ەسكى ۇيگە كىرگەن كەزدە جۇرەگىم اۋىرادى - الماتى اكىمى
الماتى. KAZINFORM - الماتى اكىمى تۇركسىب اۋدانىنداعى ەسكى تۇرعىن ۇيلەردى جاڭارتۋ باعدارلاماسى بويىنشا قۇرىلىس سالۋ جانە تۇرعىنداردى كوشىرۋ بارىسىمەن تانىستى.
ينۆەستيتسيالىق جوبا شارتى مەن الماتى قالاسى اكىمدىگىنىڭ 2020 -جىلعى 11-قىركۇيەكتەگى قاۋلىسى نەگىزىندە تۇركسىب اۋدانىندا سەيفۋللين، كاسسين، كوتەلنيكوۆ، اقان سەرى كوشەلەرىنىڭ اۋماعىنداعى «Qazaq Stroy» قۇرىلىس سالۋشىسى 8 كوپپاتەرلى تۇرعىن ءۇيدى سالىپ جاتىر.
2022 -جىلى وسى اۋماقتا ءبىرىنشى كەزەك بويىنشا 119 پاتەرگە ارنالعان 6 قاباتتى ەكى ءۇي سالىنىپ، پايدالانۋعا بەرىلدى، وعان جاقىن ماڭداعى ەسكى ۇيلەردىڭ تۇرعىندارى كوشىرىلدى.
ەكىنشى كەزەكتى تۇرعىن سالۋ ءۇشىن ەكى قاباتتى 12 ەسكى ءۇي بۇزىلدى. ولاردىڭ ورنىندا بيىل ماۋسىم ايىندا 429 پاتەرگە ارنالعان 6 كوپپاتەرلى ءۇيدىڭ قۇرىلىسى اياقتالادى، ونىڭ 130 ى - ەسكى تۇرعىن ءۇي تۇرعىندارىنا ارنالعان.
ءۇشىنشى كەزەكتى ءۇي سالۋدى باستاۋ ءۇشىن 160 پاتەردەن تۇراتىن 18 ەسكى ءۇيدىڭ تۇرعىندارىن ەكىنشى كەزەكتەگى ۇيلەرگە كوشىرۋ قاجەت. الايدا 34 مەنشىك يەسى كوشۋگە ءالى كەلىسكەن جوق، 126 سى ايىرباۋعا كەلىستى.
پاتەر يەلەرىنىڭ باسىم بولىگى توزىعى جەتكەن ۇيدەگى جاعدايدىڭ جوقتىعىن ايتىپ، ولاردى تەزدەتىپ كوشىرۋدى سۇراعان. ولاردىڭ ايتۋىنشا، تۇرعىن ءۇيدى جوندەۋگە كەلىسپەيتىن مەنشىك يەلەرى ءوز پاتەرىن جالعا بەرەدى، سوندىقتان تۇرعىن ءۇي جاعدايىن جاقسارتۋعا مۇددەلى ەمەس.
ءوز كەزەگىندە قالا اكىمى تۇرعىندارعا مەنشىك يەلەرىنىڭ %100 كەلىسىمىنسىز ينۆەستور قونىس اۋدارۋدى باستاي المايتىنىن ءتۇسىندىردى. مۇنىڭ شەشىمى رەتىندە ەربولات دوسايەۆ ءوزى قۇرعان قونىس اۋدارۋ قورىن تارتۋدى ۇسىندى. ەسكى تۇرعىن ءۇيدى قالدىرۋعا كەلىسكەن ازاماتتار قوردىڭ پاتەرلەرىنە بىرتىندەپ قونىستانا باستايدى.
«ءبىز كۇردەلى قۇرىلىس كاسىپورنى ارقىلى توزىعى جەتكەن ۇيلەردى بوساتۋدى باستايمىز. سىزدەردىڭ جاعداي جاسالعان جاڭا تۇرعىن ۇيگە قونىس اۋدارعاندارىڭىزدى قالايمىن، ويتكەنى مەن وسىنداي پاتەرلەرگە بارعان كەزدە اكىم رەتىندە جۇرەگىم اۋىرادى»، - دەدى قالا باسشىسى.
تۇرعىندار اكىمگە تۇرعىندار ماڭايلارىندا زاڭسىز سالىنعان مونشا، باۋ- باقشا، باسسەين، گاراجى بار ەسكى ۇيلەر تۋرالى ايتتى.
مەگاپوليس باسشىسى قالا قۇرىلىسىن باقىلاۋ باسقارماسىنا رۇقساتسىز سالىنعان عيماراتتاردى تەكسەرۋدى تاپسىردى. سونىمەن قاتار، كەزدەسۋدە تۇرعىندار كوتەرگەن بارلىق ماسەلە زاڭ اياسىندا شەشىلەتىنىن جەتكىزدى.
ەسكى تۇرعىن ءۇيدى جاڭاسىنا اۋىستىرعان قالا تۇرعىندارى قالا اكىمىنە العىس ءبىلدىردى.
«ەسكى ۇيلەر قورقىنىشتى، ءومىر سۇرۋگە كەلمەيتىندەي جاعدايدا ەدى. قازىر بىزدە جاڭا، تازا پاتەرلەر بار. مەن بۇل ۇيگە ەكى جىل بۇرىن قونىستاندىم، ءبىز وتە قۋانىشتىمىز»، - دەدى جاڭا ءۇي تۇرعىنى.
