سەمەيلىك وقۋشىلار قۇنانباي اۋىلىنىڭ ۆيرتۋالدى الەمىن جاساپ شىعاردى
سەمەي. KAZINFORM - اباي وبلىسىندا مەكتەپتىڭ 9-سىنىپ تۇلەكتەرى 3D كوزىلدىرىك ارقىلى قۇنانباي اۋىلىنا ساياحات جاساۋعا مۇمكىندىك بەرەتىن جوبا جاسادى.
اباي اتىنداعى مامانداندىرىلعان مەكتەپ-گيمنازيا ينتەرناتىنىڭ 9-سىنىپ تۇلەكتەرى ارسەن قابدەشيەۆ پەن ايلات دۋلات ۇلى زامان تالابىنا ساي ەتىپ «قۇنانباي اۋىلى» ۆيرتۋالدى جوباسىن جاساپ شىعاردى.
تاريح پەن اۋىل مادەنيەتىن بۇگىنگى وسكەلەڭ ۇرپاققا جانە وزگە ۇلت وكىلدەرىنە دارىپتەۋ ماقساتىندا جاسالعان ۆيرتۋالدى اۋىلعا ەنۋ ءۇشىن كوزىلدىرىكتى تاعۋ كەرەك.
ۆيرتۋالدى اۋىلدا قاراۋىل توبە بەينەلەنگەن. 19 كيىز ءۇي تىگىلگەن. كيىز ءۇي سىرتىندا التىباقان ورناتىلعان.
«كوزىلدىرىك ارقىلى كيىز ءۇي ىشىنەن قازاق حالقىنىڭ تۇرمىس-تىرشىلىگىنەن حابار بەرەتىن زاتتاردى كورۋگە بولادى. تورگە ىلىنگەن قارا دومبىرا، قىزدىڭ جيعان جۇگىندەي بولعان قۇراق كورپەلەر، ۇلتتىق ويۋمەن ورنەكتەلگەن ساندىقتاردى كوزىلدىرىك ارقىلى جاقىننان كورىپ، كوزايىم بولا الادى. دومبىرا، قىلىش، ىدىستاردى قولمەن ۇستاپ كورۋ مۇمكىندىگى بار. جوبا ارقىلى وقۋشىلار ۆيزۋالدى الەمدەگى وبەكتىلەردى قولمەن ۇستاپ، ورنىنان قوزعاي الادى»، - دەيدى وقۋشىلاردىڭ جەتەكشىسى، ينفورماتيكا ءپانىنىڭ ءمۇعالىمى بەكزات اراشيەۆ.
بۇل ۆيرتۋالدى اۋىلدى ارسەن قابدەشيەۆ پەن ايلات دۋلات ۇلى وزدەرىنەن كەيىنگى وقۋشىلارعا ساباقتاردا پايدالانۋعا قالدىرماق.
3D مودەلدەۋ، تاريح، ادەبيەت ساباقتارىندا مۇعالىمدەر مەن وقۋشىلار قولدانادى.
سونداي- اق بۇل جوبا ماۋسىم ايىندا قۇنانباي وسكەنباي ۇلىنىڭ تۋعانىنا 220 -جىل تولۋىنا وراي وتەتىن ءىس-شاراعا ارنالىپ جاسالعان.
اباي وبلىسى ءبىلىم باسقارماسى باسپا ءسوز قىزمەتىنىڭ مالىمەتىنشە، جوبانىڭ 3D ماكەتتەرى Blender پروگرامماسىندا جاسالىپ، Unity پروگرامماسى ارقىلى اۋىل ىشىندە جانە قازاق ءۇيدىڭ ىشىندە قوزعالىپ ءجۇرۋ ءۇشىن تەلەپورت قوسىلدى.
ءۇي ىشىندەگى زاتتاردى قولمەن ۇستاپ كورۋ ءۇشىن فيزيكا كىرىكتىرىلدى.
بۇعان دەيىن اۆتورلار ەكىنشى دۇنيەجۇزىلىك سوعىستا قولدانىلعان قارۋ- جاراق پەن اسكەري تەحنيكا ماكەتتەرى ورنالاسقان ۆيرتۋالدى مۇراجاي جاساعان.
سونداي- اق «جيدەبايعا ۆيرتۋالدى ساياحات»، «ۆيرتۋالدى قازاق ءۇي» جوبالارىن دا ىسكە اسىردى.
