سلوۆاكيا پرەمەر-مينيسترىنە نە ءۇشىن قاستاندىق جاسالدى

Дәрігерлер Словакия премьер-министрінің өмірі үшін күресіп жатыр
فوتو: Petr David Josek/AP

استانا. KAZINFORM - سلوۆاكيانىڭ پرەمەر-ءمينيسترى روبەرت فيسوعا جاسالعان شابۋىل ەل حالقى مەن بيلىگىن قاتتى كۇيزەلتتى. دارىگەرلەر ۇكىمەت باسشىسىنىڭ ءومىرى ءۇشىن كۇرەسىپ جاتىر، دەپ حابارلايدى Euronews.

سلوۆاكيا پرەمەر-ءمينيسترى روبەرت فيسوعا قاستاندىق جاساۋدىڭ ءمان-جايىن انىقتاعان العاشقى تەرگەۋ قىلمىستىڭ ساياسي سەبەپتەرىن كورسەتەدى. بۇل تۋرالى ەلدىڭ ىشكى ىستەر مينيسترلىگىنىڭ باسشىسى ماتۋش شۋتاي-ەشتوك مالىمدەدى.

سلوۆاكيانىڭ قورعانىس ءمينيسترى روبەرت كالينياكتىڭ حابارلاۋىنشا، دارىگەرلەر ۇكىمەت باسشىسىنىڭ ءومىرى ءۇشىن كۇرەسىپ جاتىر. بۇل مالىمدەمە جاسالعان كەزدە دارىگەرلەر وعان وتا جاساپ جاتقان.

«پرەمەر-مينيستر روبەرت فيسو وسىندا، بانسكا-بيستريتساداعى اۋرۋحانادا ەمدەلىپ جاتىر. ەلدىڭ قورعانىس ءمينيسترى مەن ىشكى ىستەر مينيسترلىگى باسشىلارىنىڭ قاتىسۋىمەن وتكەن باسپا ءسوز ءماسليحاتى جاقىندا عانا اياقتالدى. پرەمەر-مينيسترگە جاسالعان شابۋىل ەلدى جانە فيسو ۇكىمەتىنىڭ مينيسترلەرىن قاتتى كۇيزەلتكەنى انىق. بۇل وقيعا سلوۆاكياداعى تەرەڭ ساياسي قايشىلىقتاردى كورسەتتى»، - دەپ حابارلايدى Euronews ءتىلشىسى گابور تاناچ.

ناۋقان كەزىندە روبەرت فيسونىڭ SMER پارتياسى دەموكراتياعا نۇقسان كەلتىردى دەپ ايىپتالدى. فيسو مەن ونىڭ پارتياسى وپپوزيتسيانى باتىسقا «ەلدى ساتتى» دەپ ايىپتادى. قورعانىس ءمينيسترى روبەرت كالينياكتىڭ مالىمدەۋىنشە، پرەمەر-مينيسترگە جاسالعان قاستاندىق ەلدىڭ ازاماتتىق سوعىستىڭ الدىندا تۇرعانىن كورسەتتى.

پرەزيدەنت زۋزانا چاپۋتوۆا سلوۆاكيادا جەك كورۋشىلىكتى توقتاتۋ كەرەك ەكەنىن ايتتى.

ر. فيسوعا شابۋىل 15-مامىردا تۇستەن كەيىن جاسالدى. وقيعا گاندلوۆاداعى ۇكىمەتتىڭ كوشپەلى وتىرىسىنا كەيىن بولدى. فيسو وق جاراقاتىن الىپ، اۋرۋحاناعا جەتكىزىلدى. كۇدىكتى وقيعا ورنىندا ۇستالدى.

اۆتور
زارينا تۋعانبايەۆا

سوڭعى جاڭالىقتار