سەۋلدە شەرۋشىلەر وڭتۇستىك كورەيانىڭ بۇرىنعى پرەزيدەنتىن قاماۋعا الۋدى تالاپ ەتتى
استانا. KAZINFORM - سەنبى كۇنى سەۋلدىڭ ورتالىعىنا جينالعان مىڭداعان شەرۋشى وڭتۇستىك كورەيانىڭ بيلىكتەن شەتتەتىلگەن پرەزيدەنتى يۋن سوك ەلدى دەرەۋ قاماۋعا الۋدى تالاپ ەتتى. بۇل تۋرالى Euronews جازدى.
كورەيا رەسپۋبليكاسىندا بىرنەشە اپتا بەرى ەل باسقاراتىن كوشباسشى جوق: پارلامەنتشىلەر پرەزيدەنت يۋن سوك ەل مەن ونىڭ مۇراگەرى حان دۋك سۋعا يمپيچمەنت جاريالاعان. قازىر ەلدى ەكونوميكا ءمينيسترى باسقارىپ وتىر.
شەرۋشىلەر سەنبى كۇنى سەۋلدىڭ ورتالىعىنا جينالىپ، جەلتوقساننىڭ باسىندا اسكەري جاعداي ەنگىزۋگە ارەكەتتەنگەنى ءۇشىن «بۇلىك جاسادى» دەپ ايىپتالعان وڭتۇستىك كورەيانىڭ بيلىكتەن شەتتەتىلگەن پرەزيدەنتى يۋن سوك ەلدى دەرەۋ قاماۋعا الۋدى تالاپ ەتتى.
جينالعاندار يۋننىڭ قاۋىپسىزدىك قىزمەتى ارالاسقاندىقتان قۇقىق قورعاۋ قىزمەتكەرلەرى ونى تۇتقىنداي الماعانىنا نارازىلىق ءبىلدىردى.
مەملەكەتتىك سىبايلاس جەمقورلىققا قارسى اگەنتتىك يۋن سوك ەلدى ۇستاۋ ارەكەتىن پرەزيدەنتتىڭ قاۋىپسىزدىك قىزمەتى مەن تەرگەۋشىلەر اراسىنداعى بىرنەشە ساعاتقا سوزىلعان قارسىلىقتان كەيىن ۋاقىتشا توقتاتقانىن حابارلادى.
يۋننىڭ جاقتاستارى دا كوشەگە شىقتى: ولار ۇلتتىق جينالىس قابىلداعان يمپيچمەنتتىڭ جويىلۋىن تالاپ ەتتى.
بيلىكتەن كەتكەنىنە قاراماستان، يۋن سوك ەل ءوزىنىڭ كەيبىر ارتىقشىلىقتارىن ساقتاپ قالدى، ول قازىر قاۋىپسىزدىك قىزمەتىنىڭ قورعاۋىندا. ونىڭ ءىسى كونستيتۋتسيالىق سوتتا قارالىپ جاتىر.
ەستەرىڭىزگە سالا كەتەيىك، وڭتۇستىك كورەيا سوتى 14- جەلتوقساندا پارلامەنتتە يمپيچمەنت جاريالاۋ ناتيجەسىندە وكىلەتتىگى توقتاتىلعان كورەيا رەسپۋبليكاسىنىڭ پرەزيدەنتى يۋن سوك ەلدى تۇتقىنداۋعا جانە ءتىنتۋ جۇرگىزۋگە وردەر بەردى.
