سۇلۋلىق سالونىندا پلاستيكالىق وپەراتسيا جاسايتىندار كوبەيدى - حيرۋرگ
الماتى. KAZINFORM - قازىر ەكىنىڭ ءبىرى پلاستيكالىق وپەراتسيا جاساتۋعا بەيىم. اسىرەسە، بۇل قادامعا ۇنەمى سۇلۋ بولىپ قالعىسى كەلەتىن قىز-كەلىنشەكتەر بارادى. ونىڭ ادام دەنساۋلىعىنا زيانى بار ما، قانداي جاعدايدا جاساۋعا بولمايدى؟ وسى جانە وزگە سۇراقتارعا پلاستيكالىق حيرۋرگ گۇلميرا قوبلاندينا جاۋاپ بەردى.

-پلاستيكالىق حيرۋرگيا- مەديتسيناداعى جاڭا سالالاردىڭ ءبىرى. ونىڭ قوعامداعى ءرولى قانداي؟
- پلاستيكالىق وپەراتسيانىڭ نەگىزگى ەكى ءتۇرى بار: رەكونسترۋكتيۆتى جانە ەستەتيكالىق. رەكونسترۋكتيۆتى وپەراتسيالار دەنەسىندە تۋا ءبىتتى كەمىستىگى بار ادامدارعا نەمەسە ابايسىزدا بولعان جاراقاتتىڭ زاردابى دۇرىس جازىلۋى ءۇشىن جاسالادى. مىسالى، حالىق اراسىندا «قويان ەرىن، قاسقىر تاڭداي، قويانجىرىق» دەپ اتالىپ كەتكەن اقاۋلارعا رەكونسترۋكتيۆتى وپەراتسيا جاسالادى. ال ەستەتيكالىق وپەراتسيا جاساۋ ارقىلى پلاستيكالىق حيرۋرگ ءوز كەلبەتىن وزگەرتكىسى كەلەتىندەرگە كومەكتەسەدى. ءبىزدىڭ كلينيكا ەستەتيكالىق پلاستيكالىق حيرۋرگيامەن اينالىسادى.

