Silk Way Star جوباسى مادەني بايلانىستى نىعايتادى - رۋحيا بايدۇكەنوۆا
استانا. KAZINFORM - رۋحيا بايدۇكەنوۆا بيىل قىتايدا وتەتىن حالىقارالىق Silk Way Star جوباسىندا قازاقستاننىڭ اتىنان ونەر كورسەتۋ ول ءۇشىن ۇلكەن مارتەبە ەكەنىن اتاپ ءوتتى.
ونىڭ ايتۋىنشا، جوبانى قازاقستان رەسپۋبليكاسى پرەزيدەنتى تەلەراديوكەشەنى مەن China Media Group بىرلەسىپ ۇيىمداستىرۋى قازاقستان مەن قىتاي اراسىنداعى مادەني جانە اقپاراتتىق بايلانىستىڭ ماڭىزىن كورسەتەدى.
- Silk Way Star - الەمنىڭ تۇكپىر-تۇكپىرىنەن كەلگەن تالانتتى ونەرپازداردى بىرىكتىرەتىن، حالىقتار اراسىنداعى دوستىقتى، مادەني بايلانىس پەن ءوزارا تۇسىنىستىكتى نىعايتاتىن ەرەكشە حالىقارالىق جوبا. بۇل جوبانىڭ قازاقستان مەن قىتايدىڭ بىرلەسكەن باستاماسى رەتىندە جۇزەگە اسىرىلىپ جاتقانى مادەني ىنتىماقتاستىقتىڭ جارقىن كورىنىسى دەپ بىلەمىن. وسى جوباعا قاتىسۋ مەن ءۇشىن ۇلكەن جاۋاپكەرشىلىك ءارى قازاقستاننىڭ مادەنيەتى مەن ونەرىن حالىقارالىق ساحنادا لايىقتى تانىستىرۋعا بەرىلگەن مۇمكىندىك دەپ بىلەمىن، - دەپ جازدى رۋحيا الەۋمەتتىك جەلىدەگى پاراقشاسىندا.
ايتا كەتەلىك روزا رىمبايەۆا قىتايدا باق سىنايتىن رۋحيا بايدۇكەنوۆاعا ساتتىلىك تىلەدى. ەسكە سالساق استانادا ق ر پرەزيدەنتىنىڭ تەلەراديوكەشەنى مەن قىتاي مەديا كورپوراتسياسى (CMG) «Silk Way Star» حالىقارالىق جوباسى تۋرالى كەلىسىمگە قول قويعان ەدى.
ايتا كەتەيىك، وتكەن جىلدىڭ قاراشاسىندا «Silk Way Star» حالىقارالىق جوباسىنىڭ گراند-فينالى مارەسىنە جەتىپ، جوبانىڭ جەڭىمپازى ميشەل دجوزەف (موڭعوليا) بولعان ەدى. توقايەۆ موڭعول ءانشىسىنىڭ Silk Way Star كونكۋرسىندا كورەرمەننىڭ ىقىلاسىنا بولەنگەنىن ايتتى.
