سەنات ءتوراعاسى قىتايدىڭ ساراپشىلار قاۋىمداستىعى وكىلدەرىمەن كەزدەستى
استانا. KAZINFORM - قازاقستان پارلامەنتتىك دەلەگاتسياسىنىڭ ساراپشىلار قاۋىمداستىعى وكىلدەرىمەن جانە قىتايدا ءبىلىم الىپ جاتقان قازاقستان ستۋدەنتتەرىمەن كەزدەسۋىندە ىنتىماقتاستىقتىڭ جاڭا فورماتى مەن تەتىكتەرى تالقىلاندى.
ماۋلەن اشىمبايەۆتىڭ ايتۋىنشا، جاسامپاز ىنتىماقتاستىق جانە ەكى ەلدىڭ مۇددەلەرىن ءوزارا قۇرمەتتەۋ بىرلەسكەن جوبالار ءۇشىن جاڭا مۇمكىندىكتەرگە جول اشىپ، ماڭىزدى ماسەلەلەردىڭ شەشىمىن تابۋعا ىقپال ەتەدى.
- سوڭعى جىلداردا قازاقستان وزەكتى جاھاندىق جانە وڭىرلىك پروبلەمالاردى جەڭىلدەتىپ، ولاردى شەشۋ ءۇشىن سىندارلى ءوزارا ءىس-قيمىل مەن ىنتىماقتاستىق ساياساتىن بەلسەندى ىلگەرىلەتىپ كەلەدى. قازاقستان ءوزىنىڭ سىرتقى ساياسي قاعيدالارىنا، ناقتى ايتقاندا، كوپۆەكتورلىققا، پراگماتيزمگە، باسقا ەلدەردىڭ مۇددەلەرىن قۇرمەتتەۋگە جانە حالىقارالىق پروبلەمالاردى شەشۋدىڭ سىندارلى جولدارىن ىزدەۋگە ادال بولىپ قالا بەرەدى. مۇنداي تەڭگەرىمدى ۇستانىم ءبىزدىڭ ەلىمىزگە جاھاندىق سىن-قاتەرلەرگە بەيىمدەلىپ قانا قويماي، جاڭا الەمدىك ءتارتىپ قالىپتاستىرۋ ىسىنە ۇلەس قوسۋعا مۇمكىندىك بەرەدى. قازاقستان ورتالىق ازيا وڭىرىندەگى جاسامپاز ىنتىماقتاستىق ساياساتىن دا دايەكتى تۇردە دارىپتەپ وتىر. مەملەكەت باسشىسى قاسىم-جومارت كەمەل ۇلى توقايەۆ تىعىز وڭىرلىك كووپەراتسيانى نىعايتۋدىڭ ماڭىزدى ەكەنىن بىرنەشە رەت اتاپ ءوتتى. مۇنداي قادام ءوڭىردىڭ دامۋىنا جاعداي جاساپ قانا قويماي، بۇكىل ورتالىق ازيانىڭ حالىقارالىق قاتىناستارداعى سۋبەكتيۆتىلىگىن ارتتىرۋعا ىقپال ەتەدى، - دەدى سەنات ءتوراعاسى.
فۋدان ۋنيۆەرسيتەتى حالىقارالىق زەرتتەۋلەر ينستيتۋتىنىڭ پروفەسسورى چجاو حۋاشەن قازاقستان ورتالىق ازياداعى ەڭ ءىرى ەكونوميكا رەتىندە قىتايدىڭ نەگىزگى ساۋدا سەرىكتەسى ەكەنىن اتاپ ءوتتى. بۇل قازاقستان-قىتاي قارىم-قاتىناسىنىڭ ماڭىزىن جانە ەكىجاقتى ىنتىماقتاستىقتى ودان ءارى دامىتۋدىڭ تىكەلەي جانە الەۋەتتى مۇمكىندىكتەرىن كورسەتەدى.
- ەكى ەلدىڭ ەكونوميكاسى ءبىر-ءبىرىن تولىقتىرادى. قازىرگى ۋاقىتتا ءبىز IT جانە سيفرلىق ەكونوميكا، يندۋستريالىق جاڭعىرتۋ جانە باسقا دا جوعارى تەحنولوگيالىق سالالاردا ىنتىماقتاستىق ورناتىپ جاتىرمىز. بۇل ەندى تەك ءداستۇرلى ساۋدا ەمەس، قازاقستان ەكونوميكاسى جاھاندىق ترەندتەرگە ىلەسىپ كەلەدى، - دەپ قوستى قىتايلىق ساراپشى.
ەسكە سالايىق، بۇعان دەيىن بەيجىڭدە قازاقستان پارلامەنتى سەناتىنىڭ ءتوراعاسى، قىتاي حالىقتىق ساياسي كونسۋلتاتيۆتىك كەڭەسى ۇلتتىق كوميتەتىنىڭ ءتوراعاسى ۆان حۋنين مەن بۇكىلقىتايلىق حالىق وكىلدەرى جينالىسى تۇراقتى كوميتەتىنىڭ ءتوراعاسى چجاو لەدزيدىڭ كەزدەسۋلەرى وتكەن بولاتىن.
سونىمەن قاتار پارلامەنت سەناتىنىڭ ءتوراعاسى، الەمدىك جانە ءداستۇرلى دىندەر ليدەرلەرى سەزى حاتشىلىعىنىڭ مەڭگەرۋشىسى ماۋلەن اشىمبايەۆ قىتايعا ساپارى اياسىندا ق ك پ و ك بىرىككەن مايدان ءبولىمىنىڭ مەڭگەرۋشىسى شي تايفەنمەن جانە قىتايدىڭ ءدىن ليدەرلەرىمەن كەزدەستى.