ەربولات دوسايەۆ اۋدان اكىمدىگىنە جاڭا ۇيلەردىڭ اۋماعىن اباتتاندىرۋ مەن كوگالداندىرۋدى باقىلاۋدى، سونداي-اق تۇراق ورىندارىن قاراستىرۋدى جۇكتەدى.
مەگاپوليس باسشىسى جايلى قالالىق ورتا قۇرۋ - اكىمدىك جۇمىسىنىڭ باستى باعىتتارىنىڭ ءبىرى، ال ەسكى تۇرعىن ءۇي ماسەلەسى تۇركسىب اۋدانىنداعى ەڭ وزەكتى ماسەلەنىڭ ءبىرى ەكەنىن تىلگە تيەك ەتتى.
ايتا كەتەيىك، تۇركسىب اۋدانىندا كوپپاتەرلى تۇرعىن ءۇي قورىندا 1247 ءۇيدى بار، جوندەۋدى قاجەت ەتەتىن ەسكى ۇيلەردىڭ سانى 586.
سونداي-اق تۇركسىب اۋدانىنا قاراستى شۋاقتى شاعىن اۋدانىندا ينجەنەرلىك كوممۋنيكاتسياعا قاتىستى قوردالانعان ماسەلە تولىق شەشىلدى.
تۇركسىب اۋدانىنىڭ اكىمى باقىتجان اقجاروۆ قالا باسشىسىنا شۋاقتى شاعىن اۋدانىندا ينجەنەرلىك ينفراقۇرىلىمقا قاتىستى ۇزاق جىلعى ماسەلەنى شەشۋ تۋرالى باياندادى.
شاعىن اۋداندا ەلەكترمەن جابدىقتاۋ جەلىلەرىن سالۋ بويىنشا جوبانى جۇزەگە اسىرۋ اياقتالدى.
ءبىر جىلعا جەتەر-جەتپەس ۋاقىتتا جۇرگىزىلگەن 5,5 ك م جەلىنى جاڭعىرتۋ ەلەكتر قۋاتىنىڭ شىعىنىن ازايتۋعا، پايدالانۋ شىعىندارىن قىسقارتۋعا جانە 1500 دەن استام تۇرعىندى ساپالى ەلەكترمەن قامتاماسىز ەتۋگە مۇمكىندىك بەردى.
وسى شاعىن اۋداندا ۇزىندىعى 17,4 ك م سۋمەن قامتۋ جانە سۋ بۇرۋ جەلىلەرىن سالۋ جوباسى جۇزەگە اسىرىلدى، ونىڭ ىشىندە 10 ك م - سۋ قۇبىرى، 7,4 ك م - كارىز جەلىسى. جوبا اياسىندا ايشا ءبيبى، اقتاستى، بەرەكە، ۆولوچايەۆسكايا، دۋاداق، مايەكتى سايالى، تەرەكتى، ىرعايتى سىندى 9 كوشە قامتىلدى.
جۇمىس جۇرگىزگەن «مەليوراتور» مەردىگەرلىك ۇيىمى 2023 -جىلدىڭ ماۋسىم ايىندا جولدىڭ ەنى بويىنشا اسفالت توسەمدى تولىق قالپىنا كەلتىرە وتىرىپ، جەلىلەردىڭ قۇرىلىسىن اياقتادى.
بۇل شاعىن اۋدان تۇرعىندارىنا ورتالىق سۋمەن قامتۋ جانە سۋ بۇرۋ جەلىلەرىنە قول جەتكىزۋدى قامتاماسىز ەتتى، بۇل ءۇشىن قالا تۇرعىندارى قالا باسشىسىنا العىس ءبىلدىردى.
سونىمەن قاتار، ۆولوچايەۆسكايا كوشەسىنىڭ كارىز اعىنى ءۇشىن قاجەتتى ەڭىس جوق شاعىن ۋچاسكەسىندە كارىز- سورعى قۇرىلىسىن سالۋ جوباسى ازىرلەنىپ جاتىر. الەۋمەتتىك جاۋاپكەرشىلىك اياسىندا جوبالاۋشى جۇمىستى تەگىن جۇرگىزەدى. مەملەكەتتىك ساراپتاما شامامەن 2024 -جىلعى ماۋسىم ايىندا شىعادى.
سونداي-اق، ەربولات دوسايەۆ شۋاقتى شاعىن اۋدانىنداعى كوشكىندەردىڭ الدىن الۋ جوسپارىمەن تانىستى.
قالا باسشىسى ءبىرىنشى كەزەكتە تۇرعىنداردىڭ قاۋىپسىزدىگىن قامتاماسىز ەتۋدى، ونىڭ ىشىندە قاجەت بولعان جاعدايدا ەڭىستىڭ شەتىندەگى ۇيلەردى ساتىپ الۋدى تاپسىردى. ءارى مەگاپوليس اكىمى شاعىن اۋداندا نوسەر كارىزىن سالۋ قاجەتتىگىن اتاپ ءوتتى.
قالا باسشىسى گيدروگەولوگيالىق زەرتتەۋلەر جۇرگىزۋگە جانە وزەن ارناسىنىڭ نەگىزىن نىعايتۋعا نۇسقاۋ بەردى.
اۆتور
الما مۇقانوۆا
