سەناتور ەلىمىزدەگى ساۋدا ورتالىقتارىندا كۇزەتتى كۇشەيتۋگە شاقىردى

 استانا. KAZINFORM - سەناتور بيبيگۇل جەكسەنباي ءوزىنىڭ دەپۋتاتتىق ساۋالىندا ادام كوپ جينالاتىن ورىنداردا قاۋىپسىزدىكتى قامتاماسىز ەتۋ ماسەلەسى تۋرالى ايتتى.

دەپۋتاتتىڭ ايتۋىنشا، قازاقستاندا 7,9 ميلليون شارشى مەتر ساۋدا الاڭى بار، ءبىراق ولاردىڭ بەستەن ءبىر بولىگى عانا ساپا مەن قاۋىپسىزدىك ولشەمىنە ساي كەلەدى.

ساۋدا ءارى ويىن-ساۋىق ورتالىعىنداعى بالالاردىڭ ويىن بولمەسى ەكىنشى قاباتتان جوعارى ەمەس جانە ەۆاكۋاتسيالىق ەسىكتەن 20 مەتردەن قاشىق بولماۋى ءتيىس.

ءبىراق كوپتەگەن ساۋدا ورتالىعىندا بالالاردىڭ ويىن الاڭدارى جوعارعى قاباتتا ورنالاسقان، ەۆاكۋاتسيا جولى دا قاراستىرىلماعان.

ەۆاكۋاتسيا باسپالداعىندا مۇمكىندىگى شەكتەۋلى جاندارعا ارنالعان پاندۋس جوق.

ساۋدا ورتالىقتارىندا ءبىر قاباتتا ونداعان تاماقتانۋ ورىندارى ورنالاسقان، بۇل تاماق پىسىرەتىن قۋاتى جوعارى تەحنيكانى قولدانۋ سالدارىنان ءورت قاۋپىن ارتتىرادى.

«2023 -جىلى ءورت قاۋىپسىزدىگى تالاپتارىن بۇزۋدىڭ 13978 دەرەگى تىركەلگەن. ءورت قاۋىپسىزدىگىن ورەسكەل بۇزۋ فاكتىلەرى مەن قۇلىپتالعان نەمەسە ءتىپتى شىنجىرمەن بەكىتىلگەن اپاتتىق شىعۋ جولدارى، جارامدىلىق مەرزىمى وتكەن ءورت سوندىرگىشتەر، دابىل جانە ءورت ءسوندىرۋ جۇيەلەرىنىڭ بۇزىلۋى سياقتى فاكتىلەر انىقتالعان. وسىنىڭ ءبارى ءبىرىڭعاي زاڭ تالابىنىڭ ورىندالماۋىنان بولعان. ساۋدا ورتالىقتارى عيماراتتىڭ تەحنيكالىق جۇيەسىن ارنايى الگوريتم بويىنشا باسقارۋعا قابىلەتتى جوعارى تەحنولوگيالىق ءورت دابىلىنىڭ جۇيەسىمەن جابدىقتالۋى ءتيىس. بۇل بارلىق ادامداردى بەلگىلى ءبىر ۋاقىتتا ءورتتىڭ قاۋپىنەن قورعاۋعا جانە سول ارقىلى قاۋىپسىز ەۆاكۋاتسيالاۋعا مۇمكىندىك بەرەدى»، - دەدى بيبيگۇل جەكسەنباي ۇكىمەت باسشىسى ولجاس بەكتەنوۆتىڭ اتىنا جولداعان ساۋالىندا.

سونىمەن قاتار سەناتور ەلىمىزدە وتەتىن ءىرى شارالاردا جۇرتشىلىقتى قورعاۋ ماسەلەسىنە توقتالدى. ءىرى سپورتتىق شارالاردىڭ قاۋىپسىزدىگى اياسىندا شەتەلدىك جانە وتاندىق تاجىريبەنى ەسكەرۋدى، قاۋىپتەردىڭ الدىن الۋ ءۇشىن كەشەندى ۇيىمداستىرۋعا قولداۋ جاساۋدى تالاپ ەتەدى.

«ساۋدا ءارى ويىن- ساۋىق ورتالىعىنداعى كىرەبەرىس پەن ادام كوپ جينالاتىن جەرلەردە كۇزەتتى كۇشەيتۋدىڭ، سونداي-اق ەۆاكۋاتسيانى قامتاماسىز ەتۋ جۇيەسىنىڭ جۇمىسىن قوسىمشا تەستىلەۋ جانە جاتتىعۋ ەۆاكۋاتسياسى مەن اۋىزشا حابارلاۋدىڭ ماڭىزىنا نازار اۋدارۋىڭىزدى سۇرايمىن. سونداي- اق، جازعى دەمالىس الدىندا مەكتەپتەردە جانە جوعارى وقۋ ورىندارىندا وقۋشىلاردىڭ قاتىسۋىمەن قوعامدىق قاۋىپسىزدىك بويىنشا ارنايى وقۋ-جاتتىعۋ وتكىزۋ قاجەت»، - دەدى دەپۋتات.