- قازىر بەتتىڭ ءاجىمىن تارتۋ، كوزدىڭ قاباعىن جاساۋ، قالقان قۇلاقتى، قيسىق مۇرىندى تۇزەتەتىن ورتالىقتاردىڭ سانى ارتتى. قالاي ويلايسىز پلاستيكالىق وپەراتسيا جاساۋ سانگە اينالىپ بارا ما؟
- جوق. ترەندكە اينالدى دەپ ويلامايمىن. بۇرىن، قىز-كەلىنشەكتەر وپەراتسيا جاساتقىسى كەلسەدە ماماندار از بولدى، سوندىقتان ەستەتيكالىق وپەراتسيالاردى حالىق تەك تەلەديداردان كورەتىن. ءبىراق، سوڭعى ون جىلدا ەستەتيكالىق حيرۋرگيا قارقىندى دامىپ كەلەدى. وسى ۋاقىت ىشىندە اتالعان وپەراتسيالارى جاساۋمەن اينالىساتىن ورتالىقتار اراسىندا باقتالاستىق پايدا بولدى. قازىرگى تاڭدا ءبىز كاسىبي بىلىكتىلىگىمىزدى كوتەرۋ ءۇشىن شەت ەلدىڭ الدىڭعى قاتارلى كلينيكالارىندا ءبىلىم الماسىپ، تاجىريبەدەن ءوتىپ ءجۇرمىز. ءومىر زاڭدىلىعى بويىنشا باقتالاستىق بار جەردە ءوسۋ، وركەندەۋ بولادى. ساپاسى ارتادى، سۇرانىس جوعارىلايدى. سونداي-اق، ماماندار ءبىلىمىن جەتىلدىرە تۇسەدى. ارينە، پلاستيكالىق حيرۋرگيا دامىعان سايىن سۇرانىس تا وسە بەرەدى. قازىر قىز- كەلىنشەكتەر وزدەرىنە ەرەكشە كوڭىل بولە باستادى. دەنە ءبىتىمىن جاقسارتىپ، ادەمى بولىپ جۇرگىسى كەلەدى.
- ءوزىڭىز قىزمەت ەتەتىن كلينيكادا پلاستيكالىق وتانىڭ قانداي ادىستەرى قولدانىلادى؟
- پلاستيكالىق وپەراتسيا جاسايتىن ءار كلينيكانىڭ وزىندىك ءادىس، ءتاسىلى بولادى. ماسەلەن، ءبىزدىڭ ورتالىق وڭتۇستىك كورەيانىڭ ءستيلىن قولدانادى. نەگە؟ ويتكەنى، ول ەلدە ءبىر حيرۋرگ ارى كەتكەندە ەكى ءتۇرلى عانا وپەراتسيانى مەڭگەرگەن. قازاقستاندا ءبىر حيرۋرگ بەت، كوز، كەۋدە جانە باسقا دا وپەراتسيا تۇرلەرىن جاساي بەرەدى. سوندىقتان ءبىز وسى باعىتتى ۇستانىپ، جوعارى ماقساتتى مامانداردى دايىنداۋدى ماقسات ەتتىك. دارىگەرلەر جىلىنا 3-4 رەت شەتەلدە تاجىريبە الماسادى. مىسالى، ءبىزدىڭ كلينيكادا 10 شاقتى حيرۋرگ جۇمىس ىستەيدى جانە بلەفاروپلاستيكا، فەيسليفتينگ (بەتتى تارتۋ)، رينوپلاستيكا (مۇرىن پلاستيكاسى)، مامموپلاستيكا (ومىراۋ پلاستيكاسى)، ابدومينوپلاستيكا (ءىش تارتۋ) وتالارى جاسالادى.
-كوبىنە قانشا جاستاعىلار جۇگىنەدى؟
- پلاستيكالىق وتانى جاساتۋدىڭ ناقتى بەلگىلەنگەن جاسى جوق. كامەلەتكە تولعان كەز كەلگەن ادامعا بولادى. كوپ جاعدايدا شەكتەۋ ناۋقاستاردىڭ دەنساۋلىعىنا بايلانىستى. مىسالى: ءىشتى تارتۋ وتاسىنا 18 بەن 52 جاس اراسىنداعى قىز-كەلىنشەكتەردى الامىز، سونىمەن قوسا شەكتەۋ ول ارتىق سالماق بويىنشا. بەتتى تارتۋ وپەراتسياسىنا 35-65 جاستاعىلار جۇگىنەدى. 18-40 جاستاعى قىز- كەلىنشەكتەر كوبىنە مامموپلاستيكا مەن رينوپلاستيكاعا كەلەدى. ال، كەيدە ءبىر پاتسيەنتكە 2-3 ءتۇرلى وتا ءبىر مەزەتتە ىستەلەدى.
-كۇنىنە بەت الپەتىن وزگەرتكىسى كەلەتىن قانشا ادام كەلەدى؟
- كۇنىنە 5-8 پاتسيەنتتى قابىلدايمىز. ءبىر ايدا شامامەن 100 دەن استام ادامعا قىزمەت كورسەتەمىز. ءار كليەنتتىڭ جاعدايىن ءجىتى قاداعالاپ، قالاۋىن ورىندايمىز.
-جاسالعان وپەراتسيالارعا كەپىلدىك بەرەسىزدەر مە؟
- پلاستيكالىق حيرۋرگيا - بۇل وتە ۇلكەن ءتارتىپ. ارينە، جاۋاپكەرشىلىك جۇكتەلگەن. ءبىراق، كەپىلدىك بەرۋ قيىن. سەبەبى مەديتسينادا كەپىلدىك جوق. ويتكەنى، كەلگەن پاتسيەنت تاۋار ەمەس، وپەراتسيا دا تاۋارعا جاتپايدى. كوپ جاعدايدا وتانىڭ ناتيجەسى ناۋقاستىڭ اناتوميالىق ەرەكشەلىگىنە، ونىڭ وتاعا مورالدىق تۇرعىدا دايىندىعىنا، وتادان كەيىنگى ەڭبەك-شارا نۇسقاۋلارىن ساقتاعانىنا جانە دارىگەردىڭ وتانى جاساۋىنا بايلانىستى. سونداي-اق وپەراتسيادان كەيىنگى وڭالتۋ شارالارىنىڭ ورىندالۋى ماڭىزدى. سوندىقتان كەپىلدىك بەرىلمەيدى. ءبىراق، وپەراتسيانىڭ سانيتارلىق نورماعا سايكەس وتۋىنە، ادامنىڭ پروتسەدۋراعا دايىن ەكەنىنە جانە وپەراتسيادان كەيىن مەديتسينالىق كومەك كورسەتۋگە كەپىلدىك بەرىلەدى.
-جاس كورىنەم دەپ كەرىسىنشە تابيعي سۇلۋلىعىنان ايرىلىپ قالماي ما؟
- قازىر نازىك جاندار شىنايلىققا جاقىن، تابيعي سۇلۋلىققتان الشاق بولمايتىنداي ناتيجەنى تالاپ ەتەدى. اراسىندا كەلبەتىن ادام تانىماستاي وزگەرتكىسى كەلەتىندەر دە كەزدەسەدى. ونداي كەزدە ءبىز پاتسيەنتكە تۇسىندىرۋگە تىرىسامىز نەمەسە وتا جاساۋدان باس تارتامىز.
-ەرادامدار اراسىنداعى تانىمال وتا قانداي؟
- ارينە، پلاستيكالىق وتانىڭ نەگىزگى بولىگىن ايەل ادامدار جاساتادى. ءبىراق، قازىرگى ۋاقىتتا ەر ادامدار دا پلاستيكالىق حيرۋرگياعا ءجيى جۇگىنە باستادى. ەرلەردىڭ كوپ سۇرايتىنى - قيسىق مۇرىندى تۇزەتۋ. بۇدان بولەك، قاباعىن الدىرۋعا، كوز استىنداعى ىسىگىن كەتىرۋگە، ميميكالىق اجىمدەردى تارتتىرۋعا كەلەدى.

