بۋكمەكەرلىك كەڭسەلەرگە اۋدارعان اقشانى قايتارىپ الۋعا بولا ما
استانا. KAZINFORM - ويىن بيزنەسى جانە لوتەرەيانى رەتتەۋ كوميتەتىنىڭ باسپا ءسوز قىزمەتى بورىشكەرلەردىڭ ءبىرىڭعاي تىزىلىمىندە تۇرعان ازاماتتارعا، ياعني قۇمار ويىن، ءباس تىگۋگە تىيىم سالىنعان ازاماتتارعا قاتىستى تۇسىنىكتەمە بەردى.
- تۋريزم جانە سپورت مينيسترلىگىنىڭ ويىن بيزنەسىن جانە لوتەرەيانى رەتتەۋ كوميتەتى 2024 -جىلعى 15-قاراشادا تاراتقان باسپا ءسوز رەليزىن كەيبىر ب ا ق جانە الەۋمەتتىك جەلى قولدانۋشىلارى قاتە ءتۇسىنىپ، بورىشكەرلەردىڭ ءبىرىڭعاي تىزىلىمىندە (ب ب ت) تۇرعان ازاماتتار بۋكمەكەرلىك كەڭسەلەرگە اۋدارىلعان قاراجاتتارىن قايتارىپ الا الادى دەگەن جالعان اقپارات تاراتقان. كوميتەت بۇل مالىمەتتى رەسمي تۇردە جوققا شىعارادى، - دەلىنگەن حابارلامادا.
«ويىن بيزنەسى تۋرالى» زاڭنىڭ 15-بابى، 1-تارماعىنىڭ 3-تارماقشاسىنا سايكەس، ببت- دا تىركەلگەن ازاماتتارعا قۇمار ويىندارعا جانە ءباس تىگۋگە قاتىسۋعا تولىق تىيىم سالىنعان. ەگەر قۇمار ويىندارعا نەمەسە ءباس تىگۋگە زاڭسىز قاتىسۋ انىقتالسا، ويىن بيزنەسىن ۇيىمداستىرۋشىلار اكىمشىلىك جاۋاپكەرشىلىككە تارتىلادى. الايدا، بۇل اكىمشىلىك شارالار اۋدارىلعان اقشانى ماجبۇرلەپ قايتارۋدى قاراستىرمايدى.
كوميتەت ب ب ت- دا تۇرعان ازاماتتاردى قۇمار ويىندار مەن ءباس تىگۋگە قاتىسۋدان اۋلاق بولۋعا شاقىرادى جانە ولاردىڭ مۇنداي ارەكەتتەردەن وزدەرىن قورعاۋ قاجەتتىگىن ەسكەرتەدى.
- كوميتەت بۋكمەكەرلىك كەڭسەلەردىڭ شوتتارىنا اۋدارىلعان قاراجاتتاردى قايتارۋمەن اينالىسپايدى جانە مۇنداي قىزمەت كورسەتۋگە ۋاكىلەتتى ەمەس. ەگەر قاراجاتتى قايتارۋعا قاتىستى داۋلار تۋىنداسا، ازاماتتارعا سوتقا دەيىنگى رەتتەۋ سۋبەكتىلەرىنە جۇگىنۋ كەرەك. ازاماتتىق كودەكستىڭ 9-بابىنا سايكەس، سوتقا شاعىمدانۋ ۇسىنىلادى، - دەپ ءتۇسىندىردى ۆەدومستۆو.
ازاماتتارعا تەك ليتسەنزيالانعان بۋكمەكەرلىك كەڭسەلەردىڭ رەسمي سايتتارىندا تىركەلۋگە كەڭەس بەرىلەدى. ليتسەنزيالانعان كەڭسەلەردىڭ تىزىمىمەن مىنا سىلتەمە ارقىلى تانىسۋعا بولادى.
بۇعان دەيىن حابارلاعانىمىزداي، ويىن بيزنەسىن جانە لوتەرەيانى رەتتەۋ كوميتەتى ونلاين قابىلداۋدى ىسكە قوستى.
