سايران كولىنىڭ جاعالاۋىن اباتتاندىرۋ جۇمىستارى كەلەسى جىلى اياقتالادى
الماتى. KAZINFORM - سايران جاعالاۋىنداعى جاڭا قوعامدىق كەڭىستىك 2025-جىلى اشىلادى.
الماتى اكىمى ەربولات دوسايەۆ سايران سۋ قويماسىنىڭ جاعالاۋىن اباتتاندىرۋ جۇمىستارىمەن تانىستى، وندا جاعاجاي ايماقتارىمەن قاتار زاماناۋي قوعامدىق كەڭىستىك قۇرىلادى.
قالا باسشىسىنا وسى جىلدىڭ سوڭىنا دەيىن بارلىق قۇرىلىس-مونتاج جۇمىستارى مەرزىمىندە اياقتالاتىنى تۋرالى باياندالدى.
مامانداردىڭ ۇسىنىسى بويىنشا، 200 ءىرى ۇلكەن جاپىراقتى جاسىل جەلەكتى وتىرعىزۋ كەلەسى جىلدىڭ كوكتەمىندە جۇزەگە اسىرىلادى.
قازىر جۇمىستار %70 عا ورىندالدى: اۆتوسۋارۋ، سۋمەن جانە ەلەكترمەن جابدىقتاۋ كابەلدەردى تارتۋ اياقتالىپ قالدى. سىرتقى جارىقتاندىرۋ، جاعالاۋدى نىعايتۋ جانە جاعالاۋ قۇرىلىسى جۇرگىزىلىپ جاتىر.
ەستەرىڭىزگە سالا كەتەيىك، جوبانى ىسكە اسىرۋ 2024-جىلدىڭ اقپان ايىندا باستالعان بولاتىن. جوباعا سايكەس، سايران كولىنىڭ ەكى جاعالاۋى سۋعا جاقىن ماڭدا ۇزىندىعى 2,5 ك م ءبىرىڭعاي سەرۋەندەۋ جاعالاۋىنا قوسىلاتىن بولادى، سونداي-اق قولدانىستاعى كوپىر ارقىلى 3,5 ك م جانە اباي داڭعىلىنا شىعاتىن 4,5 ك م سەرۋەندەۋ مارشرۋتتارى قولجەتىمدى بولادى.
«سوڭعى جىلدارى سايراندى قىزىعۋشىلىق تۋدىرمايتىن قاراۋسىز قالعان جەر رەتىندە قابىلدادى. ءبىزدىڭ ماقساتىمىز - بۇل ستەرەوتيپتى وزگەرتۋ. مۇندا وركەنيەتتى دەمالىس ۇيىمداستىرىلۋى كەرەك: بالالار مەن وتباسىلىق ايماقتار، بەلسەندى ويىن-ساۋىق جانە سپورت ايماقتارى، ىڭعايلى توسەكتەرى بار جاعاجاي ايماقتارى، جارىقتاندىرىلعان جولدار، جاقسى كۇتىلگەن جاعالاۋلار، زاماناۋي كافەلەر. جوعالعان ەكوجۇيەنى، فلورا مەن فاۋنانى قالپىنا كەلتىرۋ ماڭىزدى باسىمدىق بولىپ تابىلادى. دۇنيەجۇزىندە توعاندار، سۋ قويمالارى جانە جاسىل ساياباقتار تارتىمدى جەرلەرگە اينالۋدا. قالانىڭ پوليتسەنترلىك دامۋى اياسىندا سايران ورتالىق اۋدانداردىڭ تۇرعىندارى دا، شەتەلدىك تۋريستەر دە كەلەتىن ورىنداردىڭ بىرىنە اينالۋى ءتيىس»، - دەپ اتاپ ءوتتى ەربولات دوسايەۆ.
شاھار باسشىسى مەردىگەر ۇيىمعا بارلىق قۇرىلىس، ينجەنەرلىك-تەحنيكالىق جانە سانيتارلىق نورمالاردى ساقتاي وتىرىپ، بارلىق جۇمىستاردى بەلگىلەنگەن مەرزىمدە اياقتاۋدى تاپسىردى.
بۇعان دەيىن قالا اكىمدىگى جوبانىڭ ەسكيزدەرىن ۇسىنعان بولاتىن.
2023-جىلى سايران سۋ قويماسىنىڭ ءتۇبى 50 جىلدا العاش رەت تازارتىلدى. مەحانيكالىق تازالاۋ ناتيجەلەرىنە 142 مىڭ تەكشە مەتر لاي جانە 23 توننا تۇرمىستىق قوقىس شىعارىلدى.
