سايت ارقىلى جوق بيلەتتەردى ساتىپ كەلگەن الماتىلىق ۇستالدى
استانا پوليتسەيلەرى OLX سايتى ارقىلى جوق بيلەتتەردى ساتىپ كەلگەن الماتى تۇرعىنىن ۇستادى.
Kazinform بۇل تۋرالى Polisia.kz سايتىنا سىلتەمە جاساپ حابارلايدى.
الماتى قالاسىنىڭ تۇرعىنى OLX سايتىندا اۋە جانە پويىز بيلەتتەرىن ساتۋمەن اينالىساتىن قىلمىستىق كاسىپ ۇيىمداستىرعان. 2023-جىلدىڭ ءساۋىر ايىنان بەرى ول جارناما سايتىندا بيلەتتەردى ارزانداتىلعان باعامەن ساتۋ تۋرالى اقپارات جاريالاعان.
وسىلايشا، ەلوردا تۇرعىنى الماتى اۋداندىق پوليتسيا باسقارماسىنا حابارلاسىپ، اۋە بيلەتتەرىن ساتامىن دەگەن جەلەۋگە سەنىپ، بەلگىسىز بىرەۋگە 100 مىڭ تەڭگە اۋدارىپ جىبەرگەنىن حابارلاعان. ول 10 بيلەت الۋدى جوسپارلاعان. اقشا اۋدارىمىنان سوڭ سەكەم الىپ، بيلەتتەردى كۇتپەستەن پوليتسياعا حابارلاسقان.
جەدەل-ىزدەستىرۋ شارالارى بارىسىندا پوليتسەيلەر الاياقتىقپەن اينالىستى دەگەن كۇدىكپەن الماتى قالاسىنىڭ 41 جاستاعى تۇرعىنىن قۇرىقتادى. قازىرگى ۋاقىتتا باسقا دا زارداپ شەككەندەردىڭ كىم ەكەنى انىقتالىپ جاتىر.
«كۇدىكتىگە قاتىستى ق ر قىلمىستىق كودەكسىنىڭ 190-بابى (الاياقتىق) بويىنشا قىلمىستىق ءىس قوزعالدى. پوليتسيا دەپارتامەنتى ازاماتتارعا ينتەرنەت ارقىلى تاۋار ساتىپ الۋ كەزىندەگى قاۋىپسىزدىك ەرەجەلەرىن ساقتاۋدى ەسكەرتەدى»،-دەيدى ىشكى ىستەر مينيسترلىگىنەن.
