سەناتور اۋىل شارۋاشىلىعى كووپەراتيۆتەرىنىڭ نەگىزگى پروبلەماسىن اتادى

  قازاقستاندىق اگرارشىلار اۋىل شارۋاشىلىعى سالاسىندا 3284 كووپەراتيۆ قۇرعان بولاتىن. الايدا، ءىس جۇزىندە بۇل بىرلەستىكتەردىڭ 60 پايىزى تولەم قابىلەتسىز نەمەسە ارەكەتسىز تۇرعانى انىقتالدى. سەناتور جانبولات جورگەنبايەۆ ءوزىنىڭ دەپۋتاتتىق ساۋالىندا وسى ماسەلەنى كوتەردى، دەپ حابارلايدى Kazinform.

دەپۋتاتتىڭ ايتۋىنشا، باستاپقى كاپيتالدىڭ بولماۋى كووپەراتيۆتەردىڭ نەگىزگى پروبلەماسىنا اينالدى. ياعني، «اۋەلى نەسيە الىپ، سودان كەيىن كووپەراتيۆكە كىرۋ» كونسەپتسيا جۇمىس ىستەمەي تۇر.

سەناتور بيىل «اۋىل اماناتى» باعدارلاماسى اياسىندا 400 اۋىل شارۋاشىلىعى كووپەراتيۆى قۇرىلعانىن ايتا كەلىپ، ولاردىڭ جۇمىس ىستەۋى ءۇشىن 100 ميلليارد تەڭگە بولىنگەنىنە توقتالدى. سونىمەن قاتار، «اگرارلىق نەسيە كورپوراتسياسى» 543 اۋىل شارۋاشىلىعى كووپەراتيۆىنە تاعى قوسىمشا 370 ميلليارد تەڭگە ءبولدى. الايدا ەلدەگى 268000 فەرما مەن 1,5 ميلليوننان استام جەكە قوسالقى شارۋا قوجالىعى ءالى كۇنگە دەيىن اۋىلشارۋاشىلىق كووپەراتيۆىنىڭ قىزمەتىنە قوسىلماي وتىر.

«وسى اتالعان قۇرىلىمدار اراسىندا ىرىلەندىرۋ باعىتىنداعى جۇمىستىڭ ءالسىز ءجۇرىپ جاتقانىن بايقاتتى. بىرىنشىدەن، ناسيحات جۇمىسى ءتيىستى دەڭگەيدە جاسالماي وتىر جانە «اۋىل اماناتى» باعدارلاماسىنىڭ مۇمكىندىكتەرى تولىق اشىلماعان. ەكىنشىدەن، جەر قاتىناستارىن رەتتەۋدىڭ كەيبىر ماسەلەلەرى تولىق قاراستىرىلماعان. ۇشىنشىدەن، كووپەراتيۆ پەن ونىڭ مۇشەلەرى ءۇشىن سالىق سالۋ ماسەلەلەرى تولىق رەتتەلمەگەن. تورتىنشىدەن، كاسىپكەرلىك سۋبەكتىلەرىنىڭ ءونىمدى ساقتاۋعا ارنالعان قويمالاردىڭ جوقتىعى، وڭىرلەردە ساۋدا- لوگيستيكالىق ورتالىقتار ماسەلەسىنىڭ شەشىلمەگەندىگى پروبلەماعا اينالدى»، - دەدى جانبولات جورگەنبايەۆ.

سەناتور وسى ايتىلعانداردى تۇجىرىمداي وتىرىپ، ەلىمىزدىڭ ۇكىمەتىنە ءبىرقاتار ۇسىنىس ايتتى.

«اۋىل شارۋاشىلىعى كووپەراتسياسىن دامىتۋ جۇمىستارىن جۇيەلەندىرۋ ءۇشىن ۇيلەستىرۋ كەڭەسى قۇرىلۋى ءتيىس. وسىعان بايلانىستى «اۋىل شارۋاشىلىعى كووپەراتيۆتەرى تۋرالى» زاڭىنا ءبىرقاتار وزگەرىس ەنگىزۋ ماڭىزدى. سونىمەن قاتار، سالىق زاڭناماسىن جەتىلدىرۋ اياسىندا كووپەراتيۆكە جانە ونىڭ مۇشەلەرىنە قوسارلانعان سالىق سالۋدى الىپ تاستاۋدى قاراستىرۋ كەرەك. اۋىل شارۋاشىلىعى كووپەراتيۆتەرىنىڭ كولىك شىعىستارىن سۋبسيديالاۋ بويىنشا ۇسىنىستاردى قاراستىرۋ ماڭىزدى»، - دەدى دەپۋتات.