ەسكى كولىكتى وتكىزسەڭىز، جاڭا كولىككە جەڭىلدىك بەرىلەدى: شارتتارى قانداي؟

قۇجاتتى بەرۋ، باسقا ادامعا تاپسىرۋ جانە پايدالانۋ ءتارتىبى بەكىتىلدى.

BAQ. KZ ءتىلشىسى مەحانيزمنىڭ قالاي جۇمىس ىستەيتىنىنە شولۋ جاسادى.

قازاقستاننىڭ ەكولوگيا جانە تابيعي رەسۋرستار ءمينيسترى 2026-جىلعى 6-قازاندا ءتيىستى بۇيرىققا قول قويعان بولاتىن. قۇجات قولدانىستان شىققان كولىكتەر مەن وزدىگىنەن جۇرەتىن اۋىل شارۋاشىلىعى تەحنيكاسىن كادەگە جاراتۋعا تاپسىرعانىن راستايتىن قۇجاتتى بەرۋ ءتارتىبىن ايقىندايدى. سونىمەن قاتار ول قازاقستاندا وندىرىلگەن كولىك قۇرالدارىن ساتىپ الۋعا جەڭىلدىك الۋ مۇمكىندىگىن قاراستىرادى.

جاڭا قاعيدالار جەڭىلدىك سەرتيفيكاتىن بەرۋ، ونى باسقا ادامعا وتكىزۋ نەمەسە قايتا تىركەۋ، سونداي-اق ساتىپ الۋ كەزىندە پايدالانۋ ءتارتىبىن بەلگىلەيدى. سەرتيفيكات جەكە تۇلعالارعا دا، زاڭدى تۇلعالارعا دا بەرىلەدى.

سەرتيفيكاتتاردىڭ جالپى سانى مەن ولارعا بولىنەتىن قاراجات كولەمى ءار كۇنتىزبەلىك جىلعا وپەراتوردىڭ ينۆەستيتسيالىق ساياساتىنا سايكەس بەلگىلەنەدى. بۇل رەتتە ىنتالاندىرۋ قاعيدالارى ەسكەرىلەدى. ەگەر ءبىر جىلعا بەلگىلەنگەن سەرتيفيكات سانى نەمەسە قاراجات كولەمى شەگىنە جەتسە، وپەراتور جاڭا ليميتتەر بەكىتىلگەنگە دەيىن ەسكى كولىكتەر مەن اۋىل شارۋاشىلىعى تەحنيكاسىن قابىلداۋدى ۋاقىتشا توقتاتادى.

جەڭىلدىكتىڭ مولشەرى قالاي انىقتالادى؟

قازاقستاندا وندىرىلگەن اۆتوكولىك نەمەسە وزدىگىنەن جۇرەتىن اۋىل شارۋاشىلىعى تەحنيكاسىن ساتىپ الۋعا بەرىلەتىن جەڭىلدىكتىڭ ناقتى مولشەرى ىنتالاندىرۋ قاعيدالارىنا سايكەس ەسەپتەلەدى. ونىڭ سوماسى سەرتيفيكاتتا كورسەتىلەدى.

اۆتوكولىكتىڭ ساناتى مەن اۋىل شارۋاشىلىعى تەحنيكاسىنىڭ تۇرىنە قاراي جەڭىلدىكتىڭ مولشەرىن ونەركاسىپتى مەملەكەتتىك ىنتالاندىرۋ سالاسىنداعى ۋاكىلەتتى ورگان جىل سايىن ايقىندايدى.

سەرتيفيكات يەسى ونى تاپسىرعان كولىكتىڭ ساناتىنا قاراماستان، كەز كەلگەن ساناتتاعى جاڭا كولىككە نەمەسە اۋىل شارۋاشىلىعى تەحنيكاسىنا جەڭىلدىك الۋ ءۇشىن پايدالانا الادى. ياعني ەسكى جەڭىل اۆتوكولىكتى تاپسىرعان ادام سەرتيفيكاتتى باسقا ساناتتاعى كولىكتى ساتىپ الۋعا دا قولدانا الادى.

كادەگە جاراتۋعا تاپسىرىلعان ءار كولىك نەمەسە اۋىل شارۋاشىلىعى تەحنيكاسى ءۇشىن ءبىر عانا سەرتيفيكات بەرىلەدى. قۇجاتقا وپەراتور اۆتوماتتى تۇردە بىرەگەي ءنومىر تاعايىندايدى. سونىمەن قاتار سەرتيفيكاتتا ونىڭ دەرەكتەرى مەن يەسى تۋرالى اقپاراتتى وقۋعا مۇمكىندىك بەرەتىن QR- كود بولادى.

