سەمىزدىكپەن كۇرەسۋگە ارنالعان ءدارىنى سىناقتان وتكىزەدى
لوندون. KAZINFORM - بىرىككەن كورولدىك سەمىزدىككە شالدىققان ناۋقاستاردىڭ جۇمىسقا قايتا ورالۋىنا كومەكتەسۋ ءۇشىن سالماق ازايتۋعا ارنالعان ءدارىنى سىناقتان وتكىزۋگە دايىندالىپ جاتىر، دەپ حابارلايدى Kazinform ءتىلشىسى.
ۇلى بريتانيانىڭ دەنساۋلىق ساقتاۋ ءمينيسترى ۋەس ستريتينگ قانت ديابەتى اۋرۋىن ەمدەيتىن جانە سالماق جوعالتۋعا كومەكتەسەتىن Eli Lilly كومپانياسى شىعارعان ينەكتسيالىق Mounjaro پرەپاراتىن سىناقتان وتكىزۋ جوسپارىن جاريالادى.
بۇعان دەيىن دە Mounjaro جاقسى ناتيجەلەر كورسەتتى. جاقىندا JAMA Internal Medicine جۋرنالىندا جاريالانعان زەرتتەۋگە سايكەس بۇل ءدارىنىڭ دانيالىق Novo Nordisk فارماتسيەۆتيكالىق كومپانياسى شىعارعان Ozempic جانە Wegovy سياقتى باسەكەلەس پرەپاراتتارمەن سالىستىرعاندا تيىمدىرەك ەكەندىگى انىقتالدى.
ستريتينگ سەمىزدىكتىڭ ەكونوميكالىق جانە مەديتسينالىق تۇرعىدا ۇلكەن شىعىندار اكەلەتىنىن اتاپ ءوتىپ، وسى دەرتكە شالدىققان ناۋقاستاردىڭ جىل سايىن ءتورت كۇن جۇمىسقا شىقپايتىنىن العا تارتتى. ناتيجەسىندە ۇلتتىق دەنساۋلىق ساقتاۋ جۇيەسىنە جىلىنا 11 ميلليارد فۋنت ستەرلينگ قارجىلىق شىعىن كەلەدى.
ۇلى بريتانيا ۇكىمەتى سالاۋاتتى ءومىر سالتى داعدىلارىن قالىپتاستىرۋعا دا ەرەكشە ءمان بەرۋدە. مىسالى، بالالارعا ارنالعان زياندى تاعامداردى جارنامالاۋعا تىيىم سالىپ وتىر.
ۇكىمەتتىڭ 2023 -جىلعى مالىمەتتەرىنە سايكەس، ەرەسەكتەردىڭ تورتتەن بىرىنەن استامى سەمىزدىكپەن اۋىرعان. دۇنيەجۇزىلىك دەنساۋلىق ساقتاۋ ۇيىمىنىڭ 2022 -جىلعى ەسەبىندە ۇلى بريتانيا سەمىزدىك دەڭگەيى بويىنشا ەۋروپادا مالتادان كەيىن ەكىنشى ورىندا تۇر دەپ جازىلعان.
اۆتور
عالىمجان قارامان ۇلى
