سەمەيدە جاڭا جىل شىرشاسى مەن ءتۇرلى ءىس-شارالار ۇيىمداستىرۋعا 30 ميلليون تەڭگە جۇمسالماق
سەمەي. KAZINFORM - جاڭا جىل مەرەكەسى قارساڭىندا 2019 -جىلدان بەرى سەمەيدەگى ورتالىق الاڭعا ورناتىلىپ كەلە جاتقان شىرشا بىلتىر قاتتى جەلدەن بۇلىنگەن ەدى. بيىل ونىڭ ورنىنا بيىكتىگى 20 مەترلىك جاساندى شىرشا قويىلماق.
سەمەي قالاسىندا جاڭا جىل مەرەكەسىنە وراي ورتالىق الاڭعا شىرشا ورناتۋ، بەزەندىرۋ جانە جارىقتاندىرۋ جۇمىستارى جۇرگىزىلمەك. سونداي-اق ءتۇرلى ءىس-شارالار ۇيىمداستىرىلادى. بۇل تۋرالى Kazinform اگەنتتىگىنىڭ رەسمي ساۋالحاتىنا جاۋاپ جولداعان اباي وبلىسى اكىمىنىڭ ورىنباسارى ديميتري گاريكوۆ ءمالىم ەتتى.
- ونىڭ ىشىندە ورتالىق الاڭ مەن م. اۋەزوۆ الاڭىندا جاڭا جىلدىق شىرشانى سالتاناتتى جاعۋ ءراسىمى، تەاترلاندىرىلعان قويىلىمدار، انيماتورلاردىڭ قاتىسۋىمەن شوۋ-باعدارلامالار مەن كونتسەرتتىك نومىرلەر ۇيىمداستىرىلادى. قالا اۋماعى مەن كوشەدەگى اعاشتار مەرەكەلىك اشەكەيلەرمەن بەزەندىرىلەدى. تۇرعىندار ءۇشىن ورتالىق الاڭدا، ارباتتا، ەرتىس وزەنىنىڭ جاعالاۋىندا، م. اۋەزوۆ الاڭىندا شاعىن ساۋلەتتىك پىشىندەر (م ا ف) ورناتۋ جوسپارلانعان. بۇل پىشىندەر 2022-2023 -جىلداردان بەرى ءىشىنارا پايدالانىلىپ كەلەدى، - دەدى ول.
جاڭا جىل قارساڭىندا از قامتىلعان جانە كوپبالالى وتباسىلاردان شىققان بالالارعا ارنالعان شارالار دا قولعا الىنىپ، بۇلدىرشىندەرگە سىيلىقتار بەرىلمەك. اباي وبلىسى بويىنشا مۇگەدەكتىگى بار بالالارعا ارنالعان جانە باسقا دا ارنايى الەۋمەتتىك قىزمەت كورسەتۋ ورتالىقتارىندا 23-28-جەلتوقسان ارالىعىندا جاڭاجىلدىق اكسيا ۇيىمداستىرىلادى.
- سەمەيدە 2019 -جىلى ساتىپ الىنعان شىرشا قاتتى جەل سالدارىنان بۇلىنگەن. وسىعان بايلانىستى ول بيىل اۋىستىرىلادى. شىرشا الۋعا، قالانى بەزەندىرۋگە جانە جاڭا جىلدى اتاپ وتۋگە بايلانىستى وتكىزىلەتىن بارلىق شارانى قوسا ەسەپتەگەندە 30 ميلليون تەڭگەگە جۋىق قارجى ءبولىندى. بيىكتىگى 20 مەتر بولاتىن جاساندى شىرشا تاۋەلسىزدىك كۇنىنەن كەيىن ورناتىلادى. جاڭاجىلدىق وتشاشۋ 1-قاڭتار كۇنى ساعات تۇنگى 01:00-دە بولادى، - دەدى ديميتري گاريكوۆ.
وبلىس اكىمىنىڭ جاڭا جىلدىق شىرشاسىن «تايقازان» سالتانات زالىندا 24-جەلتوقسان ساعات 14:00-دە جانە 25 جەلتوقسان ساعات 11:00-دە وتكىزۋ جوسپارلانىپ وتىر. وعان ەرەكشە ءبىلىم بەرۋدى قاجەت ەتەتىن بالالار، 9-13 جاس ارالىعىنداعى جەتىم بالالار، اتا-اناسىنىڭ قامقورلىعىنسىز قالعان، از قامتىلعان، كوپبالالى وتباسىلاردان شىققان بالالار، وقۋدا، سپورتتا، شىعارماشىلىقتا نەمەسە قوعامدىق ومىردە جەتىستىككە جەتكەن دارىندى بالالار شاقىرىلعان. جيىنى - 250 بالا. سونىمەن قاتار قالاداعى ورتالىق الاڭدا مۇز ايدىنى ۇيىمداستىرىلادى.
اۆتور
تالعاتجان مۇحامەتبەك ۇلى
