سەناتتا رەسەيلىك مۇنايدى قازاقستان ارقىلى قىتايعا تاسىمالداۋعا قاتىستى قۇجات قارالادى

 استانا. KAZINFORM - سەنات سپيكەرى ماۋلەن اشىمبايەۆ پالاتا بيۋروسىنىڭ وتىرىسىن وتكىزدى. وندا دەپۋتاتتار 2-مامىر كۇنى وتەتىن سەنات وتىرىسىنىڭ كۇن ءتارتىبىن بەكىتتى، دەپ حابارلايدى ق ر پارلامەنتى سەناتىنىڭ باسپا ءسوز قىزمەتى.

ءباسپاسوز قىزمەتىنىڭ مالىمەتتەرىنە قاراعاندا، بەيسەنبىدەگى وتىرىستا قىزىلوردا وبلىسىنان جاڭادان سايلانعان پارلامەنت سەناتى دەپۋتاتىنىڭ انت بەرۋى جانە ونى تۇراقتى كوميتەتكە مۇشە ەتىپ سايلاۋ ماسەلەلەرى قارالادى.

سونىمەن قاتار سەناتورلار «2013 -جىلعى 24-جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى قازاقستان رەسپۋبليكاسىنىڭ اۋماعى ارقىلى قىتاي حالىق رەسپۋبليكاسىنا رەسەيلىك مۇنايدى تاسىمالداۋ سالاسىنداعى ىنتىماقتاستىق تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭدى قارايدى.

حاتتاما ترانزيت كولەمدەرىن، مۇناي ءترانزيتى ءۇشىن تاريفتەر مەن تولەمدەردى جاڭارتۋدى، سونداي- اق كەلىسىمدى ون جىلدىق كەزەڭگە 2034 -جىلعى 1-قاڭتارعا دەيىن ۇزارتۋدى كوزدەيدى. سونداي- اق قۇجاتتا كەلىسىمدى جۇزەگە اسىراتىن قۇزىرلى ورگاندى انىقتاۋعا قاتىستى وزگەرىستەر ەنگىزىلگەن: قازاقستان جاعىنان - بۇل ەنەرگەتيكا مينيسترلىگى، رەسەي جاعىنان ۋاكىلەتتى ۇيىم - «روسنەفت» مۇناي كومپانياسى.

سونداي- اق پالاتا وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بايلانىس، سيفرلاندىرۋ، ينۆەستيتسيالىق احۋالدى جاقسارتۋ جانە ارتىق زاڭنامالىق رەگلامەنتتەۋدى بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ قارالادى. بۇل زاڭ كوممۋنيكاتسيالىق ينفراقۇرىلىمدى دامىتۋعا، پەرسپەكتيۆالى تەلەكوممۋنيكاتسيالار مەن تسيفرلىق تەحنولوگيالاردى تارتۋ ءۇشىن قولايلى زاڭنامالىق جاعدايلار جاساۋعا جانە يننوۆاتسيالىق ەكوجۇيەنى ودان ءارى جەتىلدىرۋگە باعىتتالعان.

ودان بولەك، بيۋرو وتىرىسىندا ماجىلىستەن كەلىپ تۇسكەن زاڭدار جۇمىس ءۇشىن تۇراقتى كوميتەتتەرگە ءبولىنىپ بەرىلدى.