ەسكى كولىكتى وتكىزىپ، جاڭاسىن جەڭىلدىكپەن الۋعا بولادى: باعدارلاما قاشان باستالادى؟

مينيسترلىك: ەسكى كولىككە جاڭا كولىك الۋعا سەرتيفيكات بەرىلەدى

ەكولوگيا جانە تابيعي رەسۋرستار مينيسترلىگىنىڭ مالىمەتىنشە، قازىر پايدالانۋدان شىققان كولىك قۇرالدارى مەن وزدىگىنەن جۇرەتىن اۋىل شارۋاشىلىعى تەحنيكاسىن قايتا وڭدەيتىن كاسىپورىنداردى انىقتاۋ جۇمىستارى جۇرگىزىلىپ جاتىر.

قايتا وڭدەۋشىلەرمەن شارت جاسالعاننان كەيىن recycle.kz سايتىندا ەسكى كولىكتەر مەن اۋىل شارۋاشىلىعى تەحنيكاسىن قابىلداۋعا ءوتىنىم بەرۋ باستالعانى تۋرالى حابارلاندىرۋ جاريالانادى. سول جەردە قابىلداۋ پۋنكتتەرىنىڭ وزەكتى ءتىزىمى دە كورسەتىلەدى. قولدانىستاعى ىنتالاندىرۋ قاعيدالارىنا سايكەس، ەسكى كولىگىن نەمەسە وزدىگىنەن جۇرەتىن اۋىل شارۋاشىلىعى تەحنيكاسىن كادەگە جاراتۋعا تاپسىرعان يەسىنە قازاقستان اۋماعىندا شىعارىلعان جاڭا كولىك نەمەسە اۋىل شارۋاشىلىعى تەحنيكاسىن ساتىپ الۋعا جەڭىلدىك سەرتيفيكاتى بەرىلەدى، - دەپ ءتۇسىندىردى مينيسترلىك رەداكتسيانىڭ ساۋالىنا بەرگەن جاۋابىندا.

الايدا سەرتيفيكاتتىڭ ناقتى مولشەرى ازىرگە اتالعان جوق. اۆتوكولىك قۇرالدارىنىڭ ساناتتارى مەن وزدىگىنەن جۇرەتىن اۋىل شارۋاشىلىعى تەحنيكاسىنىڭ تۇرلەرىنە قاراي جەڭىلدىك كولەمىن يندۋستريالىق قىزمەتتى مەملەكەتتىك قولداۋ سالاسىنداعى ۋاكىلەتتى ورگان بەلگىلەپ، جىل سايىن وكم وپەراتورىنا جولدايدى.

قازاقستانداعى كولىكتەردىڭ 44 پايىزدان استامى 20 جىلدان اسقان

قازاقستان اۆتوكولىك وداعىنىڭ پرەزيدەنتى انار ماقاشيەۆانىڭ ايتۋىنشا، كەيىنگى بىرنەشە جىلدا ەلدىڭ اۆتوپاركى جاڭا كولىكتەرمەن ايتارلىقتاي تولىققان. سوعان قاراماستان، قولدانىستاعى اۆتوكولىكتەردىڭ ەداۋىر بولىگى ءالى دە ەسكىرگەن.

قازىر پايدالانىلعانىنا جەتى جىلعا دەيىنگى كولىكتەردىڭ سانى 1,5 ميلليوننان اسادى. بۇل كەيىنگى بىرنەشە جىلدا اۆتوپارككە وتە كوپ جاڭا كولىك قوسىلعانىن كورسەتەدى. سونىمەن بىرگە ەلىمىزدەگى كولىكتەردىڭ 44 پايىزدان استامىنىڭ جاسى 20 جىلدان اسىپ كەتكەن. ارينە، مۇنداي ەسكى كولىكتەردى اۋىستىرۋ كەرەك. بۇل رەتتە ازاماتتارعا ابدەن ەسكىرگەن كولىكتەرىن جاڭاسىنا اۋىستىرۋعا كومەكتەسۋ قاجەت. ول ءۇشىن كولىك ساتىپ الۋدى قولجەتىمدى ەتەتىن جاعداي جاسالۋعا ءتيىس، - دەيدى انار ماقاشيەۆا.

اۆتوساراپشى: باعدارلاما ازىرگە ىسكە قوسىلعان جوق

ال اۆتوساراپشى الەكسەي الەكسەيەۆتىڭ ايتۋىنشا، كادەگە جاراتۋ باعدارلاماسى قايتا ىسكە قوسىلدى دەۋگە ءالى ەرتە. ويتكەنى كولىك قابىلدايتىن كاسىپورىننان باستاپ تاريفتەرگە دەيىن ءبىرقاتار ماسەلە شەشىلمەگەن.

قازىر كادەگە جاراتۋ باعدارلاماسىنىڭ قايتا ىسكە قوسىلاتىنى تۋرالى ناقتى جاڭالىق جوق. بىزگە ازىرگە ونىڭ الداعى ۋاقىتتا قايتا جۇمىس ىستەيتىنى عانا ايتىلىپ وتىر. ءبىراق قاشان باستالاتىنى بەلگىسىز. بۇل قىزمەتتى كورسەتەتىن كاسىپورىن ءالى انىقتالماعان، تاريفتەر جوق، ءتيىستى ەرەجەلەر دە بەكىتىلمەگەن. بۇعان دەيىن كادەگە جاراتۋمەن اينالىسقان «ۆتورچەرمەت» قازىر تەك قارا مەتالل قابىلدايدى. سوندىقتان باعدارلاما ازىرگە قايتا ىسكە قوسىلعان جوق، - دەدى ساراپشى.

ونىڭ سوزىنشە، باعدارلامانىڭ الداعى جۇمىس تارتىبىنە قاتىستى دا ناقتى جاۋاپتى قاجەت ەتەتىن ماسەلەلەر بار.

باعدارلامانىڭ قاشان جانە قانداي تارتىپپەن جۇمىس ىستەيتىنى، تالاپتارى قانداي بولاتىنى، كولىكتەردى كادەگە جاراتۋدى كىم جۇرگىزەتىنى تۋرالى ناقتى اقپارات جوق. باعدارلاما بولۋى كەرەك، ونىڭ قايتا ىسكە قوسىلاتىنى ايتىلىپ وتىر. ءبىراق ءارى قاراي قالاي جۇمىس ىستەيتىنى، سەرتيفيكات مولشەرى قانشا بولاتىنى جانە باسقا دا شارتتارى ازىرگە بەلگىسىز، - دەيدى الەكسەي الەكسەيەۆ.

وسىلايشا، ەسكى كولىگىن كادەگە جاراتۋعا تاپسىرعان ازاماتقا قازاقستاندا شىعارىلعان جاڭا كولىك ساتىپ الۋعا جەڭىلدىك سەرتيفيكاتىن بەرۋ تەتىگى قاراستىرىلعان. الايدا ونى ءىس جۇزىندە پايدالانۋ ءۇشىن الدىمەن قايتا وڭدەۋشى كاسىپورىندار انىقتالىپ، ولارمەن شارت جاسالۋى قاجەت. سودان كەيىن عانا كولىك قابىلداۋدىڭ باستالعانى جانە قابىلداۋ پۋنكتتەرى تۋرالى رەسمي اقپارات جاريالانادى.

BAQ. KZ