سەمەي يادرولىق قاۋىپسىزدىك ايماعى قۇرىلدى

بۇگىننەن باستاپ «سەمەي يادرولىق قاۋىپسىزدىك ايماعى تۋرالى» زاڭ كۇشىنە ەندى. وسىلايشا سەمەي يادرولىق قاۋىپسىزدىك ايماعى قۇرىلدى، دەپ حابارلايدى Kazinform.

ەستەرىڭىزگە سالا كەتەيىك، 2023-جىلدىڭ 5- شىلدەسىندە مەملەكەت باسشىسى «سەمەي يادرولىق قاۋىپسىزدىك ايماعى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سەمەي يادرولىق قاۋىپسىزدىك ايماعى، ەكولوگيا جانە ەلەكتر ەنەرگەتيكاسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭدارعا قول قويعان بولاتىن.

اتالعان قۇجاتتار بۇگىننەن باستاپ كۇشىنە ەندى.

زاڭ نورمالارىنا سايكەس بۇرىنعى سەمەي يادرولىق سىناق پوليگونىندا سەمەي يادرولىق قاۋىپسىزدىك ايماعىن قۇرۋ جوسپارلانعان.

بۇل اۋماق يادرولىق جانە رادياتسيالىق قاۋىپسىزدىكتى قامتاماسىز ەتۋ، سونداي-اق بۇرىنعى سەمەي يادرولىق سىناق پوليگونىنىڭ اۋماعىنداعى جەرلەردى شارۋاشىلىق اينالىمعا بىرتىندەپ قايتارۋ ءۇشىن وڭالتۋ ماقساتىندا قۇرىلادى.

ارناۋلى ايماقتى كەشەندى ەكولوگيالىق تەكسەرۋ جانە مەملەكەتتىك ەكولوگيالىق ساراپتاما ناتيجەلەرى بويىنشا انىقتالعان لاستانعان ۋچاسكەلەردە قۇرۋ جوسپارلانعان.

«سەمەي يادرولىق قاۋىپسىزدىك ايماعى تۋرالى» زاڭدا مىنا ماسەلەلەر قاراستىرىلعان:

- بۇرىنعى سەمەي سىناق پوليگونى جەرلەرىندە جانە نورماتيۆتەن تىس راديواكتيۆتى لاستانۋعا ۇشىراعان ىرگەلەس اۋماقتاردا «سەمەي يادرولىق قاۋىپسىزدىك ايماعى» ارناۋلى ايماعىن قۇرۋ؛

- راديواكتيۆتى لاستانۋدىڭ تارالۋىن شەكتەۋ؛

- پوليگون اۋماعىنداعى راديواكتيۆتى قالدىقتاردى جيناۋ، ورنالاستىرۋ جانە كادەگە جاراتۋ ارقىلى سەمەي يادرولىق قاۋىپسىزدىك ايماعىنىڭ اۋماعىن وڭالتۋ؛

- سەمەي يادرولىق قاۋىپسىزدىك ايماعىنداعى راديواكتيۆتى لاستانۋ دەڭگەيىنە ۇزدىكسىز مونيتورينگ جۇرگىزۋ.