سەنات ءتوراعاسى: اسكەردە مۇگەدەك بولىپ قالاتىنداي اۋىر جاراقات الۋ - توتەنشە جاعداي
استانا. KAZINFORM - بۇگىن سەناتتىڭ جالپى وتىرىسىندا رەزەرۆتەگى اسكەري قىزمەت تۋرالى زاڭدى قاراۋ بارىسىندا پالاتا ءتوراعاسى ماۋلەن اشىمبايەۆ قازاقستان ارمياسىنداعى رەزەرۆتەگىلەردىڭ قۇقىقتارىنا جانە ولاردى الەۋمەتتىك قورعاۋ ماسەلەلەرىنە نازار اۋداردى.
ەڭبەك جانە حالىقتى الەۋمەتتىك قورعاۋ ءبىرىنشى ۆيتسە-ءمينيسترى اقمادي سارباسوۆتىڭ سوزىنە قاراعاندا، ەگەر رەزەرۆتىك اسكەري قىزمەتتەگىلەر جاتتىعۋلار كەزىندە جاراقات الىپ، ءتىپتى مۇگەدەك بولىپ قالسا، ولارعا وتەماقى مەملەكەتىمىزدە بار نورمالار بويىنشا تولەنەدى. ال، اسكەري قىزمەتشىلەر، وفيتسەرلەر وسىنداي جاعدايعا تاپ بولسا، ولارعا تولەنەتىن تولەماقى باسقا جۇيەمەن جۇرگىزىلەدى.
سەنات ءتوراعاسى وسى ماسەلەگە باسا ءمان بەرىپ، بۇل باعىتتى ءالى دە پىسىقتاۋ قاجەت ەكەنىن ايتتى.
- ەگەر رەزەرۆيستەر اسكەري جاتتىعۋلار، ياعني 60 كۇننىڭ نەمەسە اي سايىن باراتىن ەكى-ءۇش كۇننىڭ ىشىندە جاراقات السا، ولارعا وتەماقىلار نەگە اسكەري قىزمەتشىلەرگە تولەنەتىن تولەم دەڭگەيىمەن بەرىلمەيدى؟ ولار ءوز ۇيىندە ەمەس، جۇمىسىندا ەمەس، سول اسكەري جاتتىعۋلار كەزىندە جاراقات السا، لوگيكا قايدا؟! سوندىقتان وسى ماسەلەنى تاعى دا پىسىقتاۋ كەرەك. زاڭ قابىلدانىپ، ءارى قاراي ىسكە اسىرىلا باستاعاندا، بولعان جاعدايلاردىڭ ءبارىن نازارعا الىپ، مۇقيات زەردەلەۋ قاجەت. ارينە، وفيتسەرلەر ونداي جاعدايلارعا جەتكىزبەۋگە ءتيىس. سوعان سەنەمىز. ويتكەنى اسكەردە مۇگەدەك بولىپ قالاتىنداي اۋىر جاراقات الۋ - ناعىز توتەنشە جاعداي. دەگەنمەن ءومىر بولعان سوڭ ءارتۇرلى جاعداي بولۋى مۇمكىن. سول سەبەپتى ءبارىن ەسكەرۋىمىز كەرەك. ويتكەنى بۇل - الەۋمەتتىك ماڭىزى زور ماسەلە، - دەدى ماۋلەن اشىمبايەۆ.
ايتا كەتەيىك، بۇگىن سەنات وتىرىسىندا پالاتا دەپۋتاتتارى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە رەزەرۆتەگى اسكەري قىزمەت جانە جەكەلەگەن ورتالىق مەملەكەتتىك ورگانداردىڭ فۋنكتسيالارىن قايتا ءبولۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدى ەكى وقىلىمدا قاراپ ماقۇلدادى.
زاڭ قارۋلى كۇشتەردى، باسقا دا اسكەرلەر مەن اسكەري قۇرالىمداردى رەزەرۆتىك كۇشتەرمەن قامتاماسىز ەتۋ ءۇشىن قۇقىقتىق نەگىز قالىپتاستىرۋدى كوزدەيدى.
