سەنات ءتوراعاسى OzgeEpic كرەاتيۆ حابىنىڭ جۇمىسىمەن تانىستى
استانا. KAZINFORM - ماۋلەن اشىمبايەۆ OzgeEpic كرەاتيۆ حابىنا باردى. وندا پالاتا سپيكەرى «ەل-انا» كورمەسىنىڭ جۇمىسىمەن جانە كوماندانىڭ ءبىرقاتار ارت-پەرفورمانسىمەن تانىستى.
بۇل تۋرالى پارلامەنت سەناتىنىڭ باسپا ءسوز قىزمەتى جازدى.
حاب قىزمەتىنىڭ نەگىزگى باعىتى - ۇلتتىق قۇندىلىقتاردى دارىپتەۋ جانە ونەر سالاسىنداعى تالانتتاردى قولداۋ.
ءوز سوزىندە ماۋلەن اشىمبايەۆ قازىرگىدەي تەحنولوگيا زامانىندا كرەاتيۆتى يندۋستريانىڭ ەكونوميكالىق مۇمكىندىگى مەن كەلەشەگى زور ەكەنىن اتاپ ءوتتى. سوندىقتان مەملەكەت باسشىسى قاسىم-جومارت توقايەۆتىڭ تاپسىرماسىمەن قازاقستاندا وسى سالانى دامىتۋ باعىتىندا اۋقىمدى شارالار ىسكە اسىرىلىپ جاتىر.
«پرەزيدەنتىمىز قاسىم-جومارت كەمەل ۇلى توقايەۆ ءوزىنىڭ جولداۋىندا كرەاتيۆتى يندۋستريانى جانە زاماناۋي تەحنولوگيانى دامىتۋ جونىندە ناقتى مىندەتتەر جۇكتەدى. سونداي-اق مەملەكەت باسشىسى ءىرى قالالارمەن بىرگە اۋدانداردا دا شىعارماشىل جاستاردى قولداۋعا ارنالعان ورتالىقتار اشۋ قاجەت ەكەنىن ايتتى. سونىڭ اياسىندا وسىنداي حابتاردىڭ ماڭىزى زور. بۇل جەردە ءبىز كرەاتيۆتى الاڭداردىڭ جاي-كۇيىمەن، جۇمىسىمەن جانە الداعى جوسپارلارىمەن تانىسا الامىز. وزدەرىڭىزگە بەلگىلى، تاياۋدا كرەاتيۆتى سەكتور ءۇشىن سالىقتىق جەڭىلدىكتەر قاراستىرىلدى. وسىنداي ناقتى شارالار ەلىمىزدە بۇل سالانى دامىتۋعا تىڭ سەرپىن بەرەدى دەپ سەنەمىز»، - دەدى ماۋلەن اشىمبايەۆ.
سونىمەن قاتار سەنات ءتوراعاسى كرەاتيۆتى يندۋستريانىڭ جاعدايى ادامي كاپيتالدىڭ ساپاسىن كورسەتەتىن نەگىزگى فاكتورلاردىڭ ءبىرى ەكەنىن ايتتى. قازىرگى تاڭدا كرەاتيۆتى سەكتوردىڭ ەل ەكونوميكاسىنداعى ۇلەسى 1 پايىزدان اسپايدى. وسى كورسەتكىشتى جاقسارتۋ ءۇشىن الداعى ۋاقىتتا اتالعان يندۋستريانى دامىتۋ جولىندا جان-جاقتى، ونىڭ ىشىندە، زاڭنامالىق باعىتتا دا بىرلەسكەن ءارى جۇيەلى جۇمىس قاجەت.
«بۇل باعىتتى ءتيىمدى دامىتۋ ءۇشىن سالالىق زاڭنامانى جەتىلدىرۋ دە اسا ماڭىزدى. وسىعان وراي دەپۋتاتتار ءتيىستى جۇمىستاردى اتقارىپ جاتىر. سونداي-اق قازىر كرەاتيۆتى يندۋستريا ءبىلىم بەرۋ ۇدەرىسىنىڭ دە اجىراماس بولشەگىنە اينالعانىن كورىپ وتىرمىز»، - دەدى سەنات ءتوراعاسى.
ءىس-شاراعا مادەنيەت جانە اقپارات مينيسترلىگىنىڭ وكىلدەرى، كينورەجيسسەرلار، پروديۋسەرلەر، تەاتر اكتەرلەرى، سۋرەتشىلەر جانە باسقا دا ونەر قايراتكەرلەرى قاتىستى.
