سەمەيدە بۇزاقىلاردان زارداپ شەككەن بالا ەندى بوكسپەن اينالىسادى

استانا. KAZINFORM - سەمەي قالاسىندا بۇزاقىلاردىڭ ارەكەتىنەن زارداپ شەككەن 11 جاستاعى بالاعا ق ر ىشكى ىستەر مينيسترلىگىنىڭ «دينامو» دەنە شىنىقتىرۋ-سپورت قوعامى قولداۋ كورسەتتى، - دەپ جازدى Polisia.kz.

سەمەي قالاسىندا بولعان بۇزاقىلىق وقيعاسى قازاقستاندىقتاردى بەيجاي قالدىرمادى. قوعامنىڭ جاپپاي قولداۋىنىڭ ارقاسىندا مەكتەپ وقۋشىسى مەن ونىڭ وتباسى جالعىز ەمەس ەكەنىن سەزىندى. بۇل ىسكە پوليتسيا ۆەدومستۆوسىنىڭ باسشىلىعى ەرەكشە ءمان بەرىپ، تەرگەۋدى جەكە باقىلاۋىنا الدى.

جاس ءوسپىرىمنىڭ بولاشاعىنا الاڭداۋشىلىق بىلدىرگەن ق ر ىشكى ىستەر مينيسترلىگىنىڭ «دينامو» دەنە شىنىقتىرۋ-سپورت قوعامى ونى ءوز قامقورلىعىنا الىپ، سپورت ارقىلى جىگەرلەندىرمەك. دينامولىقتار بالاعا تالىمگەرلىك كورسەتىپ، سەنىمدىلىگىن نىعايتۋعا، ءوزىن قورعاي بىلۋگە ۇيرەتۋدى ماقسات تۇتىپ وتىر.

اباي وبلىسى پوليتسيا دەپارتامەنتىنىڭ باستىعى بەكتورە سۇلتان سەمەيدەگى «دينامو» سپورت كەشەنىندە جاس ءوسپىرىمدى قارسى الىپ، وعان جاس سپورتشىلارمەن بىرگە زالدى ارالاتىپ، جاتتىعۋ پروتسەسىمەن تانىستىردى.

- ءبىز بالاقاي ءوزىن ەشقاشان جالعىز سەزىنبەۋى ءۇشىن بار كۇشىمىزدى سالامىز. سپورت - تەك دەنەنى شىنىقتىرۋ عانا ەمەس، ول مىنەزدى قالىپتاستىرىپ، قيىندىقتاردى جەڭۋگە ۇيرەتەدى. ەڭ باستىسى - سپورتتىق ورتا ناعىز وتباسى سياقتى، سەنىمدى تىرەك بولا الادى، - دەپ اتاپ ءوتتى دەپارتامەنت باسشىسى.

بالا اسىرەسە بوكسشىلاردىڭ جاتتىعۋىن قىزىعۋشىلىقپەن تاماشالادى. بۇل سپورت ءتۇرى وعان بۇرىننان ۇنايتىنىن ايتقان جاس ءوسپىرىم ەندى «دينامو» مامانداندىرىلعان جاتتىقتىرۋشىلارىنىڭ جەتەكشىلىگىمەن تەگىن جاتتىعۋ مۇمكىندىگىنە يە بولدى. سول كۇنى-اق ول العاشقى سوققىسىن بوكس گرۋشاعا باعىتتاپ، ءوز كۇشىن سىناپ كوردى. جاتتىعۋ سوڭىندا وعان «دينامو» سپورتتىق فورماسى تابىس ەتىلدى.

- ەندى ول تۇراقتى تۇردە جاتتىعىپ، كۇش-قۋاتىن ارتتىرىپ، ءوز-وزىنە دەگەن سەنىمدىلىگىن نىعايتاتىن بولادى. ەگەر جاقسى ناتيجە كورسەتسە، كەلەسى قادامى «جاس ساقشى» پوليتسەيلىك سىنىپتارىنىڭ قاتارىنا قوسىلۋ بولماق. مۇندا ول قۇقىقتىق ءتارتىپ پەن تارتىپتىلىك تۋرالى قۇندى ءبىلىم الادى، - دەپ مالىمدەدى پوليتسيا دەپارتامەنتىنىڭ وكىلدەرى.

بۇل باستاما - بالانىڭ ومىرىنە تىڭ سەرپىن بەرىپ قانا قويماي، ونىڭ بولاشاعىنا دەگەن سەنىمىن كۇشەيتەتىن ماڭىزدى قادام.

ايتا كەتەيىك، سەمەيدە جاسوسپىرىمدەر التىنشى سىنىپ وقۋشىسىن سوققىعا جىقتى.

سەمەيدە 6-سىنىپ وقۋشىسىن سوققىعا جىققان 3 جەتكىنشەكتىڭ اكە-شەشەسى اتا-انالىق قۇقىعىنان ايىرىلدى.

بىلىكتى ماماندار جاسوسپىرىمنىڭ پسيحولوگيالىق جاعدايىن قالپىنا كەلتىرۋ ءۇشىن جۇمىس جۇرگىزىپ جاتىر.

سەمەيدە 6-سىنىپ وقۋشىسى سوققىعا جىعىلعان مەكتەپ ديرەكتورى جۇمىستان شىعارىلدى.

سەمەيدە سوققىعا جىعىلعان وقۋشىنىڭ وتباسىنا باسپانا الىپ بەرەدى.

اۆتور

ەلميرا ورالبايەۆا