- قازىر قىز-كەلىنشەكتەر ارتىق سالماقتان قۇتىلۋ ءۇشىن وپەراتسيا جاساتادى. وكىنىشكە قاراي، ىشتەگى مايدان ارىلامىن دەپ اجال قۇشقاندار دابار. كاسىبي مامان رەتىندە ايتىڭىزشى، وعان نەسەبەپ بولۋى مۇمكىن؟
- قايعىلى جاعدايلار بولىپ جاتادى. بىرىنشىدەن، ناۋقاستىڭ دۇرىس دايىندالماۋى، ەكىنشىدەن، وپەراتسيا الدىندا مەديتسينالىق تەكسەرىستەن تولىق وتپەۋى، ۇشىنشىدەن وپەراتسيانىڭ جاسالۋىنا بايلانىستى. بۇل - كۇردەلى وتا. سوندىقتان جاسقا قاتىستى شەكتەۋ بولعانى ابزال. جوعارىدا اتاپ وتكەنىمدەي، ءبىز 52 جاستان اسقان ادامدارعا مۇنداي وپەراتسيا جاسامايمىز. سونداي-اق سالماعى جوعارى بولسا دا باس تارتامىز. ويتكەنى، قاۋىپ جوعارى بولادى. وتا جاساتار الدىندا پاتسيەنت دارىگەردى دۇرىس تاڭداۋى كەرەك. قازىر عالامتوردىڭ دامىعان ۋاقىتى. ءتۇرلى پىكىرلەرگە، كلينيكانىڭ ستاتۋسىنا ءمان بەرگەن ءجون. ودان بولەك سول دارىگەردەن كەڭەس السا دا ارتىق ەتپەيدى. بارلىعىنا اسا مۇقيات، ىجداعاتتىلىقپەن قاراعان ابزال.

-جاسىراتىنى جوق، قازىر سۇلۋلىق سالوندارىندا داشاعىن پلاستيكالىق وپەراتسيالار جاسالىپ ءجۇر، بۇل قانشالىقتى دۇرىس؟
- دۇرىس ەمەس. كەز كەلگەن وپەراتسيا - تاۋەكەل. وپەراتسيا بارىسىندا ءتۇرلى جاعداي بولادى. سالونداردا ادامعا كومەكتەسەتىن مەديتسينا ماماندارى، كەرەكتى ءدارى-دارمەك پەن اپپاراتتار دا جوق. سوندىقتان نازىك جاندار دەنساۋلىعىنا، ومىرىنە قاۋىپ توندىرەتىن جەرلەرگە بارماعانى دۇرىس. بىزدە ليتسەنزياسى جوق ماماندار سالونداردا، جەكە كلينكالاردا وپەراتسيا جاسايدى. مۇنى دەنساۋلىق ساقتاۋ مينيسترلىگى ءجىتى باقىلاۋى كەرەك دەپ ويلايمىن. ارنايى ليتسەنزياسى، ءبىلىمى جوق شەتەلدىكتەر كەلىپ وپەراتسيا جاساپ، قالتاسىن قامپايتىپ كەتەدى. نەگە؟ ويتكەنى، ونى ەشكىم قاداعالاپ جاتقان جوق. بۇل - ۇلكەن پروبلەما.

-قازىر ءبىزدىڭ ەلدە ينتيمدى حيرۋرگيا سۇرانىسقا يەبولىپ جاتىر ەكەن. ءسىزدىڭ ويىڭىزدى بىلسەك…
- ينتيمدىك پلاستيكالىق حيرۋرگيا - ايەلدىڭ جىنىس مۇشەلەرىنىڭ فۋنكتسياسىن عانا ەمەس، ەستەتيكاسىن قالپىنا كەلتىرۋ مۇمكىندىگى. ءبىزدىڭ قازاق ايەلدەرى ومىرگە كوپ بالا اكەلەدى. سايكەسىنشە، دەنساۋلىعى ناشارلايدى. بۇل تەك جىنىستىق قاتىناس ءۇشىن عانا جاسالاتىن وپەراتسيا ەمەس. جالپى، ايەلدىڭ دەنساۋلىعىن قالپىنا كەلتىرۋگە ارنالعان وپەراتسيالار. بۇكىل قىز-كەلىنشەكتەرگە مىندەتتى تۇردە جاساۋىنا كەڭەس بەرەتىن ەدىم. دەنى ساۋ انادان دەنى ساۋ ۇرپاق تۋادى. دارىگەر رەتىندە مۇنى قولدايمىن.
اۆتور
الما مۇقانوۆا