سەمەيدە سوققىعا جىعىلعان وقۋشىنىڭ وتباسىنا باسپانا الىپ بەرەدى
سەمەي. KAZINFORM - اباي وبلىسىنىڭ بالا قۇقىقتارى جونىندەگى وڭىرلىك ۋاكىلى ەلزيرا سولتابايەۆا وتباسىعا كورسەتىلىپ جاتقان قولداۋ شارالارى جونىندە اقپارات بەردى.
ونىڭ ايتۋىنشا كوپشىلىكتىڭ قولداۋىمەن جينالعان قاراجات باسپانا ساتىپ الۋعا جۇمسالادى.
- تولىق مەديتسينالىق تەكسەرۋدەن وتكەن بالاعا قاجەت پسيحولوگيالىق كومەك كورسەتىلىپ، وتباسىعا قۇقىقتىق قولداۋ ۇيىمداستىرىلدى. قازىرگى تاڭدا وتباسىنىڭ جاقىن تۋىسىنىڭ ەسەپشوتىنا 24 ميلليون تەڭگە جينالدى. بۇل قاراجات باسپانا ساتىپ الۋعا باعىتتالادى، - دەدى ول.
ۋاكىلدىڭ مالىمەتىنشە قارجىنىڭ ءادىل ءارى اشىق جۇمسالۋىن باقىلاۋ ءۇشىن وبلىستىق جانە قالالىق ءماسليحات دەپۋتاتتارى، ادۆوكاتتار مەن قوعامدىق ۇيىم وكىلدەرى كىرەتىن ارنايى كوميسسيا قۇرىلىپ جاتىر.
- كومەك كورسەتۋ پروتسەسى اشىقتىق پەن ادىلدىك قاعيدالارىنا نەگىزدەلەدى. قوعامنىڭ ۇلكەن قولداۋىن ەسكەرە وتىرىپ، تۇرعىن ءۇيدى تاڭداۋ جانە ساتىپ الۋ بارىسى اشىق وتەدى، - دەپ اتاپ ءوتتى ەلزيرا سولتابايەۆا.
سونىمەن قاتار ول وتباسىنىڭ ەل تۇرعىندارىنا بىلدىرگەن شىنايى ريزاشىلىعىن جەتكىزدى.
ەسكە سالساق، سەمەيدە جاسوسپىرىمدەر التىنشى سىنىپ وقۋشىسىن سوققىعا جىققانى حابارلانعان.
سونداي- اق 6-سىنىپ وقۋشىسى سوققىعا جىعىلعان مەكتەپ ديرەكتورى جۇمىستان شىعارىلىپ، وقۋشىنى سوققىعا جىققان 3 جەتكىنشەكتىڭ اكە- شەشەسى اتا-انالىق قۇقىعىنان ايىرىلعانى حابارلانعان.
