سۋدان قاشىپ شاتىر ۇستىندە وتىرعان تۇرعىنداردى اۋە دەسانتتارى قۇتقاردى
استانا. KAZINFORM - ەلىمىزدە سۋ تاسقىنى باستالعالى قارۋلى كۇشتەردىڭ 5400 دەن استام جاۋىنگەرى، 230 تەحنيكاسى، 12 تىكۇشاعى، 5 اسكەري ۇشاعى ايماقتارعا اتتاندى.
بۇل تۋرالى Jibek Joly تەلەارناسىندا «ءبىز بىرگەمىز» تەلەمارافونىندا ايتىلدى.
سۋ تاسقىنىمەن كۇرەس باستالعالى قارۋلى كۇشتەردىڭ جەكە قۇرامى بىردەن اتسالىستى. رەسپۋبليكالىق جەدەل شتابتىڭ شەشىمىمەن جانە قورعانىس ءمينيسترىنىڭ تاپسىرماسىمەن بۇكىل ايماقتارعا اسكەريلەر جۇمىلدىرىلدى.
«اسىرەسە ەڭ قاۋىرت جۇمىس - اسكەري ۇشقىشتاردىڭ موينىنا ءتۇستى. ولار كۇنى- ءتۇنى اۋىسىممەن جۇمىس ىستەپ، قوستاناي وبلىسىندا بولعان العاشقى سۋ تاسقىنىندا ءبىر كۇندە 200 دەن استام ازاماتتاردى ەۆاكۋاتسيالادى. ءتىپتى دەسانتتاۋ جولىمەن شاتىردىڭ ۇستىنەن تۇرعىنداردى قۇتقارعان ساتتەر دە بولدى. بۇل دا ۇلكەن شەبەرلىكتى تالاپ ەتەدى. سوندىقتان ۇشقىشتاردىڭ ەڭبەگى زور بولدى»، - دەدى قورعانىس مينيسترلىگىنىڭ رەسمي وكىلى رۋسلان جانگۋلين تەلەمارافوندا.
سونداي- اق، اسكەري ينجەنەرلەر دە قۇتقارۋ جۇمىستارىنا بەلسەنە ارالاستى.
ولار اقتوبە وبلىسىنداعى ويىل وزەنى ماڭىندا ءالى كۇنگە دەيىن ادامداردى، جۇكتەردى، تەحنيكالاردى پاروم ارقىلى تاسىمالداپ جاتىر.
«اسكەري- مەديتسينالىق بريگادالاردىڭ ماماندارى دا سۋ باسقان ايماقتارعا اتتاندى. ولار جەكە قۇرامنىڭ دەنساۋلىعىن ساقتاۋمەن اينالىستى جانە تۇرعىندارعا دا مەديتسينالىق كومەك كورسەتتى. وعان جالپى 4 بريگادا، ەلۋدەن استام اسكەري مەديتسينا ماماندارى تارتىلدى»، - دەپ تولىقتىردى سپيكەر.
سۋ تاسقىنى اياقتالعان سوڭ، زالال كەلگەن اۋماقتاردى دەزينفەكتسيالاۋ شارالارى جۇرگىزىلەدى. ءقازىردىڭ وزىندە مينيسترلىكتىڭ رادياتسيالىق، حيميالىق-بيولوگيالىق قورعاۋ بولىمشەلەرى دە اقتوقبە، اتىراۋ وبلىستارىندا دەزينفەكتسيالاۋ شارالارىن باستاپ كەتتى.
ايتا كەتەيىك، سۋ تاسقىنىنداعى ەل بىرلىگىنە ارنالعان «ءبىز بىرگەمىز» تەلەمارافونى Jibek Joly ارناسىندا جالعاسىپ جاتىر.
5 ساعاتتىق تىكەلەي ەفيردە تاسقىن باسقان اۋماقتى كوزبەن كورگەن، تابيعي اپاتتان زارداپ شەككەن تۇرعىنداردىڭ جان تەبىرەنتەر وقيعالارى ايتىلىپ، تابيعي اپات ايماقتارىنان رەپورتاجدار بەرىلەدى.
بۇعان دەيىن سۋ باسقان ايماقتارعا ءبىرىنشى بولىپ كومەككە اتتانعان ت ج م قۇتقارۋشىلارى، ساربازدار مەن ءتارتىپ ساقشىلارى سۇحبات بەرگەن ەدى.
