سەمەيدە سوققىعا جىعىلعان وقۋشىنىڭ وتباسىنا 24 ميلليون تەڭگە جينالدى
استانا. قازاقپارات - قازاقستاندىقتار سەمەيدە قاتارلاستارى اياۋسىز ۇرىپ-سوققان بالانىڭ وتباسىنا كومەكتەستى. بۇل تۋرالى وبلىستىڭ بالا قۇقىقتارى جونىندەگى ۋاكىلى ەلزيرا ءجۇنىسوۆا مالىمدەدى، - دەپ حابارلايدى Massaget.kz.
ونىڭ ايتۋىنشا، زارداپ شەككەن بالا تولىق مەديتسينالىق تەكسەرىستەن ءوتىپ، پسيحولوگيالىق كومەك الىپ جاتىر.
«بالانىڭ وتباسىنا كومەكتەسۋ تۋرالى سۇراقتار ءتۇسىپ جاتىر. ونىڭ اپكەسىنىڭ شوتىنا 24 ميلليون تەڭگە جينالعانى بەلگىلى بولدى، ونى باسپانا ساتىپ الۋعا جۇمساۋ جوسپارلانىپ وتىر. (...) وتباسى قازاقستاندىقتارعا كورسەتكەن قولداۋى ءۇشىن شىن جۇرەكتەن العىس بىلدىرەدى»، - دەپ جازدى ءجۇنىسوۆا.
بالا قۇقىقتارى جونىندەگى ۋاكىل ءۇي تاڭداۋ جانە ساتىپ الۋ پروتسەستەرىنىڭ اشىقتىعى ءۇشىن وڭىرلىك، قالالىق ءماسليحاتتار دەپۋتاتتارىنان، ادۆوكاتتار مەن قوعامدىق بىرلەستىكتەر وكىلدەرىنەن ارنايى كوميسسيا قۇرىلاتىنىن مالىمدەدى.
ەسكە سالايىق، بۇعان دەيىن اباي وبلىسىنىڭ پوليتسياسى جوعارى سىنىپ وقۋشىلارى 6-سىنىپ وقۋشىسىن سوققىعا جىققان وقيعا بويىنشا قىلمىستىق ءىس قوزعادى. بۇل وقيعانىڭ ۆيدەوسى الەۋمەتتىك جەلىدە تاراپ كەتتى.
كەيىنىرەك سەمەيدە كوميسسيا مەكتەپ وقۋشىسىن جاسوسپىرىمدەر سوققىعا جىققان وقيعا بويىنشا شەشىم شىعاردى.
«كوميسسيا ناتيجەلەرى بويىنشا وقيعاعا قاتىسۋشىلاردى ۋاقىتشا وقشاۋلاۋ جاعدايىندا تۇزەتۋ جانە پسيحولوگتارمەن جۇمىس ىستەۋ ماقساتىندا ديەۆيانتتى مىنەز-قۇلىقتاعى بالالارعا ارنالعان مامانداندىرىلعان مەكتەپكە جىبەرۋ ۇسىنىلدى. كوميسسيا ءۇش اتا-انانى اتا-انا قۇقىعىنان ايىرۋ جانە ءبىر وكىلدىڭ ەكى بالاعا قامقورشىلىعىن توقتاتۋ تۋرالى ۇسىنىس جاسادى»، - دەپ جازىلعان حابارلامادا.
بۇل ىسكە قاتىستى ماتەريالدار سوتقا جىبەرىلگەن، سوڭعى شەشىم سوتتا قابىلدانادى. كامەلەتكە تولماعاندار ءىسى جونىندەگى سوت جاسوسپىرىمدەر مامانداندىرىلعان مەكەمەدە بولاتىن مەرزىمدى انىقتاپ، اتا-انا قۇقىعىنان ايىرۋ تۋرالى تۇپكىلىكتى قاۋلى شىعارادى.