سەرتيفيكات قانشا ۋاقىت جارامدى؟

جەڭىلدىك سەرتيفيكاتى بەرىلگەن كۇننەن باستاپ ءبىر جىل بويى جارامدى. ونى باسقا ادامعا ءۇش رەتتەن ارتىق بەرۋگە بولمايدى. سەرتيفيكاتتى باسقا تۇلعاعا وتكىزۋ ونىڭ جارامدىلىق مەرزىمىن ۇزارتپايدى.

سەرتيفيكاتتى باسقا ادامعا بەرۋ نەمەسە قايتا تىركەۋ ءۇشىن ونىڭ يەسى وپەراتوردىڭ اۆتوماتتاندىرىلعان اقپاراتتىق جۇيەسى ارقىلى ءوتىنىم جىبەرۋى كەرەك. ودان كەيىن سەرتيفيكاتتى الۋعا ۇمىتكەرلەردەن باعا ۇسىنىستارى جينالادى. بۇل كەزەڭ ءوتىنىم بەرىلگەن كۇننەن باستاپ ءۇش جۇمىس كۇنىنە سوزىلادى.

باعا ۇسىنىسىن قازاقستان ازاماتتارى جانە قازاقستان اۋماعىندا تىركەلگەن زاڭدى تۇلعالار بەرە الادى.

بەلگىلەنگەن مەرزىم اياقتالعاننان كەيىن سەرتيفيكات يەسى ءبىر جۇمىس كۇنى ىشىندە ونى كىمگە بەرەتىنىن شەشۋى كەرەك. ەگەر ول وسى ۋاقىت ىشىندە شەشىم قابىلداماسا، ءوتىنىم كەرى قايتارىلعان بولىپ ەسەپتەلەدى، ال تۇسكەن باعا ۇسىنىستارىنىڭ كۇشى جويىلادى.

سەرتيفيكاتتى بەرۋ كەزىندە ونىڭ يەسى مەن جاڭا يەسى وپەراتوردىڭ اقپاراتتىق جۇيەسىندە ءتيىستى كەلىسىمگە ەلەكتروندىق سيفرلىق قولتاڭبا ارقىلى قول قويادى. سونىمەن قاتار قاجەتتى قۇجاتتاردى ۇسىنۋى كەرەك.

جەكە تۇلعالار جەكە باسىن كۋالاندىراتىن قۇجاتتىڭ كوشىرمەسىن تاپسىرادى. زاڭدى تۇلعالار ءۇشىن مەملەكەتتىك تىركەۋ نەمەسە قايتا تىركەۋ تۋرالى مالىمەتتەر، وكىلدىڭ وكىلەتتىگىن راستايتىن قۇجاتتار جانە ونىڭ جەكە باسىن كۋالاندىراتىن قۇجاتتىڭ كوشىرمەسى قاجەت.

بىرنەشە سەرتيفيكاتتى بىرىكتىرۋگە بولا ما؟

ءيا. ءبىر كولىك ساتىپ العان كەزدە ەڭ كوبى ەكى جەڭىلدىك سەرتيفيكاتىن بىرىكتىرۋگە بولادى. ال ءبىر دانا وزدىگىنەن جۇرەتىن اۋىل شارۋاشىلىعى تەحنيكاسىن ساتىپ الۋ ءۇشىن ءتورت سەرتيفيكاتقا دەيىن پايدالانۋعا رۇقسات ەتىلەدى.

جەڭىلدىك بەرەتىن وندىرۋشىلەردىڭ ءتىزىمىن وپەراتور قالىپتاستىرىپ، www.recycle.kz سايتىندا جاريالايدى.

سەرتيفيكاتتى پايدالانۋ ءۇشىن ازامات كولىك نەمەسە اۋىل شارۋاشىلىعى تەحنيكاسىن ساتىپ الۋ كەزىندە وندىرۋشىگە جۇگىنەدى. ودان كەيىن ديلەر وپەراتوردىڭ اقپاراتتىق جۇيەسىندە ساتىلاتىن تەحنيكا تۋرالى مالىمەتتەردى ەنگىزىپ، سەرتيفيكاتتى قولدانۋعا ءوتىنىم جاسايدى. وتىنىمگە ديلەر مەن سەرتيفيكات يەسى ەلەكتروندىق سيفرلىق قولتاڭبا ارقىلى قول قويادى.

