ءاليحان سمايىلوۆ Shell كومپانياسىنىڭ اتقارۋشى ۆيتسە-پرەزيدەنتىمەن كەزدەستى
كەزدەسۋ بارىسىندا قازاقستان مەن SHELL كومپانياسىنىڭ اراسىندا ينۆەستيتسيا تارتۋ، سونداي-اق ەنەرگەتيكا سالاسىنداعى بىرلەسكەن جوبالاردى ىسكە اسىرۋ بويىنشا ىنتىماقتاستىقتى دامىتۋ ماسەلەسى قارالدى.
اتاپ ايتقاندا، تاراپتار وتكەن جىلعى جۇمىس قورىتىندىلارى مەن 2022-جىلعا ارنالعان جوسپارلاردى تالقىلادى.
«ءبىزدىڭ ىنتىماقتاستىعىمىز الدىمىزدا تۇرعان مىندەتتەردى، ءبىرىنشى كەزەكتە جاھاندىق سىن-قاتەرلەردى ەڭسەرۋگە، سونداي-اق ءوزارا ءتيىمدى قارىم-قاتىناستاردى ودان ءارى دامىتۋعا ىقپال ەتەدى» ، - دەدى ق ر پرەمەر-ءمينيسترى ءا. سمايىلوۆ.
ءوز كەزەگىندە پيتەر كوستەللو قازاقستان «Shell» كومپانياسىنىڭ ستراتەگيالىق سەرىكتەسى ەكەنىن اتاپ ءوتتى.
ەكىجاقتى ءوزارا ءتيىمدى جۇمىس ودان ءارى جالعاسادى. مۇناي-گاز سالاسىنىڭ ينۆەستيتسيالىق تارتىمدىلىعىن ارتتىرۋ ماقساتىندا ق ر پرەمەر-ءمينيسترى ۇكىمەت شەتەلدىك ينۆەستورلار كەڭەسىنىڭ قازاقستاندىق قاۋىمداستىعىمەن بىرلەسىپ جاقسارتىلعان مودەلدىك كەلىسىمشارتتى ەنگىزۋ بويىنشا جۇمىس جۇرگىزىپ جاتقانىن حابارلادى.
بۇل كەلىسىمشارت فيسكالدىق جانە رەتتەۋشىلىك پرەفەرەنتسيالار پاكەتىمەن بىرگە جاڭا تەڭىز جوبالارىنا، قۇرلىقتاعى كۇردەلى جوبالارعا جانە گاز جوبالارىنا قولدانىلاتىن بولادى.
«قازىرگى ۋاقىتتا ءبىز قولدانىستاعى زاڭناماعا ءتيىستى وزگەرىستەر ەنگىزۋ بويىنشا جۇمىس ىستەپ جاتىرمىز. قازاقستانداعى مۇناي-گاز جوبالارىن دامىتۋ ءبىزدىڭ ستراتەگيالىق ارىپتەستەرىمىز ءۇشىن ودان دا تارتىمدى بولاتىنىنا سەنىمدىمىز»، - دەدى ءا. سمايىلوۆ.
