سلوۆاكيا پرەمەر-ءمينيسترى قاستاندىق جاساعان ادامدى كەشىرەتىنىن ايتتى
استانا. KAZINFORM - سلوۆاكيا پرەمەر-ءمينيسترى روبەرت فيتسو اۋىر جاراقات العان قاستاندىقتان كەيىن العاشقى بەينەۇندەۋ جاسادى. ول شابۋىلداۋشىنى جەك كورمەيتىنىنە سەندىردى، دەپ حابارلايدى Euronews.

سلوۆاكيانىڭ پرەمەر-ءمينيسترى روبەرت فيتسو جەلىدە بەينەۇندەۋ جاريالادى. بۇل - ونىڭ ءۇش اپتا بۇرىن - قاستاندىق جاسالعان كەزدە اۋىر جاراقات العاننان كەيىنگى العاش رەت جۇرت الدىنا شىعۋى.
ەۋروپارلامەنت سايلاۋى قارساڭىندا ءوزىنىڭ Facebook پاراقشاسىندا جاريالانعان بەينەدە فيتسو شابۋىل ونىڭ دەنساۋلىعىنا اۋىر زيان تيگەنىن جانە ەگەر ول بىرنەشە اپتادان كەيىن جۇمىسقا ورالسا، بۇل «كىشكەنتاي عاجايىپ» بولاتىنىن ايتتى.
ەسكە سالا كەتسەك، قاستاندىق 15-مامىردا ر. فيتسوعا سلوۆاكيانىڭ گاندلوۆ قالاسىندا ۇكىمەتتىڭ كوشپەلى وتىرىسى وتكەننەن كەيىن حالىق الدىنا شىققان كەزدە جاسالدى.
سوت پرەمەر-مينيستر روبەرت فيتسونىڭ ومىرىنە قاستاندىق جاسادى دەگەن كۇدىككە ىلىنگەن 71 جاستاعى زەينەتكەر جانە «وزىق سلوۆاكيا» وپپوزيتسيالىق ليبەرالدىق پارتيانىڭ جاقتاۋشىسى يۋراي تسينتۋلانى قاماۋعا الدى.
پرەمەر-مينيستر ماۋسىم مەن شىلدە ايلارىنىڭ توعىسىندا جۇمىسقا ورالادى دەپ جوسپارلانعان جانە ول شابۋىلداۋشىنى «جەك كورمەيتىنىن» ايتتى.
«مەن ونى كەشىرەمىن»، - دەدى روبەرت فيتسو.
اۆتور
زارينا تۋعانبايەۆا