ءوتىنىم راسىمدەلگەن كەزدە سەرتيفيكات بۇعاتتالادى. ال ونى پايدالانۋ ءراسىمى اياقتالعان سوڭ سەرتيفيكاتتىڭ كۇشى جويىلادى. ءوندىرۋشى ۇسىنعان جەڭىلدىكتى قارجىلاندىرۋ ىنتالاندىرۋ قاعيدالارىنا سايكەس جۇرگىزىلەدى.

جەكە دەرەكتەر مەن اقپاراتتىق جۇيەگە قولجەتىمدىلىك

وپەراتوردىڭ اۆتوماتتاندىرىلعان اقپاراتتىق جۇيەسىندە تىركەلەتىن پايدالانۋشىلار جەكە دەرەكتەرىن جيناۋعا جانە وڭدەۋگە كەلىسىم بەرەدى.

ديلەرلەرگە، جەرگىلىكتى اتقارۋشى ورگانداردىڭ قىزمەتكەرلەرىنە جانە كولىك قابىلداۋ پۋنكتتەرىنىڭ قىزمەتكەرلەرىنە جۇيەگە كىرۋ قۇقىعىن بەرۋ ءۇشىن ءتيىستى ۇيىمدار وپەراتورعا سەنىمحات پەن سەنىم بىلدىرىلگەن ادامنىڭ جەكە باسىن كۋالاندىراتىن قۇجاتتىڭ كوشىرمەسىن ەلەكتروندىق قۇجات اينالىمى جۇيەسى ارقىلى ۇسىنادى.

ەگەر اتالعان قىزمەتكەرلەردىڭ دەرەكتەرى وزگەرسە، ءتيىستى ۇيىمدار وزگەرىستەردى راستايتىن قۇجاتتاردى وپەراتورعا جىبەرۋگە مىندەتتى. ال قىزمەتكەر جۇمىستان كەتكەن جاعدايدا ۇيىم وپەراتورعا بۇل تۋرالى دەرەۋ حابارلاۋى كەرەك. مۇنداي تالاپ اقپاراتتىق جۇيەگە رۇقساتسىز كىرۋدىڭ الدىن الۋ ءۇشىن ەنگىزىلگەن.

وپەراتور سەرتيفيكاتتارعا قاتىستى بارلىق وپەراتسيانى ەلەكتروندىق جۋرنالدا تىركەيدى. وندا سەرتيفيكاتتىڭ بەرىلۋى، باسقا ادامعا وتكىزىلۋى نەمەسە قايتا تىركەلۋى، پايدالانىلۋى، بۇعاتتالۋى جانە كۇشىنىڭ جويىلۋى تۋرالى مالىمەتتەر، سونداي-اق وپەراتسيانىڭ كۇنى، ۋاقىتى مەن ونى ورىنداعان پايدالانۋشى كورسەتىلەدى.

قايدا جانە قاشان جۇگىنۋگە بولادى؟

سەرتيفيكاتتاردى بەرۋ جانە پايدالانۋ، سونداي-اق قولدانىستان شىققان كولىكتەر مەن اۋىل شارۋاشىلىعى تەحنيكاسىن قابىلداۋ ماسەلەلەرى بويىنشا وپەراتورعا جۇمىس كۇندەرى، دۇيسەنبىدەن جۇماعا دەيىن ساعات 08:00-13:00 جانە 14:30-17:30 ارالىعىندا جۇگىنۋگە بولادى. سەرتيفيكاتتى قايتا تىركەۋ دە وسى كەستە بويىنشا جۇرگىزىلەدى. دەمالىس جانە مەرەكە كۇندەرى قىزمەت كورسەتىلمەيدى.

ەگەر ازامات وپەراتوردىڭ ارەكەتىنە، ارەكەتسىزدىگىنە نەمەسە قابىلداعان شەشىمىنە كەلىسپەسە، قازاقستاننىڭ اكىمشىلىك راسىمدىك-پروتسەستىك كودەكسىنىڭ 13-تاراۋىنا سايكەس شاعىمدانۋعا قۇقىلى.

بۇيرىق العاشقى رەسمي جاريالانعان كۇننەن كەيىن ون كۇنتىزبەلىك كۇن وتكەن سوڭ كۇشىنە ەنەدى.