سەمەيدە وقىپ جۇرگەن پاكىستاندىق ستۋدەنت ابايدىڭ بارلىق ولەڭىن جاتقا بىلەدى

سەمەيدەگى شاكارىم ۋنيۆەرسيتەتىندە ابايدىڭ بارلىق ولەڭدەرىن جاتقا بىلەتىن پاكىستاندىق ستۋدەنت ءبىلىم الىپ جاتىر، دەپ حابارلايدى Kazinform.

ناقتىلاپ ايتقاندا، مۋحامماد ۋساما شاحيد - پاكىستان ەلىنىڭ پەندجاب وبلىسى چينيوت قالاسىنان كەلگەن. جاس ىزدەنىمپاز 7 ءتىلدى بىلەتىن پوليگلوت.

ۋسامانىڭ ايتۋىنشا، ول بالالىق شاعىن ورتا ازيادا وتكىزگەندىكتەن ت م د ەلدەرىندەگى اتموسفەرا مەن ءومىر سالتى واعان قاتتى ۇناعان. ارنايى قازاق ءتىلى مەن قازاق حالقىنىڭ مادەنيەتىن، ۇلتتىق قۇندىلىقتارىن ۇيرەنگىسى كەلدى.

«قازاق حالقىنىڭ بولمىسى مەن تانىمىن قازاقتىڭ ۇلى اقىنى اباي قۇنانباي ۇلىنىڭ ولەڭدەرى ارقىلى تۇسىنە باستادى. عالامتوردان اقىننىڭ ءومىربايانىن زەرتتەۋ ارقىلى قاسيەتتى اباي وڭىرىنە كەلىپ، اتالعان ءبىلىم ورداسىن تاڭداعان.

بارشاڭىزعا بەلگىلى، ۇلى اباي اتامىزدىڭ ولەڭدەرىن جاتتاۋ وڭايعا سوعا بەرمەيدى. سولاي بولا تۇرسا دا، العان بەتىنەن قايتپاي ۇلى دانىشپاننىڭ مۇرالارىنا دەن قويعاندىعى بارشامىزدى تاڭقالدىرعانى جاسىرىن ەمەس. ۋساما - ۋنيۆەرسيتەتتىڭ بەلسەندى ستۋدەنتتەرىنىڭ ءبىرى. جاز بويى قابىلداۋ كوميسسياسىندا قىزمەت اتقارىپ، ءتۇرلى سپورتتىق شارالاردىڭ جەڭىمپازى اتاندى. ءتىل ۇيرەنۋدە ول ءارتۇرلى كىتاپتاردى، ماقالالاردى وقىپ، جاڭالىقتاردى تىڭداپ، قازاق تىلىندەگى تەلەحيكايالار مەن فيلمدەردى ۇنەمى كورەدى»، - دەپ جازدى عىلىم جانە جوعارى ءبىلىم ءمينيسترى ساياسات نۇربەك.

سونىمەن قاتار شەتەلدىك ستۋدەنت Instagram الەۋمەتتىك جەلىسىندە كۇندەلىكتى قازاق ءتىلىن ۇيرەتەتىن توپتارعا جازىلعان.

«ابايدى ساناسىنا سەرىك ەتكەن، وقۋعا قۇشتار، بىلىمگە دەگەن تالپىنىسى كۇشتى ۋساماداي جاس ورەنگە قاشاندا ساتتىلىك سەرىك بولسىن دەيمىن.

شاكارىم اقىن ايتقانداي:

بۇل اباي ساۋداگەر عوي اقىل ساتقان،

ءارتۇرلى اسىلى كوپ وتپەي جاتقان.

تەگىن بىلسەڭ - الاسىڭ، بوس بەرەدى،

تۇستاسىنان ەشكىم جوق مۇنى تاپقان، - دەگەن ءسوزىن سيمۆول ەتەتىن جاستاردىڭ قاتارى كوبەيە بەرسىن»، - دەگەن مينيستر.

ۋساما كەلەشەكتە اۋدارماشى بولىپ قىزمەت اتقارعىسى كەلەدى. قازاق تىلىندەگى ولەڭدەر مەن اڭگىمەلەردى ۋردۋ جانە پەندجاب تىلدەرىنە اۋدارۋعا نيەتتى.