ساياساتكەر 30 جاستان اسقان ايەلدەرگە بوسانۋعا تىيىم سالۋدى ۇسىندى
جاپونيانىڭ كونسەرۆاتيۆتىك پارتياسىنىڭ جەتەكشىسى ناوكي حياكۋتا 30 جاستان اسقان ايەلدەرگە بوسانۋعا تىيىم سالۋدى ۇسىندى. بۇل تۋرالى NDTV باسىلىمى حابارلايدى.
سونداي- اق ساياساتكەر 25 جاستان اسقان جاپونيالىق ايەلدەرگە تۇرمىسقا شىعۋعا، ال 18 جاستان اسقان قىزدارعا ۋنيۆەرسيتەتكە تۇسۋگە تىيىم سالۋدى ۇسىندى. ونىڭ سوزىنشە، 30 جاستان اسقان ايەلدەردىڭ جاتىرىن الىپ تاستاۋ كەرەك.
«بۇل ۇسىنىس جاس قىزداردى ەرتە جاستا انا بولۋعا ىنتالاندىرادى. سونداي- اق جاپونيانىڭ دەموگرافيالىق ماسەلەسىن شەشۋگە كومەكتەسەدى. ەرتە نەكەگە تۇرۋ جانە ۇزاق مەرزىمدى ءبىلىم بەرۋدەن باس تارتۋ ايەلدەرگە وتباسى قۇرۋعا جانە بالا تۋۋعا كوبىرەك ۋاقىت بولۋگە مۇمكىندىك بەرەدى»، - دەيدى ول.
ساياسي مانسابىنا دەيىن جازۋشى بولعان حياكۋتانىڭ بۇل ءسوزى قوعامدا دا، ب ا ق- تا دا قىزۋ تالقىعا ءتۇستى. كوبى ونىڭ كوزقاراسىن ميزوگينيستىك جانە راديكالدى دەپ سانايدى. جۇرتتىڭ سىنىنان سوڭ ساياساتكەر ءوز سوزدەرى ءۇشىن كەشىرىم سۇراۋعا ءماجبۇر بولدى. ول بۇل تەك «گيپوتەتيكالىق بولجامدار» ەكەنىن ءتۇسىندىردى.
دەگەنمەن ساياساتكەردىڭ ۇسىنىسى قوعامدا ءالى تالقىلانىپ جاتىر. ولاردىڭ باسىم كوپشىلىگىنىڭ سوزىنشە، مۇنداي ۇسىنىس قوعامداعى ايەلدەرگە قىسىمدى كۇشەيتۋى مۇمكىن.
