سەناتتا اۋرۋحانالاردى قارجىلاندىرۋدا قانداي كەمشىلىكتەر بار ەكەنى ايتىلدى

بۇگىن سەناتتىڭ جالپى وتىرىسىندا دەپۋتات بيبىگۇل جەكسەنباي اۋرۋحانالار مەن ەمحانالاردى الەۋمەتتىك مەديتسينالىق ساقتاندىرۋ قورى جاعىنان قارجىلاندىرۋ ماسەلەلەرى تۋرالى ايتتى.

қаржыландыру
Фото: ҚазАқпарат

بۇل تۇرعىدا پرەمەر-ءمينيستردىڭ ورىنباسارى تامارا دۇيسەنوۆانىڭ اتىنا ساۋال جولدادى، دەپ حابارلايدى قازاقپارات ءتىلشىسى.

دەپۋتاتتىڭ سوزىنە قاراعاندا، كوپتەگەن ەمدەۋ مەكەمەلەرىندە قوردان قارجىلاندىرۋ بەلگىلەنگەن سومادان 60 پايىزدان 80 پايىزعا دەيىن جىلدان جىلعا تومەندەپ بارا جاتقانى بايقالىپ وتىر. ناتيجەسىندە ولار قالىپتى جۇمىس ىستەي الماي كەلەدى، جاڭا تەحنولوگيالاردى ەنگىزە المايدى، قىزمەتكەرلەردى ىنتالاندىرۋعا مۇمكىندىگى جوق.

سەناتوردىڭ ايتۋىنشا، جىلدىق وتىنىمگە سايكەس الەۋمەتتىك مەديتسينالىق ساقتاندىرۋ قورى جاعىنان قارجىلاندىرۋدى تولىق كولەمدە جۇرگىزۋ كەرەك.

«مەديتسينالىق ۇيىمدار جىل سايىن بۇرىنعى كولەمدە ءوتىنىش بەرەدى. ال اتالعان قوردان قارجىلاندىرۋ ازايىپ بارادى. ەكىنشىدەن، تەگىن مەديتسينالىق كومەكتىڭ كەپىلدىك بەرىلگەن كولەمىنە بولىنگەن قاراجات جىل سايىن تولىق يگەرىلمەي قالاتىندىقتان، ونى الەۋمەتتىك مەديتسينالىق ساقتاندىرۋ قورىنىڭ توپتاماسىمەن بىرىكتىرگەن ءجون»، - دەدى ب. جەكسەنباي.

ونىڭ پايىمىنشا، ناۋقاستاردى ەمدەۋدە تەك نەگىزگى دياگنوز بويىنشا عانا ەمەس، سونىمەن قاتار باسقا دا ىلەسپە اۋرۋى ءۇشىن دە دارىگەرلەرگە اقى تولەۋ ماڭىزدى.

«ەگەر ناۋقاستا نەگىزگى اۋرۋىمەن قاتار ىلەسپە سىرقاتى بولعان جاعدايدا، ول ەمدەلگەن كەزدە بارلىق ەم- دوم ءۇشىن تولەم جاسالۋى كەرەك. ماسەلەن، ناۋقاس پنيەۆمونيا دياگنوزىمەن اۋرۋحاناعا تۇسكەندە، تاريف بويىنشا 120000 تەڭگە سوما بولىنەدى. ال ول ناۋقاستا ىلەسپە پاتولوگيا، قانت ديابەتى، ارتەريالىق گيپەرتەنزيا جانە باسقا دا اۋرۋلارى انىقتالسا، ءا م س ق- دان قاراجات بولىنبەيدى. ويتكەنى اقپاراتتىق جۇيەگە تەك نەگىزگى دياگنوز عانا جازىلادى. ال ەمدەۋ مەكەمەسى وسىنداي پاتسيەنتكە 120000 تەڭگەنىڭ ورنىنا بارلىق ىلەسپە اۋرۋلارىن ەمدەۋگە 300000 - 500000 تەڭگە جۇمسايدى»، - دەدى دەپۋتات.

سوڭعى جاڭالىقتار