعا بەرىلەتىن كۆوتانى دا كوبەيتۋ قاجەت. ماسەلەن، اقمولا وبلىسىنا بولىنگەن 285 كۆوتا قاڭتار ايىندا، رۋدنىيعا بولىنگەن 200 كۆوتا اقپان ايىندا يگەرىلىپ قويعان. قازاقستانعا كەلگەندەردىڭ باسىم بولىگى ماڭعىستاۋ وڭىرىنە تۇراقتاعانىن ەسكەرسەك، سولتۇستىككە قونىس اۋدارۋ باعدارلاماسىنا وڭتۇستىكپەن بىرگە باتىس ايماقتاردى دا قوسقان ابزال دەپ ويلايمىز. سونىمەن بىرگە، سولتۇستىك ءوڭىر اكىمدىكتەرى حالىق كوبىرەك كوشەتىن اۋدانداردا فرونت-وفيس تۇرىندە وكىلدىكتەر اشىپ، ءتۇسىندىرۋ جۇمىستارىن ارتتىرعانى ءجون»، - دەدى دەپۋتات.

سەناتور ۇكىمەت باسشىسى ولجاس بەكتەنوۆكە وسى پروبلەمالارعا نازار اۋدارۋدى جانە ولاردى شەشۋ ءۇشىن ءتيىستى شارا قابىلداۋدى سۇرادى.